Isaías 43:1-28
43 Natürü i ñu̱xmax, Pa Iraétanüxü̃ i Acóbuarü Duü̃xü̃gü Ixĩgüxe, rü yimá Cori ya Tupana ya pexü̃ ngo̱xẽẽcü rü ñanagürü pexü̃: —¡Taxṹ i pemuü̃exü̃! Erü choma nixĩ i pexü̃ íchanguxü̃xẽẽxü̃. Rü choma nixĩ i peégamaxã pexna chacaxü̃ rü pema rü chorü duü̃xü̃gü pixĩgü.
2 Rü ngẽxguma guxchaxü̃wa pechopetügu ñoma dexá i mátamaxü̃wa pichoü̃gurüxü̃, rü choma rü tá chapetanügu. Rü ngẽxguma ãũcümaxü̃wa pengẽxmagügu ñoma wüxi i natü i poraxü̃chíüxü̃wa pichoü̃gurüxü̃ rü taxũtáma ngẽxma peyi. Rü ngẽxguma taxü̃ i guxchaxü̃wa pechopetügu rü ñoma wüxi i üxüétüwa pechopetügurüxü̃ pixĩgü, rü taxũtáma pixae rü yima üxü rü taxũtáma niyauxra i petanüwa.
3 Rü choma nixĩ i perü Cori ya perü maxẽxẽẽruxü̃ chixĩxü̃, Pa Iraétanüxü̃x. Rü choma nixĩ i perü Tupana ya Üünecü chixĩxü̃. Rü choma nixĩ ga ãẽ̱xgacü ga Chírume̱xẽgu chayixẽẽxü̃ ga perü uanügü ga Equítuanecüã̱xgü rü Etiopíaanecüã̱xgü rü Chabáanecüã̱xgü nax yemaacü naxme̱xwa ípenguxü̃xü̃ca̱x ga pemax.
4 Rü yemaacü pexü̃ íchapoxü̃ yerü poraãcü choxü̃́ pengúchaü̃ rü choxü̃́ peme rü pexü̃ changechaü̃. Rü yemaacü norü uanügüme̱xẽgu chanayixẽxẽ ga yema perü uanügü nax pexü̃ íchapoxü̃xü̃ca̱x rü choxrü duü̃xü̃gü pixĩgüxü̃ca̱x i pemax.
5 ¡Rü taxṹ i pemuü̃exü̃! Erü choma rü chapetanügu. Rü yíxema ésteguama woonexe rü yíxema oésteguama woonexe rü tá pexü̃ chanutaque̱xe nax wenaxarü ñaa pechixü̃aneca̱x pewoeguxü̃ca̱x nax nua wüxiwa pengẽxmagüxü̃ca̱x.
6 43:6-7 Rü ngẽma nachixü̃anegü i Nórtewa ngẽxmagüxü̃xü̃ rü ngẽma nachixü̃anegü i Súrwa ngẽxmagüxü̃xü̃ tá ñacharügü: “¡Penamuegutanü i ngẽma chorü duü̃xü̃gü! Rü guxü̃ma i chorü duü̃xü̃gü i guxü̃wama i ñoma i naanewa ngẽxmagüxü̃ rü chauéga ingegüxü̃ rü tá penawoeguxẽxẽ. Yerü choma nixĩ ga chanangóexẽxẽxü̃ nax choxü̃ yacua̱xüü̃güxü̃ca̱x” ñachagürü tá.
7 Nüü̃ nadau 43:6
8 ¡Rü nua penamugü i chorü duü̃xü̃gü i ãxetüchiréxü̃, natürü ñoma nangexetüxü̃rüxü̃ ixĩgüxü̃, rü ngẽma ãxmachi̱xẽchiréxü̃, natürü ñoma nangauchixẽxü̃rüxü̃ ixĩgüxü̃!
9 Rü guxãma i pema i guxü̃ i nachixü̃anecüã̱xgü, rü pengutaque̱xe rü wüxiwa pexĩ rü chomaxã nüxü̃ pixu, ¿Texé tixĩ i petanüwa ga naxü̃pa nüxü̃ cuáxe rü nüxü̃ ixuxe ga yema tá ngupetüxü̃? ¡Ẽcü, nua tanagagü ga yema nüxü̃ daugüxü̃ nax nüxü̃ yaxugüexü̃ca̱x nax aixcüma naxü̃pa nüxü̃ tacuáxü̃ rü nüxü̃ tixuxü̃ ga yema ngupetüxü̃! —ñanagürü.
10 Rü ñanagürü ta ga Tupana: —Pemax, Pa Iraétanüxü̃x, rü chorü duü̃xü̃gü pixĩgü rü nüxü̃ pedau ga yema choma chaxüxü̃. Rü choma rü pexü̃ chidexechi nax choxü̃ pecuáxü̃ca̱x rü choxü̃́ peyaxõgüxü̃ca̱x rü nüxü̃ pecuáxü̃ca̱x nax chaxicatama Tupana chixĩxü̃. Rü chauxü̃pa rü nataxuma ga to ga nüxíra Tupana ixĩxü̃ rü chauwena rü tagutáma nangẽxma i to.
11 Rü chaxicatama nixĩ ya Tupana chixĩxü̃, rü chaxicatama nixĩ i pexü̃ íchapoxü̃xü̃ —ñanagürü.
12 Rü ñanagürü ta ga Tupana: —Choma nixĩ ga pemaxã nüxü̃ chixuxü̃ rü tá pexü̃ íchanguxü̃xẽẽxü̃. Rü aixcüma chayanguxẽxẽ ga yema. Rü pema rü meama nüxü̃ pecua̱x nax tama wüxíe i tomare ga tupana yixĩxü̃ ga pexü̃ ínguxü̃xẽẽxü̃, erü choma rü chaxicatama Tupana chixĩ.
13 Rü choma nixĩ i guxü̃guma Tupana chixĩxü̃. Rü cho̱xme̱xwa rü taxúema tümaarü poramaxã tügü ítapoxü̃. Rü ngẽma choma chaxüxü̃ rü taxúema tayanaxoxẽxẽ —ñanagürü.
Iraétanüxü̃ rü Tupanaaxü̃́ nangechaü̃tümüxü̃gü
14 Rü yima Iraétanüxü̃arü Tupana ya üünecü ya pexü̃ ínguxü̃xẽẽcü rü ñanagürü: —Ngẽma nax pexü̃ íchanguxü̃xẽẽxü̃ca̱x rü Babiróniaarü ĩanewa tá chanamugü i norü uanügüarü churaragü nax nagu yapogüexü̃ca̱x i norü poxeguxü̃arü ĩã̱xgü. Rü yima norü wapurugü ya namaxã nataãẽgüne i ngẽma Babiróniacüã̱x rü tá norü ngechaü̃xü̃ nananguxuchi.
15 Rü choma nixĩ i perü Tupana ya Üünecü chixĩxü̃, rü choma nixĩ i pexü̃ changóexẽẽxü̃ rü choma nixĩ i perü ãẽ̱xgacü chixĩxü̃, Pa Iraétanüxü̃x —ñanagürü.
16 Rü nüma ga Tupana rü már niyauxyexü̃chíü, rü yéma nanaxü ga wüxi ga nama nax yéma yachoü̃xü̃ca̱x ga norü duü̃xü̃gü.
17 Rü nüma ga Tupana rü Iraétanüxü̃we nanangegüxẽxẽ ga yema Equítuanecüã̱xgüarü churaragü namaxã ga norü cowarugü rü carugü ga daiwexü̃ ixĩgüne. Rü yexma márgu nanayixẽxẽ, rü yexma nayue, rü ñoma wüxi i omü ixoxü̃rüxü̃ nixĩgü.
18 Rü nüma ya Tupana rü Iraétanüxü̃xü̃ ñanagürü: —¡Taxṹ i nagu perüxĩnüexü̃ i ngẽma marü ngupetüxü̃! ¡Rü nüxü̃ iperüngümae!
19 Rü choma rü tá chanaxü i wüxi i ta̱xacü i ngexwaca̱xü̃xü̃, rü ñu̱xma tátama nüxü̃ pedau i ngẽma. Rü tá chanaxü i wüxi i nama i naxnücüanewa i taxúema íxãpataxü̃wa, rü ngẽma íyapaanexü̃wa rü tá natügü chango̱xẽxẽ.
20 43:20-21 Rü guxü̃ma i naeü̃gü i idüraexü̃ rü airugü i naixnecücüã̱x rü abetrúgü rü tá choxü̃ nicua̱xüü̃gü. Erü ngéma taxúema íxãpataxü̃wa rü ínapaanexü̃wa rü tá dexá chayagoxü̃chíüxẽxẽ nax ngéma naxaxegüxü̃ca̱x i chorü duü̃xü̃gü i nüxü̃ chaxunetaxü̃ rü chango̱xẽẽxü̃ nax choxü̃ yacua̱xüü̃güxü̃ca̱x.
21 Nüü̃ nadau 43:20
22 Natürü i pemax, Pa Acóbutanüxü̃x Pa Iraétanüxü̃x, rü tama chorü ngü̃xẽẽca̱x ípecagü, erü nüxü̃ perüchaue nax chauga pexĩnüexü̃.
23 Rü pema rü tama cha̱u̱xca̱x ípenagu ga carnérugü rü tama to i ãmaregü choxna pexãgü nax namaxã choxü̃ picua̱xüü̃güxü̃ca̱x. Rü choma rü tama naxca̱x pexü̃ chaca̱a̱xü̃ nax ãmaregü choxna pexãxü̃ rü tama pexü̃ chachixewe nax pumarate̱xe cha̱u̱xca̱x ípeguxü̃.
24 Rü tama naxca̱x pexü̃ chataxexẽxẽ ya dexne ya yixicü nax choxna penaxãmarexü̃ca̱x. Rü tama naxca̱x íchaca nax naxü̃naarü chíxü̃ cha̱u̱xca̱x piguxü̃ nax ngẽmamaxã choxü̃ petaãẽxẽẽxü̃ca̱x. Rü pema rü perü pecadugümaxã choxü̃́ penaxütanü.
25 Natürü i choma nax perü Tupana chixĩxü̃ rü tá íchanapigü rü nüxü̃ ichayarüngü̃ma i guxü̃ma i perü pecadugü rü chixexü̃gü i chope̱xewa pexüxü̃.
26 Rü ngẽxguma chi nagu perüxĩnüegu nax dora yixĩxü̃ nax chixexü̃ chope̱xewa pexüxü̃, rü ngĩxã nachiga tidexagü nax nüxü̃ icuáxü̃ca̱x rü aixcüma yixĩxü̃ i nataxuxü̃ma i perü chixexü̃ i chope̱xewa pexüxü̃.
27 Rü yema nüxíraxü̃xü̃ ga perü o̱xi rü chope̱xewa chixexü̃ naxü, rü yema perü ngúexẽẽruü̃gü rü chomaxã nanue rü tama chauga naxĩnüechaü̃.
28 Rü ngẽma perü ãẽ̱xgacügü rü chixexü̃ nawa naxügü ga chopata ya taxü̃ne. Rü yemaca̱x nixĩ ga nüxna chixũgachixü̃ ga Acóbuarü duü̃xü̃gü ga Iraétanüxü̃ nax norü uanügü nada̱i̱xü̃ca̱x rü chixexü̃ namaxã yaxugüexü̃ca̱x —ñanagürü ya Tupana.
