Isaías 33:1-24
33 Pa Achíriaanex, wüxi i ngechaü̃ tá nixĩ i cuxca̱x. Cuma rü cunadaiãcu i togü i ĩanegü, natürü taguma togü curü ĩane nadaiãcu. Cuma rü cutogüechitawa̱xe, natürü taguma togü nacuechitawa̱xegü. Natürü nawena nax togüxü̃ cuda̱i̱xü̃ rü cuma rü tá ta cuxü̃ nima̱xgü. Rü nawena nax cutogüechitawa̱xexü̃ rü cuma rü tá ta nacuechitawa̱xegü.
2 Pa Cori ya Tupanax, ¡ẽcü cuxü̃́ tangechaü̃tümüü̃gü i toma nax cuxme̱xwa tangexmagüxü̃! Rü tanaxwa̱xe i guxü̃guma pa̱xmama toxü̃ curüngü̃xẽxẽ. Rü tanaxwa̱xe nax torü poxü̃ruxü̃ quixĩxü̃ i ngẽxguma guxchagü toxca̱x ínguxgu.
3 Rü ngẽxguma duü̃xü̃gü nüxü̃ ĩnüegu nax poxcu namaxã cuxueguxü̃ rü nibuxmü. Rü ngẽxguma curü pora nüxü̃ cuwe̱xgu rü nachixü̃anegüarü duü̃xü̃gü rü nügü nawoone.
4 Rü yema yemaxü̃gü ga togü ga nachixü̃anena napuxü̃xü̃ ga Achíriaanecüã̱x, rü norü uanügü rü tá ñoma munügü i muxuchixü̃rüxü̃ naétügu nayi nax nüxna napuxü̃ãxü̃ca̱x i ngẽma ngẽmaxü̃gü.
5 Nüma ya Cori ya Tupana ya Guxãétüwa Ngẽxmacü rü daxũguxü̃ i naanewa nixĩ i nangẽxmaxü̃. Rü nüma nixĩ i mugü i we̱xguxü̃ rü aixcüma mexü̃ Chióü̃arü duü̃xü̃güca̱x naxueguxü̃.
6 Rü nüma ya Cori ya Tupana rü guxü̃gutáma cuxna nadau. Rü yíxema tümaãẽxü̃ cuáxe rü cua̱x tüxü̃́ ngẽxmaxe, rü ngẽma rü wüxi i tümaarü meruxü̃ i maxü̃wa tüxü̃ gaxü̃ nixĩ. Rü ngẽma nax Cori ya Tupanaga taxĩnüxü̃ rü wüxi i tümaarü meruxü̃ nixĩ.
7 Dücax, ñuxãcü ĩanearü namagüwa aita naxüexü̃ i ngẽma Iraétanüxü̃arü churaragüerugü, rü ñuxãcü norü ngechaü̃maxã naxauxexü̃ i ngẽma ãẽ̱xgacüarü orearü ngeruü̃gü i Achíriaanecüã̱xgüxü̃ rüngüxmüxẽẽchaü̃güxü̃.
8 Rü ngẽma namagü rü düxwa nangeãcumare rü taxuxü̃ma nagu naxĩ. Rü yema Achíriaanemaxã namexẽẽgüxü̃ nax tama Yerucharéü̃ca̱x íyaxü̃ãchixü̃ca̱x rü tama nayanguxẽxẽ. Rü taxúega naxĩnüe i ngẽma Achíriaanecüã̱xgü.
9 Rü Iraétanüxü̃ rü namae erü ngechaü̃wa nangẽxmagü. Rü Líbanuarü naixnecügü rü nipagü. Rü Charóü̃arü metachinüxü̃ rü naxnücüanexü̃ nayanguxuchi. Rü Bacháü̃wa rü ma̱xpǘne ya Carméruwa rü nabáianemare
10 Rü nüma ya Cori ya Tupana rü ñanagürü: —Ñu̱xma rü tá chayanguxẽxẽ i ngẽma nüxü̃ chixuxü̃ rü tá ichanawe̱x i chorü pora.
11 Rü ngẽma perü ĩnügü, rü ngẽma perü puracügü i pexüxü̃ rü chope̱xewa rü ñoma maxẽ ya ipagücürüxü̃ rü ñoma guxchirerüxü̃ nixĩgü. Rü choma rü chorü cuemaxã tá chayagu.
12 Rü ngẽma Achíriaanecüã̱xgü rü tá nixae. Rü ñoma tuxu i daxü̃güxü̃ i üxüwa iwocuxü̃rüxü̃ tá nixĩgü.
13 Rü pema i Achíriaanecüã̱xgü i yáxü̃wa ngẽxmagüe, ¡rü nüxü̃ pedau i ngẽma chaxüxü̃! Rü pema ya Iraétanüxü̃ i ngaicamawa ngẽxmagüxe, ¡rü nüxü̃ picua̱xãchitanü i chorü pora! —ñanagürü.
14 Rü Chióü̃wa nidu̱xruxe i ngẽma chixexü̃gu maxẽxü̃. Rü ngẽma tama yaxõgüxü̃ rü poraãcü namuü̃e rü ñanagürügü: —¿Texé chi i tatanüwa tamaxama naétüwa ya yima üxü ya tüxü̃ iguxü̃ne ya guxü̃guma inaiechane? —ñanagürügü.
15 33:15-16 Rü yíxema aixcüma mea maxü̃́xẽ, rü yíxema aixcümaxü̃ ixúxe, rü yíxema tama womüxẽẽãcü tügü muarü ngẽmaxü̃ã́xẽ, rü yíxema tama nayauxtanüxẽ i guxchaxü̃arü mexẽxẽ, rü yíxema tama naga ĩnüxe i ngẽma tümamaxã máetagüchaü̃xü̃, rü yíxema chixexü̃cha̱xwa ixũgachixe, rü yíxema tá tixĩ ya aixcüma maxü̃́xẽ rü tüxü̃́ nangẽxmaxẽ i tümaarü cu̱xchicaxü̃ i nutanaxca̱x, rü guxü̃gutáma taxãwemü rü tagutáma nataxu i tümaarü dexá.
16 Nüü̃ nadau 33:15
17 Rü wenaxarü tá nüxü̃ pedau ya ãẽ̱xgacü ya norü ãẽ̱xgacüchirugu icúcü. Rü ngẽma norü üyeanegü i tachixü̃ane rü yáxü̃wa nangu.
18 Rü ngẽxguma nüxna pecua̱xãchiegu ga yema muü̃ ga pexü̃́ yexmaxü̃ ga yexguma Achíriaanecüã̱x pexca̱x íyaxüãchigu, rü ñapegürü tá: —¿Ngexü̃ yixĩxü̃ ga yema ngĩrü ugüruxü̃ ga yéma diẽru ga Achíriaaneaxü̃́ ngĩxü̃ ixütanücü? ¿Rü ngexü̃ nixĩ ga yema úiruarü yaarü ngugüruxü̃? ¿Rü ngexü̃ nixĩ ga yema Yerucharéü̃arü dauxü̃taechicagü i taxü̃nearü ugüruxü̃? —ñaperügü tá.
19 Rü marü taxũtáma wena nüxü̃ pedaugü i ngẽma Achíriaanecüã̱xgü i chixexü̃gu maxẽxü̃ i tama nagaxü̃ pecuáxü̃ rü to i naga i tama nüxü̃ icuáxü̃wa idexagüxü̃.
20 Rü dücax, ¡nüxü̃ pedau ya Chióü̃ ya yima ĩane i ngextá tórü petagü i üünegüxü̃ nawa ixügüxü̃ne! Rü pexetügümaxã tá nüxü̃ pedau ya Yerucharéü̃ ya ĩane ya taãẽne. Rü ñoma wüxi ya ĩpata ya naxchirunaxca̱x ya mexü̃nerüxü̃ tá nixĩ. Rü yima naixmena̱xãgü i natü̱xü nagu ngagüxü̃ rü taxũtáma ínayangogü rü natü̱xügü rü taxũtáma nicauyegü.
21 Rü nüma ya Cori ya Tupana rü Yerucharéü̃wa tá inanawe̱x i norü pora. Rü nüma ya Tupana rü ñoma natügü i tacutüxü̃ rü poraü̃chíüxü̃rüxü̃ nixĩ. Rü ngẽma tórü uanügü rü taxucürüwa norü wapurugü ya iporanemaxã nagu nachocu nax tatanüwa nangugüxü̃ca̱x.
22 Erü nüma ya Cori ya Tupana rü tórü guxchaxü̃güarü mexẽẽruxü̃ nixĩ. Rü nüma nixĩ i tamaxã inacuáxü̃. Rü nüma nixĩ i tórü ãẽ̱xgacü yixĩxü̃. Rü nüma nixĩ i tórü poxü̃ruxü̃ yixĩxü̃.
23 Rü tórü uanügüarü wapurugüarü naxchirutachinüpaweru rü íyangogügu i natü̱xügü rü tá niwa̱x i ngẽma napáweru. Rü ngẽma naxchirutachinügü i namaxã yaxĩxü̃ rü taxũtáma nitexechigü rü taxucürüwa ngextá naxĩ. Rü ngẽma wapurugüarü ngẽmaxü̃gü i tatanüxü̃ rü Iraétanüxü̃ tá nüxna nanapuxü̃ rü nügü tá nayanu. Rü woo i ngẽma chixeparagüxü̃ rü tá nayana i ngẽma ngẽmaxü̃gü.
24 Rü ngẽma ngunexü̃gügu rü taxúxetáma ya Yerucharéü̃cüã̱x rü ñatagürü: —Chidaxawe —ñatagürü. Rü ngẽma Chióü̃cüã̱xarü pecadugü rü nüma ya Cori ya Tupana rü tá nüxü̃́ nüxü̃ narüngüma.
