Isaías 34:1-17
34 ¡Pa Guxü̃ma i Nachixü̃anecüã̱x, dücax, nua pexĩ rü iperüxĩnüe i ngẽma tá pemaxã nüxü̃ chixuxü̃! ¡Rü nüxü̃ naxĩnü i ñoma i naane rü guxü̃ma i nawa ngẽxmagüxü̃! ¡Rü nüxü̃ naxĩnü i guxü̃ma i naane rü guxü̃ma i ngẽma nawa yaexü̃!
2 Erü nüma ya Cori ya Tupana rü guxü̃ma i nachixü̃anegümaxã nanu. Rü ngẽxgumarüxü̃ ta namaxã nanu i guxü̃ma i norü churaragü. Rü ngẽmaca̱x namaxã nanaxuegu nax nadaiaxü̃ nax nayuexü̃ca̱x.
3 Rü ngẽma yuexü̃ rü ngéma tá nawogümare. Rü ngẽma naxü̃negü rü tá nanayixanexẽẽgü. Rü nagü rü ma̱xpǘnegüwa tá narüyáü̃gü.
4 Rü yimá üa̱xcü rü tauemacü rü ẽxtagü rü tá inadexgü. Rü ngẽma ya̱u̱xtüweanexü̃ rü ñoma wüxi i poperarüxü̃ tá nadixcumü. Rü yima ẽxtagü rü tá narüyi. Rü ñoma úbaatügü i paxü̃ rüyi̱xü̃rüxü̃ tá nixĩgü. Rü ngẽma iguatügü i paxü̃ rüyi̱xü̃rüxü̃ tá nixĩgü.
5 Rü daxũwa tá nango̱x i Cori ya Tupanaarü tara. Rü natanügu tá nangu i Edóü̃anearü duü̃xü̃gü ya Tupana yu namaxã ueguxü̃.
6 Rü ngẽma Cori ya Tupanaarü tara rü nagümaxã tá nadutachinü rü chíxü̃maxã tá niyi̱xatachinücüxü. Rü ñoma ngẽxguma ãmareruxü̃ carnéruxacügü rü chíbuxacügü idaixgurüxü̃ tá nixĩ. Rü nüma ya Cori ya Tupana rü ĩane ya Bochráwa wüxi i ãmare tá nigu, rü Edóü̃anewa rü muxü̃tama i duü̃xü̃güxü̃ tá nadai.
7 Rü ngẽma ãẽ̱xgacügü i Edóü̃cüã̱xgü rü tá nadai ñoma wocagü iyatüxü̃ daiwa nagagüxü̃rüxü̃. Rü ñoma wocaacügürüxü̃ rü wocagü iyatüxü̃rüxü̃ tá nayue i ngẽma Edóü̃cüã̱xgü rü waixü̃mü rü tá nagümaxã nawaiane rü waixü̃müte̱xe rü norü chíxü̃maxã tá guxü̃wama niwaite̱xe.
8 Rü ngẽma ngunexü̃gu tá nixĩ ya Cori ya Tupana inapoxcueãxü̃ i Edóü̃cüã̱xgü. Rü yimá taunecügu rü Tupana tá Iraétanüxü̃xü̃ naxütanü naxca̱x ga yema chixexü̃ ga Edóü̃cüã̱xgü Chióü̃wa ügüxü̃.
9 Rü ngẽma Edóü̃anearü natüxacügü rü o̱xwücharaxü̃ tá nayanguxuchigü. Rü ngẽma norü waixü̃müchicute̱xe rü achúfrexü̃ tá nayanguxuchi. Rü ngẽma waixü̃mü rü ñoma o̱xwüchararüxü̃ tá ninai.
10 Rü woo ngunecü rü chütacü rü tagutáma nixo, rü guxü̃gutáma ngéma nicaixqueecha. Rü ngẽma naane rü mucüma ya taunecü tá ngéma natáechamare, rü taxúetama wena ngéma taxüpetü.
11 Rü cüchanagü rü murutucugü rü tá nawa namaxẽ. Rü ngẽxma tá nixãxchiaü̃gü i ngurucugü rü murutucugü. Rü nüma ya Cori ya Tupana rü tá chianexü̃xü̃ nayangucuchixẽxẽ i ngẽma nachixü̃ane.
12 Rü tagutáma wena nüxü̃́ nangẽxma i wüxi i ãẽ̱xgacü i namaxã icuáxü̃. Rü guxü̃táma i ngẽma norü ãẽ̱xgacügü rü inarütaxu.
13 Rü yima ãẽ̱xgacüpatagüwa rü chuchuxü̃gü tá nawa narüxügü. Rü yima churaragüpataü̃güwa rü chixexü̃ i natüanegü rü tuxugü tá nawa narüxügü. Rü wüxi i nachica i airugü i naixnecücüã̱x rü abetrú nawa maxẽxü̃ tá nixĩ.
14 Rü ngẽma queturegü rü airugü i dauchitacüã̱xmaxã tá naxãmücügü. Rü ngẽma chíbugü rü nügüca̱x tá nacagü. Rü ngéma tá namaxẽ i werigü i chütacü naxüanexü̃ rü ngẽxma tá nüxü̃ nayangaugü i nachica i nagu nangü̃güxü̃.
15 Rü ngẽxma tá nixĩ i naxãxchiaü̃xü̃ rü inayicharaü̃xü̃ i ngẽma cüchana. Rü ngéma tá nixĩ i nayaexacüxü̃ rü tüxna nadauxü̃ ya yíxema naxacügü. Rü ngéma tá ta nixĩ i namaxẽxü̃ i ĩyügü, rü ngẽma ĩyügü rü wüxichigü i yatüxü̃ rü norü ngexemaxã tá nixãmücüchigü.
16 ¡Rü ngẽma Cori ya Tupanaarü orewa pengúe! Rü taxũtáma wüxi i ngẽma naeü̃gü rü ngéma nangeéga, rü taxuxü̃táma nayangemücü i ngexewa. Erü nümatama ya Cori ya Tupana rü ngẽmaãcü nanaxwa̱xe, rü wüxi cue ñaxü̃maxã tá nixĩ i wüxiwa nagagüãxü̃.
17 Rü wüxichigü i ngẽma naeü̃gü rü namaxã nüxü̃ nixunetachigü i nachicachigü. Rü yima naxme̱xmaxã nixĩ i nüxü̃ yaxunetachigüxü̃ i ngẽma naanechigü. Rü guxü̃gutáma ngéma nangẽxmagüecha, rü ñu̱xũchi guxü̃gutáma ngéma namaxẽ.
