Isaías 40:1-31
40 Yimá perü Tupana rü ñanagürü: —¡Penataãxẽgüxẽxẽ! ¡Rü penataãxẽgüxẽxẽ i ngẽma chorü duü̃xü̃gü!
2 ¡Rü nüxü̃ pengechaü̃ãcüma ngẽma Yerucharéü̃cüã̱xgümaxã pidexagü! ¡Rü namaxã nüxü̃ pixu nax marü iyacuáxü̃ nax togüme̱xẽwa nangẽxmagüxü̃ rü marü nanaxütanü i norü chixexü̃gü! Rü guxü̃ma ga yema norü chixexü̃ ga naxügüxü̃ca̱x, rü taxree̱xpü̱xcüna nüxü̃ chanaxütanüxẽxẽ —ñanagürü ga Tupana.
3 40:3-4 Rü wüxi i naga nica rü ñanagürü: —¡Cori ya Tupanaca̱x penamexẽxẽ i wüxi i nama i chianexü̃wa dapetüxü̃! Rü ngẽma ínawüxü̃wa ¡rü ipeyanawe̱xãchixẽxẽ! Rü ngẽma ínadoxonexü̃wa ¡rü penagütagü nax mea yawéxü̃ca̱x! Rü ngẽma ínangüchitaeruxü̃wa ¡rü ipeyanawe̱xãchimüanexẽxẽ! Rü ngẽma ínangücureanexü̃wa ¡rü mea penaba̱i̱xmaxẽxẽ!
4 Nüü̃ nadau 40:3
5 Rü ngẽxguma i nüma ya Cori ya Tupana rü tá nügü nango̱xẽxẽ nax ñuxãcü naporaxüchixü̃. Rü guxü̃ma i duü̃xü̃gü rü tá nüxü̃ nadaugü i ngẽma norü pora. Rü Cori ya Tupanatama nixĩ i ngẽma ñaxü̃ —ñanagürü.
6 Rü wüxi i naga rü ñanagürü: —¡Tagaãcü aita naxü! —ñanagürü. Rü choma rü ñachagürü: —¿Ta̱xacüxü̃ tá tagaãcü chixu? —ñachagürü. Rü choxü̃ nangãxü̃ rü ñanagürü: —Guxü̃ma i duü̃xü̃gü rü ñoma natüanerüxü̃ paxaãchitama nixĩ. Rü wüxi i putüra i paxaãchi boxüxü̃rüxü̃ nixĩ.
7 Rü ngẽma natüane rü nipa rü ngẽma putüra rü narüñe̱xẽxẽ ega Cori ya Tupana nagu cue ñaxgu. Rü ngẽxgumarüxü̃ ta nixĩ i duü̃xü̃güarü maxü̃ nax ñoma natüanerüxü̃ paxaãchica̱xmare yixĩxü̃.
8 Rü ngẽma natüane rü nipá rü ngẽma putürachacu rü narüñe̱xẽxẽ. Natürü Tupanaarü ore rü guxü̃gutáma nangẽxmaecha —ñanagürü.
9 Rü ngẽma naga rü ñanagürü: —¡Pa Chióü̃x, wüxi ya ma̱xpǘnechitaerugu naxĩnagü rü tagaãcü naxunagü i ñaa ore i mexü̃! ¡Rü cuma, Pa Yerucharéü̃x, rü tama cumuü̃ãcüma rü tagaãcüma Yudáanearü ĩanegücüã̱xmaxã nüxü̃ ixu i ñaa ore i ñaxü̃: “Nanuxma ya yimá perü Cori ya Tupana”, ñaxü̃! —ñanagürü.
10 Rü marü norü poramaxã ínangu ya Cori ya Tupana, rü guxü̃táma i ngẽma norü poramaxã duü̃xü̃gümaxã inacua̱x. Rü marü ínananguxü̃xẽxẽ rü nanawoeguxẽxẽ i norü duü̃xü̃gü ga norü uanügü togü ga nachixü̃anewa gagüxü̃.
11 Rü ñoma wüxi i carnéruarü dauruxü̃ i mea norü carnérugüna dauxü̃rüxü̃ nixĩ. Rü nachacüügu tüxü̃ nigagü ga norü carnéruxacü, rü nügüremüwa tüxü̃ yaxũxẽẽãcü tüxü̃ nigagü. Rü mea tüxna nadau ya yíxema ngexwaca íxraxacügüxe.
Taxuxü̃ma i to rü Iraétanüxü̃arü Tupanaxü̃ narüporamae
12 ¿Rü texé ya tümachacume̱xẽmaxã inanguxe i már arü dexá, rüe̱xna tümatanüme̱xẽgümaxã nangugüxe i daxũguxü̃ i naanearü ta? ¿Rü texé wüxi i nguruü̃gu tanagücu i ñoma i naanearü waixü̃müte̱xe? ¿Rü texé yáruü̃wa tanayá ya guxü̃nema ya ma̱xpǘnegü?
13 ¿Rü texé ya Cori ya Tupanaxü̃ rüwe̱xãchixẽxẽ, rü texé ya naxucu̱xẽxe?
14 ¿Rü texé ya naxucu̱xẽxe rü cua̱x nüxna ãxe? ¿Rü texé ya Cori ya Tupanaxü̃ tangu̱xẽxẽ nax meama nüxü̃ nacuáxü̃ca̱x i duü̃xü̃güarü guxchaxü̃arü mexẽxẽ? ¿Rü texé tanangu̱xẽxẽ nax meama nüxü̃ nacuáxü̃ca̱x i ñoma i naanearü cua̱x? ¿Rü texé tanangu̱xẽxẽ nax guxü̃xü̃ nacuáxü̃ca̱x?
15 Rü Tupanaca̱x rü guxü̃ma i nachixü̃anegü rü ñoma wüxi i dexáarü churuxü̃rüxü̃ nixĩgü, rü ñoma wüxitama i waixü̃müchicute̱xe i yáruü̃wa inguxü̃arü ya nüxü̃́ nangẽxma. Rü Tupanaca̱x rü ngẽma capaxũgü i márwa ngẽxmagüxü̃ rü ñoma wüxipü̱xüchire i naxnecürüxü̃mare nixĩgü.
16 Rü guxü̃ma i Líbanuanewa ngẽxmagüxü̃ i naeü̃gü rü tama ningu nax wüxi i ãmare Tupanaca̱x iguxü̃. Rü ngẽma Líbanuwa ngẽxmagüxü̃ i naigü rü tama ningu nax norü ãmarearü guruxü̃arü üxü yixĩxü̃ca̱x.
17 Rü guxü̃ma i nachixü̃anegü rü Tupanape̱xewa taxuxü̃ma nixĩgü. Rü Tupanaca̱x taxuwama nime.
18 ¿Rü ta̱xacügu tá penangu ya Tupana? ¿Rü ñuxãcü tá penaxüxchicüna̱xã?
19 Rü wüxi i naxchicüna̱xãarü üruxü̃ rü nanadexẽxẽ i ngẽma nawa naxüaxü̃ i ngẽma naxchicüna̱xã. Rü wüxi i nga̱xãẽruxü̃ rü úirumaxã nanatüxüne rü diẽrumüwa nanaxü i nachagü.
20 Rü wüxi i tama muarü diẽruã́xü̃ rü naxca̱x nadau i wüxi i nai i tama ngauxwa̱xexü̃, rü ñu̱xũchi naxca̱x nadau i wüxi i naxchicüna̱xãarü üruxü̃ i mea nüxü̃ cuáxü̃ nax naxüaxü̃ i wüxi i naxchicüna̱xã i tama iwáxwa̱xexü̃.
21 Rü dücax ¿tama ẽ̱xna nüxü̃ pecua̱x nax taétüwa nangẽxmaxü̃ ya Tupana? ¿Rü taguma ẽ̱xna nüxü̃ pexĩnüe ga yexguma nachiga yadexagügu? ¿Rü tama ẽ̱xna noxri pebuegutama texé pemaxã nüxü̃ tixuchiga? ¿Rü tama ẽ̱xna nüxü̃ pecua̱xgüéga nax texé yixĩxü̃ ga noxri naxüxü̃ ga ñoma ga naane?
22 Rü nüma ya Tupana rü ngẽma naanexü̃ idüxüxü̃arü dauxü̃waama nangẽxma i norü tochicaxü̃. Rü ngéma duü̃xü̃güxü̃ nadau nax ñoma munügürüxü̃ yaxĩgüxü̃. Rü nüma nayangexechi i ngéma dauxü̃wa ngẽxmaxü̃ rü nayatexechi i ngẽma dauxü̃wa nüxü̃ idauxü̃ ñoma wüxi ya ĩpata ya naxchirunaxca̱x itexechixü̃rüxü̃.
23 Rü nüma ya Tupana rü inayanaxoxẽxẽ i ngẽma duü̃xü̃gü i ñoma i naanewa nügü írüporaexü̃ rü ngẽma ãẽ̱xgacügü i ñoma i naanewa ngẽxmagüxü̃.
24 Rü nümagü rü ñoma nanetügü i ngexwaca itogüxü̃, rü ngexwaca ixãxchúma̱xãxü̃rüxü̃ nixĩgü. Rü ngẽxguma Tupana natanügu cué ñaxgux rü narüñẽẽxgü rü yimá buanecü ya tacü rü ñoma maxẽ ya ipacürüxü̃ nayange.
25 Rü yimá Tupana ya Üünecü rü ínaca rü ñanagürü: —¿Ta̱xacügu tá i choxü̃ penguxü̃ i pemax? ¿Rü texé tixĩ ya chomaxã wüxiguxe? —ñanagürü.
26 ¡Dücax, daxũguxü̃ i naanegu perüdaunü rü nüxü̃ peda̱u̱x! ¿Rü texé tixĩ ya naxǘxe i guxü̃ma i ngẽma nüxü̃ pedauxü̃? Rü nüma ya Tupana nixĩ ga mea inanucü ga wüxichigü ga yema ẽxtagü rü woramacurigü rü ñu̱xũchi wüxichigü rü naégamaxã nüxna naca. Rü nataxüchi i norü pora rü mea guxü̃maxã inacua̱x, rü ngẽmaca̱x taguma wüxi i ẽxta natauxchica.
27 Pa Iraéanecüã̱xgüx, Pa Acóbutanüxü̃, ¿rü ta̱xacüca̱x pidexagüxü̃ rü ñaperügügüxü̃: —Cori ya Tupana rü tama nüxü̃ nacua̱x nax ta̱xacü choxü̃ üpetüxü̃. Rü nüma ya Tupana rü tama chaugu narüxĩnü —ñaperügügüxü̃?
28 ¿Ẽ̱xna tama nüxü̃ cucua̱x rü tama nüxü̃ cuxĩnü? Rü nüma ya Cori ya Tupana ya guxü̃guma ngẽxmacü rü naanearü üruxü̃ ixĩcü, rü taguma nanaxĩ̱xãchiãxẽ rü taguma nipa. Rü ngẽma norü cua̱x rü taguma inayagu̱x.
29 Dücax, rü yíxema ipaxe rü pora tüxna naxã. Rü yíxema turaxe rü tüxü̃ ínanaporaãchixẽxẽ.
30 Rü woo i ngẽma ngextü̱xügüxü̃ rü woetama nipae rü nanaxĩ̱xãchiãẽgü. Rü woo i ngẽma poraechiréxü̃ rü düxwa narüpae.
31 Natürü yíxema aixcüma Cori ya Tupanaaxü̃́ yaxṍxe rü guxü̃gutáma tüxü̃́ ningexwaca̱xü̃chigü i tümaarü pora. Rü ñoma ĩyügürüxü̃ rü tá taporaama. Rü woo ngẽxguma poraãcü itañaãchigu rü taxũtáma nagu̱x i tümaarü pora. Rü woo ngẽxguma yáxü̃wa taxũxgu, rü taxũtáma tipa.
