Isaías 45:1-25
45 Rü nüma ga Tupana rü ãẽ̱xgacüwa Chíruxü̃ nanguxẽxẽ ga Pérchiaanewa. Rü pora nüxna naxã nax togü i nachixü̃anegümaxã inacuáxü̃ca̱x rü norü ãẽ̱xgacügüxü̃ naporamaexü̃ca̱x. Rü guma ĩanegü ga namaxã nügü nada̱i̱xü̃ne rü Tupana Chírupe̱xewa nayawãxna ga guma ĩanegüarü ĩã̱xgü rü taxúema tapora nax wena tanawãxtaxü̃.
2 Rü nüma ga Tupana rü Chíruxü̃ ñanagürü: —Choma rü tá cupe̱xegu chixũ, rü yima ma̱xpǘnegü rü tá chanadoxõchixẽxẽgü. Rü ngẽma ĩã̱xgü i bróũchenaxca̱x rü tá nagu chapogü. Rü ngẽma norü fierumena̱xãgü rü íxraxü̃gu tá ichanapóü̃gü.
3 Rü choma rü tá cuxna chanaxã i diẽrugü i icu̱xgüxü̃ rü ngẽmaxü̃gü i ẽxü̃guxü̃ i nachicagügu nanuxü̃ nax ngẽmaãcü nüxü̃ cucuáxü̃ca̱x nax choma chixĩxü̃ i Cori ya Iraétanüxü̃arü Tupana. Rü choma nixĩ i cuégamaxã cuxca̱x chacaxü̃.
4 Rü poraãcü nüxü̃ changechaü̃ i chorü duü̃xü̃gü i Iraétanüxü̃ i Acóbuarü duü̃xü̃gü, rü ngẽmaca̱x cuégamaxã cuxca̱x chaca rü cuxü̃ chaxuneta nax ãẽ̱xgacü quixĩxü̃ca̱x woo tama choxü̃ cucua̱x i cumax.
5 45:5-6 Rü choma nixĩ ya Tupana chixĩxü̃ rü nataxuma i to. Rü chaxicatama nixĩ ya Tupana chixĩxü̃. Rü woo nax tama choxü̃ cucuáxü̃, natürü i choma rü cua̱x cuxna chaxã nax daixü̃ cucuáxü̃ca̱x, nax ngẽmaãcü guxü̃ma i duü̃xü̃gü i ñoma i naanewa maxẽxü̃ rü nüxü̃ nacua̱xgüxü̃ca̱x nax chaxicatama Tupana chixĩxü̃.
6 Nüü̃ nadau 45:5
7 Rü choma nixĩ ga chanango̱xẽẽxü̃ ga ngóonexü̃ rü waanexü̃. Rü choma nixĩ i íchananguxẽẽxü̃ i mexü̃ rü guxchaxü̃. Rü chomatama ya Tupana nixĩ i chanaxüxü̃ i guxü̃ma i ngẽma —ñanagürü.
Tupana rü guxü̃arü üruxü̃ nixĩ
8 Rü ñanagürü ga Tupana: —Choma rü dauxü̃wa tá ne chanamu i chorü ngü̃xẽxẽ, ñoma daxũwa rünguxü̃ i cherenarüxü̃ rü ñoma caixanexü̃wa ne ũcü ya pucürüxü̃. Rü ñoma i naanewa tá nangu i chorü ngü̃xẽxẽ nax ngẽmaãcü Iraétanüxü̃xü̃ íchanguxü̃xẽẽxü̃ca̱x nawa i norü guxchaxü̃gü —ñanagürü.
9 Rü ñanagürü ga Tupana: —Wüxi i naxpáü̃ i waixü̃münaxca̱x rü tama norü üruü̃xü̃maxã narüxutaga. Rü ngẽma waixü̃mü rü tama ngẽma üwechiruü̃xü̃ ñanagürü: “¿ta̱xacü ícuxü?” ñanagürü. Rü ngẽma napáxü̃ rü tama norü üruü̃xü̃ ñanagürü: “Cuma rü tama nüxü̃ cucua̱x nax mea choxü̃ cuxüxü̃”, ñanagürü.
10 Rü woo wüxi i buxü̃ rü tama nanatüxü̃ rü naéxü̃ nanga naxca̱x nax ñoma i naanewa tanango̱xẽẽxü̃.
11 Rü ngẽmaca̱x i choma ya Tupana ya Üünecü ya Iraétanüxü̃xü̃ ngo̱xẽẽcü rü pexü̃ ñachagürü: “Pemax, taxuacüma choxna naxca̱x peca nachiga i ngẽma yixcüra tá nüxü̃ ngupetüxü̃ i chorü duü̃xü̃gü. Rü taxuacüma choxü̃ pengu̱xẽxẽ nax ñuxãcü tá chanaxüxü̃ i ngẽma chaxüxchaü̃xü̃.
12 Rü choma nixĩ ga chaxüxü̃ ga ñoma i naane rü ngẽma nawa maxẽxü̃. Rü choma nixĩ ga cho̱xme̱xmaxã chanaxüxü̃ ga daxũguxü̃ ga naane, rü chanangóexẽẽxü̃ ga ẽxtagü.
13 Rü choma nixĩ ga chanango̱xẽẽxü̃ ga Chíru ga Pérchiaanearü ãẽ̱xgacü. Rü ñu̱xma rü tá nüxü̃ charüngü̃xẽxẽxü̃ i guxü̃wa nax wena naxüaxü̃ca̱x ya chorü ĩane ya Yerucharéü̃. Rü nüma i Chíru rü ngetanüãcüma tá ínananguxü̃xẽxẽ i ngẽma Iraétanüxü̃ i to ga naanewa ne nagagüxü̃. Rü choma ya Cori ya Tupana ya Guxãétüwa Ngẽxmacü nixĩ i ngẽma ñachaxü̃” —ñanagürü.
14 Rü nüma ya Tupana rü Iraétanüxü̃xü̃ ñanagürü ta: —Ngẽma Equítuanecüã̱xgü i naanewa puracüexü̃, rü ngẽma Etiopíaanecüã̱xgü i taxetanüxü̃, rü ngẽma Chabácüã̱xgü i imáchanexü̃chixü̃ rü tá cuxme̱xwa nangẽxmagü. Rü cadénamaxã íchotachacüüãcü tá cuwe narüxĩ. Rü cupe̱xegu tá nacaxã́pü̱xügü rü ñanagürügü tá: “Aixcümaxü̃chi nixĩ i cutanüwa nangẽxmaxü̃ ya Tupana rü nataxuma i to ya Tupana”, ñanagürügü tá —ñanagürü ga Tupana.
15 Rü Ichaía rü ñanagürü: —Pa Tupanax, tama cuxü̃ tadau, natürü cuma nixĩ i ícunanguxü̃xẽẽxü̃ i Iraétanüxü̃.
16 Rü guxü̃ma i ngẽma naxchicüna̱xãgü ügüxü̃ nax namaxã natupanaã̱xgüxü̃ca̱x rü tá naxãnee rü duü̃xü̃gü tá nüxü̃ nacugüe rü tá narümaachitanü.
17 Natürü i Iraétanüxü̃ rü Tupana ínananguxü̃xẽxẽ nax tagutáma togüme̱xẽwa nangẽxmagüxü̃ca̱x. Rü tagutáma naxãnee rü tagutáma narümaachitanü —ñanagürü.
18 Rü choma ya Tupana ya naxücü i daxũguxü̃ i naane rü ñoma i naane rü guxü̃ma i nawa ngẽxmagüxü̃ nax tama nangeãcuxü̃ca̱x, rü ñachagürü: —Choma nixĩ ya Tupana chixĩxü̃ rü nataxuma i to.
19 Rü choma rü tama ẽxü̃guxü̃wa rü waanexü̃wa chidexa. Rü tama Acóbutanüxü̃xü̃ ñacharügü: “¡Cha̱u̱xca̱x peda̱u̱x natürü taxũtáma choxü̃ peyangau!” ñachagürü. Rü choma ya Tupana rü guxü̃guma aixcümaxü̃ chixu. Rü ngẽma nüxü̃ chixuxü̃ rü aixcüma name —ñanagürü.
Cori ya Tupana rü namaxã nanu i ngẽma duü̃xü̃gü i tupananetachicüna̱xãgüxü̃ icua̱xüü̃güxü̃
20 Rü nüma ya Tupana rü ñanagürü ta: —Guxü̃ma i pema i togü i nachixü̃anewa íyaxügüxe rü name nixĩ nax pexĩtaque̱xexü̃ rü nua pexĩxü̃. Rü pema i naxchicüna̱xãgü i nainaxca̱x pingegüxü̃ rü nüxü̃ picua̱xüü̃güxü̃ rü tama peãẽxü̃ pecua̱x, erü ngẽma naxchicüna̱xãgü rü taxũtáma pexü̃ ínapoxü̃.
21 Rü pema nax naxchicüna̱xãgümaxã petupanaã̱xgüxü̃ rü name nax pegüna pecagüxü̃ rü choxü̃ penawéxü̃ i ta̱xacüwa pexü̃ nangü̃xẽẽxü̃ i ngẽma perü tupanagü i nainaxca̱x. ¿Rü texé tixĩ ga noxriarü ügügu naxü̃pa nüxü̃ ixuxe i ngẽma tá ngupetüxü̃? ¿Rü texé tixĩ ga nũxcüma nüxü̃ ixuxe ga yema? ¿Rü tama ẽ̱xna choma ya Cori ya Tupana yixĩxü̃? Rü nataxuma i to ya Tupana, rü chaxicatama nixĩ i choxü̃́ nangẽxmaxü̃ i pora nax pexü̃ chimexẽẽgüxü̃ rü pexü̃ íchanguxü̃xẽẽxü̃.
22 Rü pema i yáxü̃wa maxẽxe, rü cha̱u̱xca̱x pexĩ rü choma rü tá pexü̃ íchanguxü̃xẽxẽ, erü chaxicatama nixĩ ya Tupana chixĩxü̃ rü nataxuma i to.
23 Rü ngẽma chauégagu nüxü̃ chixuxü̃ rü aixcüma nixĩ rü ngẽma chorü ore rü aixcüma tá ningu. Rü guxü̃táma, rü chope̱xegu tá nacaxã́pü̱xügü rü chauégagu tá nüxü̃ nixu nax chauga tá naxĩnüexü̃.
24 Rü ngẽxguma rü tá ñanagürügü: “Cori ya Tupanaxicatama nixĩ ya ixaixcümacü ya pora tüxna ãcü”, ñanagürügü tá. Rü guxü̃ma i ngẽma chauxchi aiexü̃ rü tá naxãnee.
25 Rü guxü̃ma i Iraétanüxü̃ rü chaugagu tá narüporamaegü rü tá chomaxã nügü nicua̱xüü̃gü —ñanagürü.
