Isaías 37:1-38
37 Rü yexguma yemaxü̃ naxĩnügu ga gumá ãẽ̱xgacü ga Echequía rü nügü narügáutechiru. Rü norü ĩ̱xãchiãẽmaxã nagu nicu̱x ga wüxi ga naxchiru ga témüxü̃ rü yemaacü Tupanapata ga taxü̃newa naxũ.
2 Rü nüma ga ãẽ̱xgacü rü nanamu ga Eriaquíü̃ ga ãẽ̱xgacüpatamaxã icuácü rü Chéna ga ãẽ̱xgacüarü poperagüna daucü rü yema chacherdótegü ga rüyamaegüxü̃ nax nümagü rü ta naxchiru ga témüxü̃gu yacu̱xgüxü̃ca̱x. Rü yemaacü orearü uruxü̃ ga Ichaía ga Amú nanexü̃tawa nanamugü nax namaxã nüxü̃ yanaxugüexü̃ca̱x ga yema guxchaxü̃.
3 Rü Ichaíamaxã nüxü̃ nixugüe ga ãẽ̱xgacüarü ore ga ñaxü̃: —Ñu̱xma rü wüxi i taxü̃ma i ãũcümaxü̃wa tangexmagü, rü tórü uanügü rü tamaxã naguxchigagü rü tüxü̃ nacugüe. Rü poraãcü ngúxü̃ tingegü ñoma wüxi i ngexü̃ i ixraxacüchaü̃xü̃ rü turaxü̃rüxü̃.
4 Bexmana nüma ya Cori ya curü Tupana rü marü nüxü̃ naxĩnü i ngẽma ore i nüxü̃ yaxuxü̃ i ngẽma Achíriaanearü churaragüeru i norü ãẽ̱xgacü nua muxü̃ nax Tupana ya Maxü̃cümaxã naguxchigaxü̃. Rü chierüna napoxcuãgu ya curü Cori ya Tupana naxca̱x i ngẽma ore i nümatama nüxü̃ naxĩnüxü̃. Rü ngẽmaca̱x chanaxwa̱xe i toxca̱x cuyumüxẽ i toma nax ítayaxügüxü̃ —ñanagürü ya ãẽ̱xgacü.
5 37:5-6 Rü yema ãẽ̱xgacügü ga Echequíaarü ngü̃xẽẽruü̃gü rü Ichaíaxütawa naxĩ. Rü yexguma Ichaía nüxü̃ ĩnügu ga yema ore rü ñanagürü: —Ãẽ̱xgacü ya Echequíamaxã nüxü̃ pixu rü Tupana rü ñanagürü: “¡Taxṹ i cumuü̃xü̃ naxca̱x i ngẽma ore i chixexü̃ i chauchiga nüxü̃ yaxugüexü̃ i ngẽma norü duü̃xü̃gü i ngẽma Achíriaanearü ãẽ̱xgacü!
6 Nüü̃ nadau 37:5
7 Rü dücax, choma rü tá nüxna chananguxẽxẽ i wüxi i ore i ãũcümaxü̃ i tá nachixü̃aneca̱x natáeguxẽẽxü̃ nax ngẽxma yama̱xgüãxü̃ca̱x” —ñanagürü.
8 Rü nüma ga yema Achíriaanearü churaragüeru rü nüxü̃ nacuáchiga nax gumá norü ãẽ̱xgacü ga Chenáqueri rü marü ínaxũxũxü̃ ga ĩane ga Láquiwa. Rü yemaca̱x ga yema churaragüeru rü nataegu ga Yerucharéü̃wa. Rü nüxü̃ inayangau ga norü ãẽ̱xgacü ga Chenáqueri ga Lixnáca̱x íyagoõchixü̃.
9 37:9-10 Rü yexguma yéma nayexmayane ga nüma ga Achíriaanearü ãẽ̱xgacü rü yéma nüxü̃ naxĩnüchiga nax Etiopíaanearü ãẽ̱xgacü ga Tiráca rü naxca̱x nax ínayagoõchichaü̃xü̃. Natürü nüma ga ãẽ̱xgacü ga Achíriaanecüã̱x ga Chenáqueri rü wenaxarü norü duü̃xü̃güxü̃ namuama nax Yudáanearü ãẽ̱xgacü ga Echequíaxü̃tawa nangegüãxü̃ca̱x ga popera ga ñaxü̃: —Curü Tupana ya nüxü̃́ cuyaxõcü rü cumaxã nüxü̃ nixu ya yima ĩane ya Yerucharéü̃ rü taxũtáma cho̱xme̱xgu nax nanguxü̃. ¡Natürü taxṹ i cugü cunawomüxẽxẽxü̃ ya yimá curü Tupana!
10 Nüü̃ nadau 37:9
11 Cuma rü marü nüxü̃ cucuáchiga ga yema naxügüxü̃ ga tochixü̃anearü ãẽ̱xgacügü namaxã ga guxü̃ma ga yema togü ga nachixü̃anegü ga nada̱i̱xü̃. ¿Rü ñuxãcü i cuma i nagu curüxĩnüxü̃ nax taxũtáma cho̱xme̱xgu nax cunguxü̃?
12 Rü yexguma torü o̱xigü nadaixgu ga yema nachixü̃anegü ga Gocháü̃, rü Aráü̃, rü Réchex rü yema Bex-edéü̃tanüxü̃ ga ĩane ga Teracháxwa maxẽxü̃, ¿rü norü tupanagü yixĩxü̃ ga ínapoxü̃güxü̃?
13 ¿Rü ngexü̃gü yixĩxü̃ i ñu̱xma ga yema norü ãẽ̱xgacügü ga guma ĩane ga Amá, rü Arpáx rü Cheparabaíü̃, rü Ená rü Ibá? —ñanagürü.
14 Rü yexguma Echequía nayaxugu ga yema popera ga Achíriaanearü ãẽ̱xgacüarü ngü̃xẽẽruü̃gü yéma ngẽgüxü̃, rü nüxü̃ nadaumatü. Rü ñu̱xũchi Tupanapata ga taxü̃newa naxũ rü yexma Tupanape̱xegu nayaxǘ ga yema popera.
15 37:15-16 Rü ñaãcü yéma nayayumüxẽ: —Pa Corix, Pa Tupana ya Guxãétüwa Ngẽxmacü ya Iraétanüxü̃arü Tupana Ixĩcü i Ñaa Nachica i Üünexü̃wa Ngẽxmacüx, rü cuxicatama nixĩ ya Tupana i norü yora quixĩxü̃ i guxü̃ma i nachixü̃anegü i ñoma i naanewa ngẽxmagüxü̃. Rü cumatama cunaxü ga daxũguxü̃ ga naane rü ñoma ga naane.
16 Nüü̃ nadau 37:15
17 ¡Dücax, Pa Corix, rü choxü̃́ irüxĩnü! ¡Rü nüxü̃ naxĩnü i ngẽma ore i ngẽma ãẽ̱xgacü i Chenáqueri nua chauxü̃tawa muxü̃! Rü guxü̃ma i ngẽma norü oregüwa rü cumaxã naguxchiga, Pa Tupana ya Maxü̃cü.
18 37:18-19 Rü aixcüma nixĩ, Pa Corix, Pa Tupana ga yema nũxcümaü̃xü̃ ga ãẽ̱xgacügü ga Achíriaanecüã̱xgü ga nadaiãcuãxü̃ ga yema nachixü̃anegü rü napuxü̃ãxü̃ ga norü naanegü rü nüxü̃́ ínaguaxü̃ ga yema norü tupananetachicüna̱xãgü. Yerü yema tupananetachicüna̱xãgü rü tama aixcüma tupanagü nixĩ. Rü duü̃xü̃gü nutawa rü naigüwa ügüxü̃ nixĩ. Rü yemaca̱x nixĩ ga nüxü̃́ nagu napogüexü̃ rü ínaguaxü̃.
19 Nüü̃ nadau 37:18
20 Rü ñu̱xmax, Pa Corix, Pa Torü Tupanax ¡rü toxü̃ ínanguxü̃xẽxẽ naxme̱xwa i ngẽma Achíriaanearü ãẽ̱xgacü nax ngẽmaãcü guxü̃ i nachixü̃anegü i ñoma i naanewa ngẽxmagüxü̃ nüxü̃ cua̱xgüxü̃ca̱x nax cuxicatama yixĩxü̃ nax Tupana quixĩxü̃! —ñanagürü ga norü yumüxẽwa.
21 Rü yemawena rü nüma ga Ichaía rü Echequíaca̱x yéma namuga rü ñanagürü: —Nüma ya Iraétanüxü̃arü Tupana rü ñanagürü cuxü̃: “Marü cuxü̃́ nüxü̃ chaxĩnü i ngẽma curü yumüxẽwa chomaxã nüxü̃ quixuxü̃ i Chenáqueri i Achíriaanearü ãẽ̱xgacüchiga”, ñanagürü.
22 Rü ñaagü nixĩ i ngẽma ore ya Cori ya Tupana nüxü̃ ixuxü̃ nachiga i ngẽma Achíriaanearü ãẽ̱xgacü: “Dücax, Pa Chenáquerix, rü yima Tupanaarü ĩane ya Chióü̃arü duü̃xü̃gü rü ñoma wüxi i pacü cuxü̃ cugüxü̃rüxü̃ tá cuxü̃ nacugüe. Rü ngẽxguma nüxna quixũgachigu rü ngẽma Yerucharéü̃cüã̱xgü rü tá nanexáerugüãcüma cugu nidauxcüraxü̃gü.
23 ¿Rü texéchiga nixĩ ga chixri quidexaxü̃ rü texémaxã nixĩ ga cuguxchigaxü̃? ¿Rü texémaxã nixĩ ga quipuraxü̃ rü cunuxetüxü̃? Rü cumaxã nüxü̃ chixu rü chomaxã nixĩ i cunuxü̃ i choma i Iraétanüxü̃arü Tupana ya Üünecü.
24 Rü ngẽma curü orearü ngeruü̃güwa rü chomaxã cuguxchiga rü ñacurügü: ‘Choma rü muxü̃nema ga chorü carugü ga daiwexü̃gümaxã ma̱xpǘnegüétügu chaxĩnagü ñu̱xmata yema pinunecüane ga Líbanuanewa yexmagünewa changu. Rü chayaye ga gumá ocayiwagü ga rümáchanemaegüne rü pinugü ga rümemaegüne. Rü ma̱xpǘnegü ga rümáchanemaegüneétügu chaxĩnagü nawa ga yema norü naixnecü ga mexẽchixü̃ ga ñoma putüraanecürüxü̃ ixĩxü̃.
25 Rü choma rü to ga nachixü̃anegüwa chanaxü ga puchugü rü norü dexáwa chaxaxe. Rü yexguma nawa changaxgu rü chayapagüxẽxẽ ga guxü̃ma ga yema Equítuanearü natügü’, ñacurügü.
26 ¿Natürü tama e̱xna nüxü̃ cucua̱x, Pa Chenáquerix, nax choma yixĩxü̃ ga cuxna chanaxãxü̃ ga pora nax cunaxüxü̃ca̱x ga guxü̃ma ga yema? Rü nũxcümacürüwatama rü marü nagu charüxĩnü i ngẽma ñu̱xma chaxüxü̃. Rü yemaca̱x nixĩ ga cuyanaxoxẽẽgüxü̃ ga guma ĩanegü ga ípoxegugüne rü natüchigüxicatama cuyaxĩxgüxẽẽxü̃.
27 Rü yema norü duü̃xü̃gü ga yema nachixü̃anegü rü cupe̱xewa nügü nicua̱xãchitanü nax naturaexü̃. Rü namuü̃e rü naxãnee. Rü ñoma maxẽ i naanewa rüxüxü̃rüxü̃ nixĩgü rü maxẽ i ngexwaca rüxüxü̃rüxü̃ nixĩgü. Rü ñoma maxẽ i ĩpataétüwa rüxüxü̃ i taxũtáma nayaegu yuexü̃rüxü̃ nixĩgü ga yema duü̃xü̃gü.
28 Pa Chenáquerix, choma rü meama nüxü̃ chacua̱x nax ngextá ne cuxũxü̃ rü ngextá cuxũxü̃. Rü nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x nax chomaxã cunuxü̃.
29 Rü ngẽma nax poraãcü chomaxã cunuxü̃gagu rü cugü ícurütaxü̃gagu rü choma rü tá cuxü̃ chichotamaraü̃ rü cuã̱xwa tá chayaxǘcuchi i wüxi i curü chaxãchixẽxẽruxü̃. Rü ngẽma nama i nagu nua cuxũxü̃gu tátama cuxü̃ chataeguxẽxẽ” —ñanagürü ga Tupana.
30 Rü yemawena rü nüma ga Ichaía rü Echequíaxü̃ ñanagürü: —Cumaxã nüxü̃ chixu i wüxi i cua̱xruxü̃ nax ngẽmawa nüxü̃ cucuáxü̃ca̱x nax ta̱xacü tá ngupetüxü̃. Rü daa taunecügu rü yimá nai ya taunecügu rü pema rü tá penangõ̱x i ngẽma trigu i nüechamatama rüxügüxü̃. Natürü yimá norü tomaepü̱x ya taunecügu rü tá petoegü rü peyabuxgü i penetüarü o. Rü tá úbamaxã petoegü rü tá penangõ̱x i norü o.
31 Rü ngẽma Yudáanewa íyaxügüxü̃ i duü̃xü̃gü rü tá nimu ñoma nanetügü i ãxchúmaxãxü̃ rü ixoxü̃rüxü̃.
32 Erü Yerucharéü̃wa tá nangẽxmagü i ñuxre i duü̃xü̃gü i íyaxügüxü̃. Rü yima ma̱xpǘne i Chióü̃wa tá nangẽxmagü i duü̃xü̃gü i tama yuexü̃. Rü nüma ya Cori ya Tupana ya Guxü̃étüwa Ngẽxmacü rü ngẽmaãcü tá pexü̃ narüngü̃xẽxẽ, erü poraãcü pexü̃ nangechaü̃ —ñanagürü ga Ichaía.
33 Rü ñaa nixĩ ya Cori ya Tupanaarü ore i Achíriaanearü ãẽ̱xgacüchiga, rü ñanagürü: —Taxũtáma Yerucharéü̃gu naxücu rü bai tá wüxi i naxne tá inamaxü̃. Rü norü churaragü rü taxũtáma norü poxü̃ruü̃maxã naxca̱x ínayaxüãchi rü taxũtáma yima ĩanearü poxeguxü̃gütapü̱xwa waixü̃mü nügüca̱x nagünagü nax ngẽmawa nachocuxü̃ca̱x.
34 Rü yematama nama ga noxri nagu ne naxũxü̃gutama tá nataegu rü taũtáma nagu naxücu ya daa ĩane. Rü ngẽma nixĩ i chorü ore i cumaxã nüxü̃ chixuxü̃ i choma ya Cori ya Tupana
35 Rü chomatama tá nüxna chadau ya daa ĩane rü tá íchanapoxü̃ erü taguma nüxü̃ charüngüma. Rü nüxü̃ changechaü̃ ya chorü duü̃ ya Dabí rü chayanguxẽxẽ i ngẽma nüxü̃ chixuxü̃ —ñanagürü ga Tupana.
36 Rü yematama chütaxü̃gu rü wüxi ga daxũcüã̱x ga Tupanaarü orearü ngeruxü̃ rü nanadai ga 185,000 ga churaragü ga Achíriaanecüã̱x. Rü yexguma yangunegu rü guxü̃ma nayue.
37 Rü yemaxü̃ nada̱u̱xgu ga Chenáqueri ga Achíriaanearü ãẽ̱xgacü, rü ínayachaxãchi nax Yerucharéü̃xü̃ ínachomaeguãchixü̃. Rü norü ĩane ga Nínibeca̱x nataegu.
38 Rü wüxi ga ngunexü̃gu ga yexguma norü tupana ga Niróxpatawa nüxü̃ yacua̱xüü̃yane, rü Chenáqueri nanegü ga Adamérex rü Charéche rü yéma naxĩ rü nayama̱xgü. Rü nümagü rü Araráanewa nabuxmü. Rü yemawena rü nane ga Echaradóü̃ nanatüchicüxü ãẽ̱xgacüxü̃ ningucuchi.
