Isaías 31:1-9
31 Wüxi i taxü̃ i ngechaü̃ nixĩ naxca̱x i ngẽma Iraétanüxü̃ i Equítuanegu ngü̃xẽẽca̱x yadaugüxü̃. Nümagü rü nagu nayaxõgü ya yima muxũchine ya Equítuanearü carugü rü muxũchixü̃ i churaragü i cowaruétügu ĩxü̃. Natürü tama naga naxĩnüechaü̃ ya yimá norü Tupana ya üünecü, rü tama norü ucu̱xẽca̱x nadaugü.
2 Natürü nüma ya Cori ya Tupana rü guxü̃xü̃ nacua̱x rü nüxü̃́ natauxcha nax guxchaxü̃ ínanguxẽẽxü̃. Rü ngẽxguma wüxi i ta̱xacü naxuegugu rü aixcüma nayanguxẽxẽ. Rü ngẽma duü̃xü̃gü i chixexü̃gu maxẽxü̃ rü nüma ya Tupana rü tá guxchaxü̃ naxca̱x ínanguxẽxẽ. Rü ngẽxgumarüxü̃ tá ta guxchaxü̃ naxca̱x ínanguxẽxẽ i ngẽma chixexü̃arü üruü̃güarü ngü̃xẽẽruü̃gü.
3 Rü ngẽma Equítuanecüã̱x rü duü̃xü̃gümare nixĩgü, rü tama tupanagü nixĩgü. Rü ngẽma norü cowarugü rü namachimare nixĩgü, rü tama nixããxẽ. Rü nüma ya Cori ya Tupana rü tá guxchaxü̃ naxca̱x ínanguxẽxẽ i ngẽma Equítuanecüã̱x nax ngẽmaãcü napoxcugüãxü̃ca̱x. Rü ngẽma Equítuanecüã̱x rü ngẽma Iraétanüxü̃ i norü ngü̃xẽẽca̱x daugüxü̃ rü wüxigu tá guxchaxü̃gu nayi rü tá nayue.
4 Rü nüma ya Cori ya Tupana rü choxü̃ ñanagürü: —Wüxi i leóü̃ i carnéruxacü tüxü̃ imáxü̃ rü tama niña ega woo guxü̃ma i ngẽma carnérugüarü dauruü̃gü wüxigu aita naétü üegu. Rü ngẽxgumarüxü̃ tá nixĩ ya Cori ya Tupana ya Guxü̃étüwa Ngẽxmacü i ngẽxguma ma̱xpǘne ya Chióü̃gu ínaxĩ̱xgu nax Yerucharéü̃xü̃ ínapoxü̃xü̃ca̱x.
5 Rü ñoma wüxi i weri i naxchiãü̃na idauxü̃ i naétügu íñaü̃xü̃rüxü̃ tá nixĩ nax nüma ya Cori ya Tupana ya Guxãétüwa Ngẽxmacü rü tá Yerucharéü̃na nadauxü̃ rü norü uanüna napuãxü̃ rü ínapoxü̃ãxü̃ rü ínanguxuchixẽẽãxü̃ —ñanagürü.
6 ¡Pa Iraétanüxü̃x, naxca̱x pewoegu ya yimá ngóxü̃wama nüxü̃ pexoecü!
7 Erü tá ínangu i ngunexü̃ i nagu tá ípenawogüxü̃ i ngẽma perü naxchicüna̱xãgü i úirunaxca̱x rü diẽrumünaxca̱x ga pexme̱xgü ga chixexü̃gümaxãtama pexügüxü̃.
8 Rü ngẽma Achíriaanecüã̱x rü taragu tá nayue, natürü taxũtáma duü̃xü̃güarü poragagu nayue, erü choma nixĩ i nüxü̃ charüporamaexü̃. Rü ngẽma daigagu rü norü churaragü rü tá nibuxmü, rü ngẽma norü ngextü̱xüxü̃gü i íyaxügüxü̃ rü perü puracütanüxü̃ tá nixĩgü.
9 Rü ngẽma norü ãẽ̱xgacü rü muü̃maxã tá niña, rü ngẽma norü churaragüerugü rü norü wonerana tá ngéma nibuxmü. Rü ngẽma nixĩ i nüxü̃ yaxuxü̃ ya Cori ya Tupana nax Yerucharéü̃wa nüxü̃́ nangẽxmaxü̃ ya wüxi ya taxü̃ne ya üxü nax namaxã napoxcuãxü̃ca̱x i norü uanügü.
