Isaías 38:1-22
38 Nüma ga Echequía rü poraãcü nida̱xawe. Rü yemaca̱x ga orearü uruxü̃ ga Ichaía ga Amú nane, rü ínayadau rü ñanagürü nüxü̃: —Cori ya Tupana rü ñanagürü cuxü̃: “¡Ẽcü, namaxã idexa i cuxacügüx, rü yaxucu̱xẽgü nax mea namaxẽxü̃ca̱x i cuwena! Erü ñu̱xma rü taxũtáma cuxca̱x nitaane, rü tá cuyu” —ñanagürü.
2 Rü nüma ga Echequía rü nadixeguãchi rü ĩxtapü̱xguama nabuenü rü ñaãcü nayumüxẽ:
3 —Pa Corix, Pa Tupanax, rü cuxü̃ chaca̱a̱xü̃ nax nüxna cucua̱xãchixü̃ca̱x nax ñuxãcü cuxca̱x chapuracüxü̃ rü guxü̃guma chanaxüxü̃ ga yema cuma namaxã cutaãẽxü̃ —ñanagürü. Rü yema ñaxguwena rü poraãcü naxaxu.
4 Rü yemaca̱x nüma ga Cori ya Tupana rü Ichaíamaxã nidexa rü ñanagürü nüxü̃:
5 —¡Wena íyadau ya Echequía! ¡Rü namaxã nüxü̃ ixu i chorü ore i ñaxü̃: “Yimá Cori ya Tupana ga curü o̱xi ga Dabíarü Tupana rü ñanagürü: ‘Marü cuxü̃́ nüxü̃ chaxĩnü i curü yumüxẽ, rü nüxü̃ chadau i cu̱xgüxü̃etü nax cuxaxuxü̃! Rü cuxü̃́ tá 15 ya taunecü chaxünagü nax cumaxü̃xü̃.
6 Rü choma rü tá cuxü̃ íchapoxü̃ rü tá íchanapoxü̃ ya yima ĩane ya Yerucharéü̃ naxme̱xwa i ngẽma Achíriaanearü ãẽ̱xgacü’ ” —ñanagürü ga Tupana.
7 Rü nüma ga Ichaía rü nanangãxü̃ rü ñanagürü: —Ñaa tá nixĩ i ngẽma cua̱xruxü̃ i nüma ya Cori ya Tupana cuxna ãxü̃ nax nawa nüxü̃ cucuáxü̃ca̱x nax aixcüma tá yanguxẽẽãxü̃ i ngẽma cumaxã inaxunetaxü̃.
8 Rü ngẽma üa̱xcüpechita rü 10 i wüye tá nataegu —ñanagürü. Rü yexguma ga nüma ga Cori ya Tupana rü 10 ga wüye nataeguxẽxẽ ga üa̱xcüpechita nawa ga yema Acháxarü üa̱xcüarü ngugüruxü̃ ga ãẽ̱xgacüpatawa yexmaxü̃.
9 Rü yexguma marü naxca̱x yataanegu ga gumá Yudáanearü ãẽ̱xgacü ga Echequía rü ñaa wiyae naxümatü rü ñanagürü:
10 —Choma rü chaugümaxã ñachagürü: “Taxũtáma nawa nanguyane nax yaxguã̱x chixĩxü̃ rü Tupana chomaxã nanaxuegu nax chayuxü̃ rü ngẽmaãcü yuexü̃tanüwa chayanguxẽẽxü̃ca̱x ya yimá naigü ya taunecü ya choxü̃́ íyaxügücü”, ñachagürü.
11 Rü nagu charüxĩnü nax tagutáma wena Cori ya Tupanaxü̃ chadauxü̃ i ñoma i naanewa. Rü natanüwa i duü̃xü̃gü i ñoma i naanewa maxẽxü̃ rü taguma wena texéxü̃ chadauxü̃.
12 Rü poraãcü nida̱xawe i chauxune rü ngẽma da̱xawe rü nüxna nanayauxchaü̃ i chorü maxü̃. Rü ñoma carnérugüarü dauruü̃güarü düxenürüxü̃ paxaãchiruxü̃ nixĩ i ngẽma chauxune. Rü ñoma naxpüarü muruxü̃, naxpü iyoyexü̃rüxü̃ rü ngẽxma nayacuáxchaü̃ i chorü maxü̃. Rü wüxitama i chütaxü̃gu rü ñu̱xmata yangunemare rü ngúxü̃ choxü̃ quingexẽxẽ rü yuwa choxü̃ cugaxchaü̃.
13 Rü guxü̃ i ngẽma chütaxü̃gu rü choxü̃́ nax nangúxü̃gagu aita chaxü ñoma wüxi i leóü̃ chauxchina̱xãgu wagüxü̃rüxü̃. Rü wüxitama i chütaxü̃gu rü ñu̱xmata yangunemare rü ngúxü̃ choxü̃ quingexẽxẽ rü yuwa choxü̃ cugaxchaü̃.
14 Rü ñoma chirugürüxü̃ rü cówagürüxü̃ rü muxtucugürüxü̃ charüdoxü. Rü yima chauxetügü rü düxwa nipae nax yeü̃cürü daxũ chadawenüxü̃ rü ñachagürü: “Pa Corix, ngúxü̃ chinge. ¡Ẽcü cha̱u̱xca̱x yataanexẽxẽ!” ñachagürü.
15 Natürü ñu̱xma nax nümatama yixĩxü̃ i cha̱u̱xca̱x ínanguxẽẽãxü̃ i ngẽma da̱xawe ¿rü ta̱xacüxü̃ tá namaxã chixuxü̃? Rü ngẽma yaxta rü choxna niña nagagu i ngẽma ngúxü̃ nax chingexü̃. Rü ngẽmaca̱x gucü ya chorü taunecügu rü tá chaugü ícharüxíra nape̱xewa ya Tupana.
16 Rü yíxema Cori ya Tupana tüxna dauxe rü tá tamaxẽ, rü guxü̃ma i ngẽmatanüwa tá nixĩ i chamaxü̃xü̃ i chomax. Rü cuma nixĩ i cha̱u̱xca̱x cuyataanexẽẽxü̃ rü cha̱u̱xca̱x cunataeguxẽẽxü̃ i ngẽma chorü maxü̃.
17 Rü dücax, yema ngúxü̃ ga chingexü̃ rü ñu̱xma rü taãẽxü̃ choxü̃́ nayanguxuchi. Rü cuma nixĩ ga yema ãxmaxü̃ ga ãũcümaxü̃wa nüxna cudauxü̃ ga chorü maxü̃, yerü choxü̃́ nüxü̃ curüngü̃ma ga guxü̃ma ga yema chorü chixexü̃gü.
18 Rü ngẽma tauquegu ta̱xgüxü̃ rü tama cuxü̃ nicua̱xüü̃gü. Rü ngẽma yuexü̃ rü tama cuxü̃ nataxẽẽgü. Rü ngẽma naxmaxü̃wa ngẽxmagüxü̃ rü tama nüxü̃ nixugüe nax cuma rü aixcümacü quixĩxü̃.
19 Rü ngẽma maxẽxü̃xicatama nixĩ i cuxü̃ icua̱xüü̃güxü̃, ñoma ñu̱xma choma chaxüxü̃rüxü̃. Rü ngẽma nanatügü rü nanegümaxã tá nüxü̃ nixu nax aixcüma cuyanguxẽẽxü̃ i ngẽma nüxü̃ quixuxü̃.
20 Rü nüma ya Cori ya Tupana rü nanuxma rü cha̱u̱xca̱x nayataanexẽxẽ. Rü ngẽmaca̱x i ñu̱xma nax imaxẽxü̃gu, rü ngĩxã guxü̃ i ngunexü̃gu Cori ya Tupanapata ya taxü̃newa taxĩ nax ngéma tórü árpamaxã rü wiyaegümaxã nüxü̃ icua̱xüü̃güxü̃ca̱x —ñanagürü ga Echequía.
21 Rü Ichaía rü nanamu nax naxügüãxü̃ ga wüxi ga iguchara. Rü yemamaxã nanachagü ga yema ínataixnaã́xü̃wa ga ãẽ̱xgacü. Rü yemaacü naxca̱x nitaane.
22 Rü nüma ga Echequía rü Ichaíana naca rü ñanagürü: —¿Ta̱xacürü cua̱xruü̃wa tá nixĩ i nüxü̃ chacuáxü̃ nax namexü̃ nax wena Tupanapata ya taxü̃newa chaxũxü̃? —ñanagürü.
