Isaías 39:1-8
39 Rü yema ngunexü̃gügu rü ãẽ̱xgacü ga Baradáü̃ nane ga Merodá-baradáü̃ ga Babiróniaanearü ãẽ̱xgacü ixĩcü rü Echequíaxü̃tawa nanamugü ga norü ngü̃xẽẽruü̃gü nax norü moxẽ yema nangegüxü̃ca̱x rü ãmare nüxna yaxãgüxü̃ca̱x. Yerü nüxü̃ nacuáchiga nax yada̱xawexü̃ natürü marü naxca̱x yataanexü̃.
2 Rü nüma ga Echequía rü meama nanayaxu ga yema ãẽ̱xgacüarü duü̃xü̃gü. Rü nüxü̃ nanawe̱x ga guxü̃ma ga norü yemaxü̃gü ga nüxü̃́ yexmaxü̃ ga diẽrumü, rü úiru, rü pumaragü, rü chíxü̃gü i mexẽchixü̃. Rü yexgumarüxü̃ ta nüxü̃ nanawe̱x ga naxnegüpataxü̃. Rü guxü̃ma ga norü yemaxü̃gü ga ãẽ̱xgacüpatawa yexmagüxü̃ rü nachixü̃anewa yexmagüxü̃ rü nüxü̃ nanawe̱x. Rü taxuxü̃ma inicu̱x.
3 Rü yemawena ga nüma ga orearü uruxü̃ ga Ichaía rü ãẽ̱xgacü ga Echequíaxü̃tawa naxũ rü nüxna nayaca rü ñanagürü: —¿Ngextá ne naxĩ i ngẽma yatügü i cuxü̃tawa ngugüxü̃, rü ta̱xacüxü̃ yixĩxü̃ i cumaxã yaxugüxü̃? —ñanagürü. Rü nüma ga Echequía rü nanangãxü̃ rü ñanagürü: —Ngẽma duü̃xü̃gü rü yáxü̃guxü̃ i nachixü̃ane i Babiróniawa ne naxĩ —ñanagürü.
4 Rü yexguma ga nüma ga Ichaía rü ãẽ̱xgacüna naca rü ñanagürü: —¿Rü ta̱xacü nixĩ ga nüxü̃ nadaugüxü̃ i nua cupatawa? —ñanagürü. Rü nüma ga Echequía rü nanangãxü̃ rü ñanagürü: —Nüxü̃ nadaugü ga guxü̃ma i ngẽmaxü̃gü i chopatawa ngẽxmagüxü̃. Rü guxü̃ma nüxü̃ chawe̱x rü taxuxü̃ma i chorü ngẽmaxü̃gü ichicu̱x —ñanagürü.
5 Rü yexguma ga nüma ga Ichaía rü Echequíaxü̃ ñanagürü: —¡Dücax, irüxĩnü i ñaa ore ya Cori ya Tupana ya Guxãétüwa Ngẽxmacü nua cuxca̱x muxü̃!:
6 “Rü tá ínangu i ngunexü̃gü i nagu ngẽma Babiróniaanecüã̱x tá nadexü̃ i guxü̃ma i ngẽmaxü̃gü ga curü o̱xigü daa ãẽ̱xgacüpatagu nutaque̱xexü̃. Rü tá Babiróniawa nanana, rü taxuxü̃táma nua nayaxüãchi.
7 Rü woo ya cutaagü rü ngéma Babiróniaanewa tá tüxü̃ nagagü rü tá tüxü̃ nicaugüpü̱xücharexe. Rü ngẽmaãcü ãẽ̱xgacüpatawa tá tüxü̃ napuracüexẽxẽ” —ñanagürü.
8 Natürü ga Echequía rü tama poraãcü naxoegaãẽ yerü ñaxü̃gu narüxĩnü: —Ñu̱xma nax chamaxü̃xü̃ rü taxũtáma ngẽma nangupetü —ñaxü̃gu narüxĩnü. Rü yemaca̱x Ichaíaxü̃ nangãxü̃ rü ñanagürü: —Cha̱u̱xca̱x rü name i ngẽma Tupanaarü ore i chomaxã nüxü̃ quixuxü̃ —ñanagürü.
