Isaías 35:1-10
35 35:1-2 Ngẽma chianexü̃ i pamarexü̃ i taxúema íxãpataxü̃wa rü wenatáxarü nawa nangẽxma i taãxẽ. Rü ngéma chianexü̃wa tá narüxügü i putüragü i líriugü rü guxü̃watáma nangẽxma i taãxẽ. Rü nüma ya Cori ya Tupana rü wenatáxarü nanamexẽxẽ i Iraéane i chianexü̃, rü ñoma Líbanuanerüxü̃ tá namexẽchi. Rü ñoma Carméruane i mexechixü̃rüxü̃ rü Charóü̃arü metachinüanerüxü̃ rü ngẽma Iraéanewa tá nabaxca i nanetügü. Rü guxãtáma nüxü̃ tadaugü i Cori ya Tupanaarü pora rü ñuxãcü nax namexẽchixü̃ i nümax.
2 Nüü̃ nadau 35:1
3 Rü ngẽma turaexü̃ ¡rü penaporaãchitanüxẽxẽ! Rü ngẽma ipaexü̃ ¡rü nüxü̃ perüngü̃xẽxẽ!
4 Rü ngẽma muü̃exü̃ rü nüxü̃ ñapegügü: —¡Piporae, rü taxṹ i pemuü̃exü̃! Rü daa nixĩ ya perü Tupana nax pexü̃ ínapoxü̃xü̃ca̱x. Rü nüma tá nanapoxcue i perü uanügü i guxchaxü̃ pexca̱x íngu̱xẽẽxü̃ —ñapegügü.
5 Rü ngẽma ngunexü̃gu rü ngẽma ingexetüxü̃ rü tá nidauuchitanü, rü ngẽma ingauchiẽxü̃ rü tá ningo̱xnamachixẽgü.
6 Rü ngẽma ibüyeparagüxü̃ rü ñoma cowü iyayuxnegüxü̃rüxü̃ tá nayayuxnegü. Rü ngẽma tama idexagüxü̃ rü aita tá naxüe. Rü ngextá taxúema íxãpataxü̃wa i íyapaanexü̃wa rü taxü̃ i dexá tá narüyuxü̃chíxü.
7 Rü ngextá taxúema íxãpataxü̃wa rü naxtaxaxü̃ tá nayanguxuchi. Rü ngẽma naane i paxü̃ rü natüacügümaxã tá nanapa. Rü ngẽma ñu̱xma airugü i dauxchitacüã̱x ímaxẽxü̃wa rü dexnegü tá narüxügü.
8 Ngéma tá nangẽxma i wüxi i nama i “Nama i Üünexü̃gu” ãégaxü̃. Rü yíxema tama Tupanape̱xewa tügü mexẽẽ́xe rü taxucürüwa nagu tixũ. Rü ngẽxgumarüxü̃ ta i ngẽma chixexü̃arü üruü̃gü rü taxucürüwa nagu naxĩ.
9 35:9-10 Ngẽma namawa rü nataxutama i leóü̃gü, rü nataxutama i aigü i düraexü̃ i tüxna nangaicamagüxü̃. Rü ngẽma namagu tá nawoegu i ngẽma duü̃xü̃gü i Cori ya Tupana ínguxü̃xẽẽxü̃ norü uanügüme̱xẽwa. Rü taãẽxü̃ i wiyaegümaxã tá Chióü̃gu nachocu, rü guxü̃gutáma ngéma nataãẽgüecha. Rü ngéma rü marü nataxutama i axu rü ngúxü̃, rü taãẽxicatatama nangẽxma.
10 Nüü̃ nadau 35:9
