Isaías 36:1-22
36 Rü yexguma marü 14 ga taunecü ãẽ̱xgacü yixĩxgu ga Echequía, rü nüma ga Chenáqueri ga Achíriaanearü ãẽ̱xgacü rü norü churaragümaxã guxü̃nema ga ĩanegü ga Yudáanewa yexmagüne ga ípoxegugüneca̱x ínayagoõchi rü nanapuxü̃.
2 Rü nüma ga Achíriaanearü ãẽ̱xgacü rü Láquiwa inanamuãchi ga wüxi ga namücü ga churaragüeru ga Rabachégu ãégaxü̃ namaxã ga muxü̃ma ga norü churaragü ga poraexü̃ nax ãẽ̱xgacü ga Echequíaxü̃ íyadaugüxü̃ca̱x ga Yerucharéü̃wa. Rü yexguma Yerucharéü̃wa nangugügu, rü yema puchu ga ma̱xpǘnewa yexmaxü̃arü ngaicamana nayachaxãchitanü nacüwawa ga yema nama ga yauxchiruchicawa daxü̃.
3 Rü ñu̱xũchi ãẽ̱xgacü ga Echequíaca̱x nangemagü nax namaxã yadexagüxü̃ca̱x. Natürü nüma ga ãẽ̱xgacü rü tama yéma naxũ. Rü nachicüxü yéma nanamugü ga Eriaquíü̃ ga Irichía nane ga ãẽ̱xgacüpatamaxã icuáxü̃, rü Chéna ga ãẽ̱xgacüarü poperana daucü, rü Yoá ga Achá nane ga ãẽ̱xgacüarü ngü̃xẽẽruxü̃ ixĩcü. Rü yéma naxĩ nax yema Achíriaanearü churaragüerumaxã yanadexagüxü̃ca̱x.
4 Rü nüma ga yema Achíriaanearü churaragüeru rü nüxü̃ ñanagürü: —¡Echequíamaxã nüxü̃ pixu i torü ãẽ̱xgacüarü ore i ñaxü̃!: “¿Cuma nagu curüxĩnügu rü tá nangẽxmaxü̃ i cuxü̃ ípoxü̃xü̃ i cho̱xme̱xwa?
5 ¿Rü nagu curüxĩnügu rü ngẽma curü dexagü rü chorü churaragüarü poramaxã nawüxiguxü̃? ¿Rü texéaxü̃́ nixĩ i cuyaxõxü̃ rü ngẽmaca̱x chomaxã cunuxü̃?
6 Rü nüxü̃ chacua̱x nax Equítuanearü ãẽ̱xgacüaxü̃́ nixĩ i cuyaxõxü̃. Rü aixcümaxü̃chi i Equítuanearü ãẽ̱xgacü rü ñoma wüxi i dexnemena̱xã i büyexü̃rüxü̃ nixĩ. Rü ngẽxguma nagu iyauxãchigu rü nagu tangúxme̱x i natüchi. Rü ngẽxgumarüxü̃ nixĩ i Equítuanearü ãẽ̱xgacü i Faraóü̃, rü guxchaxü̃ tümaca̱x ínanguxẽxẽ ya guxãma ya yíxema nüxü̃́ yaxõgüxe.
7 Rü ngẽxguma tá choxü̃ ñacuxgu: ‘Toma rü torü Cori ya Tupanaaxü̃́ nixĩ i tayaxõgüxü̃’, ñacuxgu. ¿Ẽ̱xna tama nüma ga Echequía yixĩxü̃ ga iyanaxoxẽẽgüaxü̃ ga yema togü ga nachicagü ga Tupanaxü̃ nawa yacua̱xüü̃güxü̃, rü yema Tupanaarü ãmarearü guruü̃gü, rü ñu̱xũchi Yudáanecüã̱xgü rü Yerucharéü̃cüã̱xgü ga duü̃xü̃güxü̃ namuxü̃ nax wüxitama i ãmarearü guruü̃wa Tupanaxü̃ yacua̱xüü̃güxü̃ca̱x?” —ñanagürü ga Achíriaarü churaragüeru.
8 Rü ñu̱xũchi ñanagürü: —Chorü cori ya Achíriaanearü ãẽ̱xgacü rü wüxi i uneta cumaxã naxü. Choma rü tá 2,000 i cowarugü cuxna chamugü ega cuxü̃́ nangẽxmagu i 2,000 i churaragü i cowarumaxã icua̱xgüxü̃.
9 Cuma rü tama cupora nax cuyañaxẽẽxü̃ i woo i ngẽma Achíriaanearü churaragüeru i natüxü̃waama üxü̃. ¿Ẽ̱xna nagu curüxĩnü nax Equítuanewa naxca̱x ícuca̱xaxü̃ i cowarugü rü churaragü i ngẽma cowarugümaxã icua̱xgüxü̃?
10 ¿Ẽ̱xna cuma nagu curüxĩnü nax tama Cori ya Tupanaarü ngü̃xẽẽmaxã yixĩxü̃ nax nua chaxũxü̃ nax naxca̱x íchayagoxõchixü̃ca̱x rü chanadaiãcuxü̃ca̱x i ñaa nachixü̃ane? Rü nüma ya Cori ya Tupana nixĩ i choxü̃ namuxü̃ nax naxca̱x íchayagoxõchixü̃ca̱x rü chanadaiãcuxü̃ca̱x —ñanagürü.
11 Rü Echequíaarü ngü̃xẽẽruü̃gü ga Eriaquíü̃, rü Chéna, rü Yoá rü yema Achíriaanearü churaragüeruxü̃ nangãxü̃gagü rü nüxü̃ ñanagürügü: —Cuxna naxca̱x taca nax Araméutanüxü̃gawa tomaxã quidexaxü̃, erü ngẽma nixĩ i nüxü̃ tacuáxü̃. ¡Rü taxṹ i Ebréugawa tomaxã quidexaxü̃ i cumax! Erü guxü̃ma i ngẽma duü̃xü̃gü i ĩanearü poxeguxü̃arü dauxü̃wa irüdaunüxü̃ rü nüxü̃ naxĩnüe —ñanagürügü.
12 Natürü nüma ga Achíriaanearü churaragüeru rü nanangãxü̃ rü ñanagürü: —Ngẽma Achíriaanearü ãẽ̱xgacüarü ore rü tama perü corimaxã rü bai i pemaxã nüxü̃ chixuxü̃ca̱x yixĩxü̃ nax nua choxü̃ namuxü̃. Natürü ngẽma duü̃xü̃gü i yea ĩanearü poxeguxü̃arü dauxü̃wa irüdaunüxü̃gümaxã nixĩ i nüxü̃ chixuxü̃, erü nümagü tá nixĩ i pexrüxü̃ naü̃ nangõ̱xgüxü̃ rü naxü̱̃xü̃wa naxaxegüxü̃ —ñanagürü.
13 36:13-14 Rü yexguma ga yema Achíriaanearü churaragüeru rü inachi rü tagaãcü Ebréugawa ñanagürü: —¡Nüxü̃ pexĩnüe ya yimá Achíriaanearü ãẽ̱xgacü ya poracü pemaxã nüxü̃ ixuxü̃! Rü nüma rü ñanagürü: “¡Taxṹ i pegü penawomüxẽẽxü̃ i Echequía! Nüma rü taxũtáma cho̱xme̱xwa pexü̃ ínanguxü̃xẽxẽ”, ñanagürü.
14 Nüü̃ nadau 36:13
15 36:15-16 Rü ngẽxguma Echequía pexü̃ yaxõgüxẽẽchaü̃gu nax Cori ya Tupanaaxü̃́ peyaxõgüxü̃ca̱x, rü pexü̃ ñaxgux: “Nüma ya Cori ya Tupana rü aixcüma tá tüxü̃ ínanguxü̃xẽxẽ, erü tama nanaxwa̱xe nax Achíriaanearü ãẽ̱xgacüme̱xẽgu nanguxü̃ ya daa ĩane”, ñaxgu, ¡rü taxṹ i naga pexĩnüexü̃! Rü nüma ya yimá Achíriaanearü ãẽ̱xgacü rü nua choxü̃ namu nax pemaxã nüxü̃ chayarüxuxü̃ca̱x nax namaxã perüngüxmüexü̃ca̱x rü naxme̱xwa pegü pengẽxmagüxẽẽxü̃ca̱x. Rü ngẽmaãcü i wüxichigü i pema rü tá penangõ̱x i ngẽma norü úbanecüarü o, rü norü igunecüarü o rü ñu̱xũchi ngẽma noxrütama puchuwa ngẽxmaxü̃ i dexáwa tátama pexaxegü.
16 Nüü̃ nadau 36:15
17 Rü ngẽmawena rü wüxi i nachixü̃ane i pechixü̃anerüxü̃ ixĩxü̃wa tá pexü̃ nagagü. Rü ngẽma nixĩ i wüxi i nachixü̃ane i ngextá trigunecügü nawa ngẽxmaxü̃ nax penaxüxü̃ca̱x i perü paũ rü úbanecügü nawa ngẽxmaxü̃ nax penaxüxü̃ca̱x i perü bínu.
18 Rü ngẽxguma Echequía pexü̃ ngẽma ñaxgux nax Cori ya Tupana tá pexü̃ ínguxü̃xẽẽxü̃ rü ¡taxṹ i naga pexĩnüexü̃ nax pexü̃ nawomüxẽẽxü̃! Rü dücax, rü natanüwa ga guxü̃ma ga yema togü ga nachixü̃anegü ¿rü ngexü̃rüxüxü̃ ga yema nachixü̃anegüarü tupanagü rü napora nax Achíriaanearü ãẽ̱xgacüme̱xẽwa pexü̃ ínapoxü̃xü̃?
19 ¿Rü ngexü̃gü nixĩ i ngẽma tupanagü i Amáxanecüã̱güxarü, rü Arpáxanecüã̱xarü, rü Cheparabaíü̃anecüã̱xgüarü, rü Énaanecüã̱xgüarü rü Íbaanecüã̱xgüarü? ¿Rü yema tupanagü rü nüxü̃́ natauxchaxü̃ yixĩxü̃ ga cho̱xme̱xwa nax ínanguxuchixẽxẽãxü̃ ga ĩane ga Chamária?
20 Rü dücax, rü natanüwa ga guxü̃ma ga yema togü ga nachixü̃anegüarü tupanagü ¿Rü ngexü̃rüüxü̃ yixĩxü̃ ga nachixü̃anexü̃ cho̱xme̱xwa ípoxü̃xü̃? ¿Rü tü̱xcüü̃ i ñu̱xma i nagu perüxĩnüexü̃ rü Cori ya Tupana tá yixĩxü̃ ya cho̱xme̱xwa ínapoxü̃cü ya Yerucharéü̃? —ñanagürü ga yema Achíriaanearü churaragüeru.
21 Rü yema duü̃xü̃gü rü nachianegümare, rü taxuxü̃ma ga oremaxã nanangãxü̃gü, yerü ga ãẽ̱xgacü ga Echequía rü nüxü̃ yema ñanagürü nax taxumaama nangãxü̃gagüaxü̃ca̱x.
22 Rü yexguma ga Eriaquíü̃ ga Irichía nane ga ãẽ̱xgacüpatamaxã icuácü rü Chéna ga ãẽ̱xgacüarü poperagüna daucü rü Yoá ga Achá nane ga ãẽ̱xgacüarü ngü̃xẽẽruxü̃ ixĩcü rü nanaxĩ̱xãchiãẽgü rü nügü narügáutechirugü. Rü ãẽ̱xgacü ga Echequíaxü̃tawa naxĩ nax namaxã nüxü̃ yanaxugüexü̃ca̱x ga yema Achíriaanearü churaragüeruarü ore.
