Isaías 41:1-29
41 Nüma ya Cori ya Tupana rü ñanagürü: —¡Iperüchianegü rü choxü̃́ iperüxĩnüe, Pa Márpechinüwa Ngẽxmagüxü̃ i Nachixü̃anegücüã̱x! ¡Rü pemax, Pa Guxü̃ma i Nachixü̃anegücüã̱x, ẽcü peporaãẽgü! ¡Rü nua pexĩ rü ngĩxã nachiga tidexagü i ngẽma tá ngupetüxü̃! ¡Rü ngĩxã nuxã wüxigu tangutaque̱xegü nax nachiga idexagüxü̃ca̱x!
2 ¿Rü texé tanango̱xẽxẽ i ngẽma ãẽ̱xgacü i éstewa ne ũxü̃ rü guxãxü̃ma rüporamaexü̃? ¿Rü texé nüxna tanamugü i ngẽma togü i nachixü̃anegü rü ñu̱xũchi nüxü̃ tanamuü̃xẽxẽ i ngẽma togü i nachixü̃anegüarü ãẽ̱xgacügü? Rü ngẽma ãẽ̱xgacü i éstewa ne ũxü̃ rü norü taramaxã rü norü würamaxã nanadai i ngẽma togü i nachixü̃anecüã̱x rü ñoma maxẽ i paxü̃rüxü̃ nanangianexẽxẽ.
3 Rü ngẽma ãẽ̱xgacü i éstewa ne ũxü̃ rü nama i taguma nagu yaxũxü̃gu paxãma nixũ. Rü tauxchaãcüma ngẽma togü i nachixü̃anegüxü̃ narüporamae rü taxúema ítayachaxãchixẽxẽ.
4 ¿Rü texé tixĩ ya nüxna namugüxe i ngẽma ãẽ̱xgacü i éstewa ne ũxü̃? ¿Rü texé tixĩ i namaxã icuáxe i guxü̃ma i ngẽma ñoma i naanewa ngupetüxü̃? Rü choma nax chaxicatama Tupana chixĩxü̃ nixĩ i chanaxüxü̃ i guxü̃ma i ngẽma. Rü choma rü woetama changexmaecha rü taguma icharüxo.
5 Rü yema márpechinüwa yexmagüxü̃ ga nachixü̃anegücüã̱x rü yexguma norü uanüxü̃ nadaugügu nax norü churaragümaxã yéma ne naxũxü̃ rü guxü̃wama ga naanewa muü̃maxã nidu̱xruxe ga duü̃xü̃gü —ñanagürü ya Tupana.
6 Rü yemaca̱x wüxichigü ga naxchicüna̱xãarü üruxü̃ rü namücüaxü̃́ nanangúchaü̃xẽxẽ nax naxügüã̱xü̃ca̱x ga naxchicüna̱xã ga norü poxü̃ruxü̃.
7 Rü yema naxchicüna̱xãarü üruxü̃ rü nüxü̃́ nanangúchaü̃xẽxẽ ga yema úirumaxã puracüxü̃ nax natüxüneã́xü̃ca̱x ga yema naxchicüna̱xã. Rü yema natamüca̱x martiyumaxã íipomüxü̃ rü nanataãẽxẽxẽ ga yema dextaruxü̃ íipomüxü̃ rü ñanagürü nüxü̃: “Name i ngẽma dextaruxü̃”, ñanagürü. Rü ñu̱xũchi itapuamaxã ínayapota ga yema naxchicüna̱xã nax tama yawáxü̃ca̱x.
8 Rü yexguma ga Cori ya Tupana rü ñanagürü: —Iperüxĩnüe, Pa Iraétanüxü̃x. Pema rü chorü duü̃ ya Acóbu ya nüxü̃ chaxunetacüarü duü̃xü̃gü pixĩgü rü chomücü ya Abraáü̃taagü pixĩgü.
9 Rü choma nixĩ ga yema nachixü̃ane ga yáxü̃guxü̃wa pexü̃ íchanguxü̃xẽẽxü̃. Rü yema naane ga yáxü̃wa yexmaxü̃wa nixĩ ga pexca̱x chacaxü̃ rü pexü̃ ñachaxü̃: “Pema rü chorü duü̃xü̃gü pixĩxgü”, ñachaxü̃. Choma nixĩ ga pexü̃ chadexü̃ rü tama pexü̃ chaxoxü̃.
10 ¡Taxṹ i pemuü̃exü̃, Pa Iraétanüxü̃x! Erü choma rü chapexü̃tagu. ¡Rü taxṹ i pemuü̃exü̃! Erü choma rü perü Tupana chixĩ. Choma rü pora pexna chaxã rü pexü̃ charüngü̃xẽẽxü̃. Rü choma rü chorü tügünechacüxümaxã pexü̃ chingĩ rü pexü̃ íchapoxü̃.
11 Rü guxü̃ma i ngẽma pexchi aiexü̃ rü tá naxãnee rü tá inayarümaãchitanü. Rü ngẽma pemaxã nügü daixü̃ rü tá inayarüxo.
12 Rü naxca̱x tá pedaugü i perü uanügü, natürü taxũtáma nüxü̃ ipeyangau. Rü ngẽma pexü̃ daixchaü̃xü̃ rü ñoma taguma nangóexü̃rüxü̃ tá nixĩgü.
13 Erü choma ya Cori nax perü Tupana chixĩxü̃ rü pexme̱xgu chingĩ. Rü marü pemaxã nüxü̃ chixu rü ñachagürü: “¡Taxṹ i pemuü̃exü̃! Erü choma tá pexü̃ charüngü̃xẽxẽxü̃” —ñachagürü.
14 Rü choma ya Cori ya Tupana rü aixcüma pemaxã nüxü̃ chixu rü ñachagürü: —Pa Iraétanüxü̃x Pa Acóbutanüxü̃, rü woo nax penoxrexü̃ rü perü uanügüpe̱xewa peturaexü̃, natürü ¡taxṹ i pemuü̃exü̃! Erü choma rü tá pexü̃ charüngü̃xẽxẽxü̃. Rü choma ya perü Tupana ya üünecü nax chixĩxü̃ rü perü nguxü̃xẽẽruxü̃ chixĩ.
15 Rü ñoma wüxi i tríguarü waixruxü̃ i ngexwaca̱xü̃xü̃ i mepütaxüchixü̃rüxü̃ tá pexü̃ chixĩgüxẽxẽ nax ngẽmaãcü penadaixü̃ i perü uanügü. Rü ñoma waixü̃müte̱xerüxü̃ tá peyaxĩgüxẽxẽ. Rü ngẽma perü uanügü rü ñoma maxẽ ya pacürüxü̃ tá peyaxĩxẽxẽ.
16 Rü ñoma trigu ípecuexechite̱xe rü buanecü naxchire yanaxü̃rüxü̃ tá peyabuxmüxẽxẽ i perü uanügü. Rü ngẽxguma i pemax, Pa Iraétanüxü̃x, rü tá chomaxã petaãẽgü rü tá choxü̃ picua̱xüü̃gü i choma nax perü Tupana ya üünecü chixĩxü̃.
17 Rü yíxema ngearü diẽruã̱xgüxe rü tita̱xawae rü naxca̱x tadaugü i dexá natürü taxuxü̃ma itayangaugü. Rü ta̱xawamaxã tipaarü conüã̱x. Natürü choma ya Cori ya Tupana rü tá tüxü̃ charüngü̃xẽxẽxü̃, rü choma nax Iraétanüxü̃arü Tupana chixĩxü̃ rü taxũtáma tüxü̃ íchawogümare.
18 Rü yima ma̱xpǘnegü ya ngearü dexáanegüwa rü natügü tá ngéma charüyáü̃xẽẽgü. Rü ngẽma ngategü rü tá dexá nawa chibaibexẽxẽgü. Rü ngẽma chianexü̃wa rü tá naxtaagü nawa chango̱xẽxẽ. Rü ngẽma ínapaanexü̃wa tá chanangõ̱xẽxẽ i natüxacügü.
19 41:19-20 Rü ngẽma taxúema íxãpataxü̃wa rü ocayiwagü, rü aráyanegü, rü oribugü tá ngéma charüxügüxẽxẽ. Rü ngẽma íyapaanexü̃wa rü wüxigu pínugümaxã tá chanaxügüxẽxẽ i ngẽma abétugü, rü chipregü nax ngẽmaãcü guxü̃ma i duü̃xü̃gü nüxü̃ daugüxü̃ca̱x, rü nüxü̃ cua̱xgüxü̃ca̱x rü inaxĩnüexü̃ca̱x, rü ñu̱xũchi nüxü̃ yacua̱xãchitanüxü̃ca̱x nax choma ya Cori ya Iraétanüxü̃arü Tupana ya Üünecü chixĩxü̃ i chanaxüxü̃ i guxü̃ma i ngẽma —ñanagürü.
20 Nüü̃ nadau 41:19
Tupana nüxü̃ naxõõ̱x ga yema tupananetachicüna̱xãgü
21 Rü nüma ya Cori ya Acóbutanüxü̃arü ãẽ̱xgacü ixĩcü rü yema tupananetachicüna̱xãgüxü̃ ñanagürü: —¡Dücax, Pa Naxchicüna̱xãgüx, pegü ípepoxü̃gü, rü pegüétüwa pidexagü!
22 ¡Rü nua pexĩ rü tomaxã nüxü̃ pixugü i ngẽma tá ngupetüxü̃, rü ñu̱xũchi tomaxã nüxü̃ pixugü rü ta̱xacüchiga nixĩ i ngẽma marü ngupetüxü̃ rü ñu̱xũchi tá pexü̃ itarüxĩnüe! ¡Rü tomaxã nüxü̃ pixugü i ngẽma tá ínguxü̃ nax ngẽmaãcü nüxü̃ tadaugüxü̃ca̱x i ngẽma tá ngupetüxü̃!
23 ¡Rü ñu̱xũchi tomaxã nüxü̃ pixu i ngẽma tá ñu̱xmawena ngupetüxü̃! ¡Rü toxü̃ penawé nax aixcüma tupanagü pixĩgüxü̃! ¡Rü penaxü̱x i ngẽma nüxü̃ pecuáxü̃, rü mexü̃ rüe̱xna chixexü̃, nax ngẽmaãcü nüxü̃ tadaugüxü̃ca̱x rü tamuü̃exü̃ca̱x!
24 Natürü i pemax, Pa Naxchicüna̱xãgüx, rü taxuxü̃ma pixĩxgü, rü bai nax ta̱xacü pexüxü̃. ¡Rü tachixe ya yíxema pegu yaxṍxe! —ñanagürü.
25 Rü nüma ga Cori ya Tupana rü nidexachigüama rü ñanagürü: —Éstewa chanango̱xẽxẽ ga wüxi ga yatü. Rü naégamaxã naxca̱x changema, rü nórtewa ne naxũ. Rü nüma rü tá nagu napúgü i ngẽma togü i ãẽ̱xgacügü ñoma üwechiruxü̃ waixü̃mügu púgüxü̃rüxü̃.
26 ¿Rü noxriarü ügügutama texé tixĩxü̃ ga nüxü̃ ixuxe i ngẽma tá ngupetüxü̃ nax ngẽmaãcü nüxü̃ icuáxü̃ca̱x? ¿Rü texé tixĩxü̃ ga naxü̃pa nüxü̃ ixuxe i ngẽma tá ngupetüxü̃ nax ngẽmaãcü nüxü̃ tixugüxü̃ca̱x nax aixcüma yixĩxü̃ i ngẽma nüxü̃ tixuxü̃? Rü pema nax tupananetagü pixĩgüxü̃ rü petanüwa taxúema tixĩ ga nüxü̃ ixuxe i ngẽma tá ngupetüxü̃, rü bai ya texé nüxü̃ ĩnüxü̃ i wüxi i perü dexa nachiga i ngẽma tá ngupetüxü̃.
27 Rü chomatama nixĩ ga noxriarü ügügu Chióü̃maxã nüxü̃ chixuxü̃, rü Yerucharéü̃wa chanamuxü̃ ga wüxi ga orearü uruxü̃ nax natanüxü̃maxã nüxü̃ yanaxuxü̃ca̱x nax paxatáma nawoeguxü̃ ga yema namücügü ga to ga nachixü̃anewa yexmagüxü̃.
28 Rü ichadawenü rü taxuxü̃ma rü aixcüma tupanagü nixĩ, rü taxuxü̃ma ga ucu̱xẽ ixãxü̃xü̃ chadau. Rü taxuxü̃ma choxü̃ nangãxü̃ ga yema naxca̱x íchaca̱xaxü̃.
29 Rü wüxichigü ga yema tupananetachicüna̱xãgü rü taxuxü̃ma nixĩ. Rü taxuxü̃ma naxügü erü naxchicüna̱xãgümare nixĩgü rü nangearü maxü̃ã̱x —ñanagürü.
