Isaías 46:1-13
46 Ngẽma Babiróniaanearü tupananeta i Béx rü narüpü rü ngẽma tupananeta i Nébu rü niwa̱x. Rü nüma i Babiróniacüã̱x rü búrugü i ípaexü̃étügu nananugü nax yangegüãxü̃ca̱x i ngẽma tupananetagü i yaxüchixü̃.
2 Rü ngẽma naxchicüna̱xãgü rü niwa̱x rü taxuacüma nügü ínapoxü̃. Rü ngẽma uanügü rü wüxigu ngẽma duü̃xü̃gümaxã to i nachixü̃anewa nanana.
3 Rü ñanagürü ga Tupana: —¡Choxü̃́ iperüxĩnüe i pemax nax ípeyaxügüxü̃, Pa Acóbutanüxü̃ i Iraétanüxü̃x! Choma rü noxrigutama yexguma taxũta pebuegu, rü pexna chadau rü chauchacüxügu pexü̃ chigagü.
4 Rü guxü̃gutáma pexü̃ charüngü̃xẽẽxü̃ woo marü yaxguã̱xwa pingugügu rü pipuxerugügu. Rü choma rü tá pexna chadau, rü tá pexü̃ charüngü̃xẽxẽxü̃, rü tá pexü̃ íchanguxü̃xẽxẽ erü choma nixĩ ga pexü̃ changóexẽẽxü̃.
5 ¿Rü texégu nixĩ i choxü̃ penguxü̃? ¿Rü nagu perüxĩnüegu rü texémaxã chawüxigu?
6 Rü nangẽxma i duü̃xü̃gü i nanutaque̱xexü̃ i taxü̃ i úiru rü diẽru nax naxca̱x nadauxü̃ca̱x i wüxi i naxchicüna̱xãarü üruxü̃. Rü nüxü̃́ nanaxütanü nax nüxü̃́ naxüaxü̃ca̱x i wüxi i naxchicüna̱xã nax ngẽmamaxã natupanaã́xü̃ca̱x, rü nüxü̃ yacua̱xüü̃xü̃ca̱x rü nape̱xegu nacaxã́pü̱xüxü̃ca̱x.
7 Rü nügüãtügu nayangegü i ngẽma naxchicüna̱xã rü wüxi i nachicagu nayaxǘgü, rü ngéma nangẽxmaecha rü taguma nixũgachi. Rü woo aita naxca̱x naxüegu rü ngü̃xẽẽca̱x nüxna nacagügu i ngẽma naxchicüna̱xã i namaxã natupanaã̱xgüxü̃, natürü tama nanangãxü̃ rü tama ínananguxü̃xẽxẽ nawa i norü guxchaxü̃gü.
8 46:8-9 ¡Rü nüxna pecua̱xãchie, Pa Pecadugu Maxẽxü̃x, rü mea nagu perüxĩnüe ga yema nũxcümamatama ngupetüxü̃ rü peãẽgu namaxã penguxü̃! Rü choma nixĩ ya Tupana chixĩxü̃ rü nataxuma i to. Rü choma nixĩ ya Tupana rü tataxuma ya texé ya chomaxã wüxiguxe.
9 Nüü̃ nadau 46:8
10 Rü choma rü noxriarü ügügutama rü ñu̱xmata norü gu̱xwa nangu rü nüxü̃ chixu i ngẽma tá wüxichigü i ngunexü̃ ngupetüxü̃. Rü naxü̃patama nüxü̃ chixu i ngẽma tá ínguxü̃. Rü choma nüxü̃ chixu, rü ngẽma nagu charüxĩnüxü̃ rü tá ningu. Rü ngẽma nüxü̃ chixuxü̃ rü tá chayanguxẽxẽ.
11 Rü choma rü éstewa naxca̱x chaca i Pérchiaarü ãẽ̱xgacü i Chíru. Rü nüma rü tá yáxü̃wa ne naxũ nax naxüaxü̃ca̱x i ngẽma choma nagu charüxĩnüxü̃. Rü nüma rü ñoma ĩyü i poraxüchixü̃rüxü̃ tá nixĩ. Rü choma rü ngẽma nüxü̃ chixuxü̃ãcü tá chanaxü.
12 46:12-13 ¡Rü choxü̃́ iperüxĩnüe Pa Duü̃xü̃gü i Taxúegama Ĩnüexü̃! Pema nüxü̃ pecua̱xgu rü taxũtáma paxa pexü̃ íchanguxü̃xẽxẽ. Natürü pemaxã nüxü̃ chixu rü marü ningaica nax pexü̃ íchanguxü̃xẽẽxü̃ rü marü taxũtáma nũxcü nixĩ. Rü choma rü tá Chióü̃xü̃ íchanguxuchixẽxẽ rü Iraétanüxü̃xü̃ tá chanawe̱x i chorü pora —ñanagürü ga Tupana.
13 Nüü̃ nadau 46:12
