Isaías 42:1-25
42 Nüma ya Cori ya Tupana rü ñanagürü: —Daa nixĩ ya yimá chorü duü̃ ya chaporaxẽẽcü rü nüxü̃ chaxunetacü rü namaxã chataãẽcü. Rü nüxna nixĩ i chanamuxü̃ i Chauãxẽ i Üünexü̃ nax ngẽmaãcü guxü̃ i nachixü̃anegümaxã mea inacuáxü̃ca̱x.
2 Rü nüma rü namecüma. Rü tagutáma nipura, rü taxúexü̃táma nanga i ĩanemaxü̃güwa.
3 Rü ñoma wüxi ya dexne ya ibüyene natürü tama yabüyexüchinerüxü̃, rü nüma ya chorü duü̃ rü taxũtáma tüxü̃ naxoxochi ya yíxema tümaarü õwa turaxe. Rü ñoma wüxi ya turuchira i íxrarüwatama naixü̃ne tama yaxoxẽẽnerüxü̃, rü nüma rü taxũtáma tüxü̃ nixoxẽxẽ ya yíxema yaxõxchaü̃xe. Rü aixcümaxü̃chi tá mea guxãmaxã inacua̱x.
4 Rü nüma rü tagutáma inarüngü̃. Rü tagutáma nüxü̃ narüchau ñu̱xmatáta ñoma i naanewa maxẽxü̃ i duü̃xü̃gü mea nügümaxã inacuáxe. Rü woo ngẽma nachixü̃anegü i yáxü̃wa ngẽxmagüxü̃ i már arü tocutüwa rü tá mea nanayauxgü i norü ngu̱xẽẽtae —ñanagürü.
5 Rü Cori ya Tupana rü ñanagürü: —Choma nixĩ ya Tupana chixĩxü̃, rü choma nixĩ i chanaxüxü̃ i dauxü̃guxü̃ i naane rü ñoma i naane rü guxü̃ma i nawa rüxügüxü̃. Rü choma nixĩ i maxü̃ nüxna chaxãxü̃, rü chayangü̃atanücüüxẽẽxü̃ i guxü̃ma i duü̃xü̃gü i ñoma i naanewa maxẽxü̃.
6 Rü choma ya Tupana nixĩ i cuxca̱x chacaxü̃ rü pora cuxna chaxãxü̃ nax duü̃xü̃gümaxã nüxü̃ cuyarüxuxü̃ca̱x nax mea nügümaxã inacuáexü̃ca̱x. Rü choma rü tá cuxme̱xgu chingĩ rü tá cuxna chadau. Rü cuxü̃ chamu nax chope̱xewa duü̃xü̃güétüwa cuchogüxü̃ca̱x rü ngẽmaãcü wüxi i omü nax quixĩxü̃ca̱x nape̱xewa i guxü̃ma i nachixü̃anegü.
7 Rü cuxü̃ chamu nax cuyadauchitanüxẽẽxü̃ i ngẽma ngexetügüxü̃ rü poxcupataxü̃wa ícunanguxü̃xẽẽxü̃ca̱x i ngẽma poxcuexü̃ i waanexü̃wa ngẽxmagüxü̃.
8 Rü choma nixĩ ya Tupana i Guxãétüwa Changexmaxü̃, rü ngẽma nixĩ i chauéga. Rü tama chanaxwa̱xe nax ngẽma tupananetagüxü̃mare yacua̱xüü̃güxü̃ i duü̃xü̃gü, erü chaxicatama nixĩ i namexü̃ nax choxü̃ yacua̱xüü̃güxü̃.
9 Rü dücax, rü marü ningu ga yema ü̃pa nüxíra nüxü̃ chixuxü̃. Rü ñu̱xma rü tá pemaxã nüxü̃ chixu i ngexwaca̱xü̃xü̃ i oregü naxü̃pa i ngẽma tá ínguxü̃ —ñanagürü ya Tupana.
Wiyaemaxã Tupanaxü̃ nicua̱xüü̃gü
10 Rü ñanagürü ga Ichaía: —¡Tupanaxü̃ picua̱xüü̃gü wüxi i ngexwaca̱xü̃xü̃ i wiyaemaxã! Rü guxü̃ma i nachixü̃anecüã̱x i ñoma i naanewa ngẽxmagüxü̃, rü guxü̃ma i duü̃xü̃gü i yáxü̃wa márcutüwa maxẽxü̃, rü guxü̃ma i duü̃xü̃gü i márgu yarüxĩĩxü̃, rü guxü̃ma i márwa maxẽxü̃, rü name nixĩ i Tupanaxü̃ nicua̱xüü̃gü.
11 Rü pema i chianexü̃ rü ĩanegü̃ i chianexü̃wa ngẽxmagüxe ¡rü petaãxẽgü! Rü pema i Quedáxcüã̱x ¡rü petaãxẽgü! Rü pema i Cherácüã̱x rü name nixĩ nax yima ma̱xpǘnegüchitaeruwa taãxẽãcü rü tagaãcü pewiyaegüxü̃ nax Tupanaxü̃ picua̱xüxü̃güxü̃.
12 Rü pema i nachixü̃anegü i márpechinüwa maxẽxü̃ i duü̃xü̃gü ¡rü nüxü̃ picua̱xüxü̃gü rü moxẽ nüxna pexãgü!
13 Rü nüma ya Cori ya Tupana rü ñoma wüxi i daiwa poraxü̃rüxü̃ tá nua naxũ. Rü norü poramaxã tá aita naxü rü tá norü uanügüxü̃ nadai —ñanagürü ga Ichaía.
14 Rü ñanagürü ga Tupana: —Mucüma ya taunecü rü ichayarüchiane rü taguma chidexa, natürü i ñu̱xma rü tá aita chaxü ñoma wüxi ya ngexe ya ngu̱xnecaxe rü íxraxacüchaü̃xerüxü̃.
15 Rü tá ichayanaxoxẽxẽ ya ma̱xpǘnegü rü ngüchitaerugü. Rü tá chayapagüxẽxẽ i guxü̃táma i naigü rü maxẽgü i ngéma ngẽxmagüxü̃. Rü guxü̃ma i natügü rü tá naxnecüxü̃ chayaxĩgüxẽxẽ, rü yima naxtaagü rü tá chayapagüxẽxẽ.
16 Rü ngẽma ngexetügüxü̃ rü tá chanagagü nawa i namagü i taguma nüxü̃ nacua̱xgüxü̃ rü taguma nagu naxĩxü̃. Rü ngẽma waanexü̃ i nawa namaxẽ rü tá ngóonexü̃xü̃ chayaxĩxẽxẽ. Rü ngẽma naane i chixri i weanexü̃ rü tá mea ichanawe̱xãchianexẽxẽ. Rü guxü̃ma i ngẽma rü tá chanaxü erü tama nüxna chixũgachi i chorü duü̃xü̃gü i Iraétanüxü̃.
17 Rü ngẽma duü̃xü̃gü i naxchicüna̱xãgümaxã tupanaã̱xgüxü̃, rü ngẽma naxchicüna̱xãgüxü̃ ñanagürügü: “Pema nixĩ i torü tupanagü pixĩgüxü̃”, ñanagürügü. Natürü norü ãnemaxã tá nüxna nixĩgachitanü i ngẽma naxchicüna̱xãgü —ñanagürü ga Tupana.
Iraétanüxü̃ rü ngexetüxü̃ rü ngauchiẽxü̃ nixĩgü
18 Rü Ichaía rü ñanagürü: —Pa Ngauxchiẽgüxü̃x, ¡mea nüxü̃ pexĩnüe! Rü pemax, Pa Ngexetügüxü̃x, ¡mea pidauchigü rü nüxü̃ peda̱u̱x!
19 Rü Iraétanüxü̃ nixĩ ga Tupana nüxü̃ unetaxü̃ nax norü duü̃xü̃gü yaxĩgüxü̃ca̱x rü norü orexü̃ nax yaxugüexü̃ca̱x. Natürü nataxuma i to i duü̃xü̃gü i Iraétanüxü̃arü yexera ngauxchiẽgüxü̃ rü ngexetügüxü̃.
20 Rü woo nüxü̃ nadaugügu i cua̱xruü̃gü ya Tupana naxca̱x üxü̃, natürü nüxü̃́ nanataxuraü̃gümare. Rü woo Tupanaarü orexü̃ naxĩnüegu, natürü ñoma taxuxü̃ma naxĩnüexü̃rüü̃mare nixĩgü.
21 Rü nüma ya Tupana rü wüxi ya Tupana ya ípoxü̃wa̱xecü nixĩ, rü ngẽmaca̱x nanatachigaxẽẽchaü̃ i norü ngu̱xẽẽtaegü i mexẽchixü̃.
22 Natürü nüma i Iraétanüxü̃ rü tama inaxĩnüechaü̃ rü ngẽmaca̱x togü rü Iraétanüxü̃arü ngẽmaxü̃güca̱x nangĩ̱xgü. Rü ngẽma norü uanügü rü nüxna nanapuxü̃ ga guxü̃ma ga yema nüxü̃́ yexmaxü̃ rü poxcupataü̃gu nanawocu. Rü norü uanügü ínanayauxü̃gü rü taxúema i texé ítanapoxü̃gü.
23 Natürü naétüwa ga yema guxchaxü̃gü, rü nüma ga Iraétanüxü̃ rü tama inaxĩnüechaü̃.
24 ¿Rü texé tixĩ ya guxema tauxcha nüxna ãxẽ ga yema Acóbutanüxü̃arü uanügü nax Iraégüxü̃ naporamaegüxü̃ rü ínayauxü̃ãxü̃? ¿Tama ẽ̱xna Cori ya Tupana yixĩxü̃? Yerü yema Iraétanüxü̃ rü Tupanape̱xewa chixexü̃ naxügü, rü tama Tupana naxwa̱xexü̃ãcü namaxẽ, rü tama naga naxĩnüechaü̃ ga yema norü ngu̱xẽẽtaegü.
25 Rü yemaca̱x ga Tupana rü poraãcü yema Iraétanüxü̃maxã nanu. Rü nanayexrü nax norü uanügümaxã nügü nada̱i̱xü̃ca̱x. Rü norü uanügü nüxü̃ narüporamae rü ínanagu ga norü ĩanegü. Natürü woo yemaacü nüxü̃ nangupetü rü nüma ga Iraétanüxü̃ rü tama inaxĩnüechaü̃ —ñanagürü ga Ichaía.