Isaías 32:1-20
32 Rü tá nangẽxma ya wüxi ya ãẽ̱xgacü ya we̱xgu duü̃xü̃gümaxã icuácü, rü ãẽ̱xgacügü i mea duü̃xü̃gümaxã icua̱xgüxü̃.
2 Rü wüxichigü i ngẽma ãẽ̱xgacügü rü ñoma cu̱xchicaxü̃ i buanecücha̱xwa naxchipeta icúxü̃rüxü̃ tá nixĩgü. Rü ñoma ĩpata ya pucü ya taxüchicücha̱xwa natüxü̃gu ngaxínerüxü̃ tá nixĩgü. Rü ñoma natügü i paanexüchixü̃gu iya̱xgüxü̃rüxü̃ tá nixĩgü. Rü ñoma chianexü̃wa ngẽxmacü ya taxüchicü ya nutachipetarüxü̃ tá nixĩgü i ngẽma ãẽ̱xgacügü.
3 32:3-4 Rü ngẽma ãẽ̱xgacügü rü tá mea nüxü̃ nadau i guxü̃ma i ngẽma nachixü̃anewa ngupetüxü̃. Rü ngẽxguma norü duü̃xü̃gü namaxã idexagügu rü tá mea nüxü̃́ inaxĩnüe. Rü taxũtáma ñu̱xãẽãcü norü duü̃xü̃gümaxã inacua̱xgü, natürü meamare tá namaxã inacua̱xgü. Rü ngẽxguma duü̃xü̃gümaxã yadexagügu rü tá mea nango̱x i norü dexa.
4 Nüü̃ nadau 32:3
5 Rü duü̃xü̃gü rü taxũtáma mexü̃ i duü̃xü̃ãcüma nanaxugü i ngẽma chixexü̃gu maxü̃xü̃. Rü ngẽma dauxcüraxü̃wa̱xexü̃ rü taxũtáma ñoma duü̃xü̃ i mexü̃ãcüma namaxã nixĩgü.
6 Erü ngẽma duü̃xü̃ i chixexü̃gu maxü̃xü̃ rü chixexü̃maxã nidexa rü ñu̱xũchi naãẽwa rü chixexü̃ i ĩnügu narüxĩnü. Rü naxca̱x nadau nax namáetaxü̃ rü Cori ya Tupanachiga doraxü̃ nixu. Rü tama ta̱xacü tümamaxã nangau ya yíxema taiyaxe, rü tama tüxü̃ naxaxẽxẽ ya yíxema ita̱xawaxe.
7 Rü ngẽma dauxcüraxü̃wa̱xexü̃ rü womüxẽẽgu namaxü̃ rü ngẽma nagu naxĩnüxü̃ nixĩ nax chixexü̃ naxüxü̃. Rü ãẽ̱xgacüpe̱xewa doramaxã tüxü̃ nachixechigaxẽxẽ ya yíxema ngearü diẽruã̱xgüxe rü yíxema ngü̃xẽẽca̱x ícaxaxe.
8 Natürü ngẽma duü̃xü̃ i mexü̃gu rüxĩnüxü̃ rü mexü̃ i ĩnügü nüxü̃́ nangẽxma. Rü ngẽma mexü̃ i nagu naxĩnüxü̃ rü taguma nüxü̃ narüxo.
Guxchaxü̃gü tá ínangu naxca̱x i ngexü̃gü i rüchomaregüxü̃ i Yerucharéü̃cüã̱xgü
9 Rü pemax, Pa Ngexü̃gü i Rüchomaregüxü̃x, ¡rü iperüxĩnüe i ngẽma tá pemaxã nüxü̃ chixuxü̃! Pa Ngexü̃gü i Taxuguma Rüxĩnüexü̃x, ¡dücax, mea perüxĩnüe i chorü ore!
10 Ñu̱xma rü petaãẽgü, natürü wüxi ya taunecüarü yexeraguwena tá pexoegaãẽgü, erü nigu̱xgü tá i nanetügüarü buxgü rü marü taxũtáma úba pibuxgü.
11 Rü pemax nax iperüchomarexü̃ rü taxuguma perüxĩnüexü̃, ¡ẽcü perü muü̃maxã pidu̱xru̱xex! ¡Rü ípecu̱xü̃ i pexchirugü, rü naxchiru i témüxü̃gu picu̱xgü nax ngẽmaãcü penawéxü̃ca̱x nax ngúxü̃ pingegüxü̃!
12 ¡Perümaãchitanü rü pexauxe naxca̱x i perü naanegü ga noxri mexü̃ rü perü úbanecügu ga noxri oxochiréxü̃!
13 Rü chauchixü̃anearü naanegüwa rü tá narüxügü i tuxugü rü chixexü̃ i maxẽgü. Rü yima ĩane ga noxri taãxẽ nawa yexmanewa rü guxü̃nema ya ĩpatagü ga noxri taãxẽ nawa yexmanewa rü tuxugü rü maxẽgü i chixexü̃ tá nawa narüxügü.
14 Rü yima ãẽ̱xgacüpata rü ngéma tá nata̱xmare. Rü yima ĩane ga noxri muxü̃ma i duü̃xü̃gü nawa maxẽne rü tá nachianemare. Rü ngẽma norü poxeguxü̃tápü̱xgü rü guxü̃gutáma ngéma nawogümare. Rü ngéma rü taãẽãcü tá namaxẽ i búrugü i tama iyapuexü̃ rü ñu̱xũchi ngéma tá nachibüe i naxü̃nagü.
15 Rü ngẽmawena ya Cori ya Tupana rü tá tatanüwa nanamu i Naãxẽ ya Üünecü. Rü ngẽxguma i ngẽma naane i taxuxü̃ma i nanetü i mexü̃ nawa rüxüxü̃ rü tá naane i mexü̃xü̃ nananguxuchi. Rü ngẽma naanewa rü tá yexeraãcü name i nanetü.
16 Rü ngẽma nachixü̃anewa rü guxü̃watama i duü̃xü̃gü rü we̱xgu tá namaxẽ rü tá aixcüma nügümaxã namecümagü.
17 Rü ngẽma nax mea nügümaxã inacuáexü̃ i duü̃xü̃gü rü nataxutama i nu. Rü duü̃xü̃gü rü tá nataãẽgü rü guxü̃gutáma nügüxü̃́ nayaxõgü.
18 Rü ngẽma chorü duü̃xü̃gü rü wüxi i nachica i nu nawa taxuxü̃gu tá naxãchiü̃gü. Rü ĩpatagü ya itaixü̃newa tá namaxẽ. Rü yima ĩpatagüwa rü tá nataãẽgü.
19 32:19-20 Rü woo taxü̃ i gáuxü̃pütagü rüyixgu rü perü naixnecüxü̃ nachixexẽẽãgu, rü woo perü ĩanegu napogüegu, natürü i pema rü tá petaãẽ rü taxü̃ i dexá íngexmaxü̃gu tá petoegü. Rü ngéma tá penachibüexẽxẽ i perü woca rü perü búru.
20 Nüü̃ nadau 32:19
