Isaías 47:1-15
47 Rü ñanagürü ga Tupana: —Pa Babiróniacüã̱xgüx, noxri rü muxü̃ma ga nachixü̃anegümaxã ipecua̱xgü natürü i ñu̱xma rü marü peturae rü waixü̃müte̱xewa tá perütogü. Rü yima perü ĩane ga noxri wüxi i pacü i mexẽchicürüxü̃ ixĩxü̃ne rü duü̃xü̃gü rü marü tagutáma nüxü̃ nixugüe nax namexẽchixü̃.
2 Rü ñu̱xma rü marü taxũtáma tauxchaxü̃wa pengẽxmagü. ¡Rü penayaxu̱x ya perü nuta ya tríguarü caruxü̃ nax arína pexügüxü̃ca̱x! ¡Rü ípecuxü̃ i pexchiru i mexü̃ rü puracüchirugu picu̱xgü! ¡Rü pegü pengenagüchirugü nax nangóxü̃ca̱x ya peparagü rü ngẽmaãcü pichoü̃xü̃ca̱x i natügüwa!
3 47:3-4 Rü choma ya Tupana ya Iraétanüxü̃arü nguxü̃xẽxẽruxü̃ ya üünecü ya guxãétüwa ngẽxmaxe rü tá pexü̃ chapoxcu, Pa Babiróniacüã̱x, rü taxúetama pexü̃ ítapoxü̃. Rü pema rü ñoma wüxi i duü̃xü̃ i ngexchiruxü̃nexü̃rüxü̃ tá pexãnee nape̱xewa i ngẽma togü i nachixü̃anecüã̱xgü —ñanagürü.
4 Nüü̃ nadau 47:3
5 Rü nüma ya Cori ya Tupana rü ñanagürü ta: —¡Bexma iperücho, Pa Babiróniaanecüã̱xgüx, rü ẽanexü̃wa pebuxmü! Erü marü tagutáma wena ngẽma togü i nachixü̃anegüétüwa pexügü.
6 Rü yexguma namaxã chanuxgu ga yema chorü duü̃xü̃gü ya Iraétanüxü̃ rü pexna chanawogü nax namaxã ipecuáxü̃ca̱x. Natürü ga pemax, Pa Babiróniaanecüã̱xgüx, rü tama pexü̃́ nangechaü̃tümüxü̃gü, rü woo ga guxema norü yaxguã̱xgü rü chixri tümamaxã ipecua̱x.
7 Rü peãẽwa nagu perüxĩnüe rü ñaperügügü: “Guxü̃gutáma ngẽma togü i nachixü̃anegüétüwa taxügü”, ñaperügügü. Natürü tama nagu perüxĩnüe rü tá iyagúxü̃ nax ngẽma togü i nachixü̃anegümaxã ipecuáxü̃.
8 Rü ngẽmaca̱x i ñu̱xmax, Pa Babiróniaanecüã̱x i Ñoma Ngecü i Ngĩrü Meruü̃guxica Rüxĩnücürüxü̃ Pixĩgüx, rü pema rü petaãxẽ nax wüxi i mexü̃wa pengẽxmagüxü̃. Rü pegüãẽwa ñaxü̃gu perüxĩnüe: “Tataxuma ya texé ya taxrüxü̃ poraxe. Rü tagutáma guxchaxü̃wa tangexmagü rü tagutáma taturae”, ñaxü̃gu perüxĩnüe.
9 Natürü pemaxã nüxü̃ chixu rü ngürüãchi wüxitama i ngunexü̃gu tá pexca̱x ínangu i ngẽma taxre i chixexü̃ nax nayuexü̃ i perü ãẽ̱xgacügü i poraexü̃ rü nayuexü̃ i pexacügü. Rü ñoma wüxi i ngexü̃ i yutexü̃rüxü̃ tá pixĩgü rü woo nax peyuüechiréxü̃ rü naguxü̃raü̃xü̃ i ẽxü̃guxü̃ i chixexü̃xü̃ nax pecuáxü̃.
10 Rü pema nax chixexü̃gu pemaxẽxü̃ rü nüxü̃ pecua̱xgu rü tagutáma pexca̱x ínangu i guxchaxü̃gü. Rü peãẽwa nagu perüxĩnüe rü ñaperügügü: “Taxuxü̃ma tüxü̃ nadau”, ñaperügügü. Rü ngẽma perü cua̱xgü rü pexü̃ nawomüxẽxẽ. Rü peãẽwa nagu perüxĩnüe rü ñaperügügü: “Yixicatama nixĩ iporaexü̃ rü nataxuma i to”, ñaperügügü.
11 Natürü tá pexca̱x ínangu i guxchaxü̃gü. Rü taxũtáma ípenapoxü̃ woo nax piyuüechiréxü̃ rü ẽxü̃guxü̃xü̃ picuáxü̃. Rü pexca̱x tá ínangu i wüxi i taxü̃ i guxchaxü̃ i taxucürüwa na̱xcha̱xwa pibuxmüxü̃. Rü wüxi i guxchaxü̃ i tama nagu perüxĩnüexü̃ tá ngürüãchi pexca̱x ínangu.
12 Pa Babiróniacüã̱xgüx, ¡ẽcü nagu pexĩ i ngẽma perü yuügü ga ü̃pacürüwa nagu pemaxẽxü̃ nax ngẽmaãcü nüxü̃ pecuáxü̃ca̱x nax ta̱xacüwa pexü̃́ namexü̃ rü texéxü̃ tá namaxã ípeba̱i̱xgüxü̃ i ngẽma nax ẽxü̃guxü̃xü̃ pecuáxü̃!
13 ¡Rü ñu̱xma rü chope̱xewa naxĩ i ngẽma perü ucu̱xẽruü̃gü i cua̱x nüxü̃́ ngẽxmagüxü̃ rü muxü̃ma i ucu̱xẽgü pexna ãgüxü̃! ¡Rü nua naxĩ i ngẽma ẽxtagüxü̃ rüdaunüxü̃ nax ngẽmawa nüxü̃ nacua̱xgüxü̃ca̱x i ngẽma tá ngupetüxü̃ rü aixcüma tá pexü̃ ínapoxü̃gü nawa i ngẽma ãũcümaxü̃ i pexca̱x ínguxchaü̃xü̃!
14 Natürü ngẽma ẽxü̃guxü̃xü̃ cua̱xgüxü̃ rü ñoma maxẽ ya ipagücü rü ixaecürüxü̃ tá nixĩgü, rü taxũtáma ngẽma üxüemawa nügü ínapoxü̃gü. Erü ngẽma üxüema rü taxũtáma ngẽma íxramarexü̃ i üxüema i yigü nawa inaixü̃xü̃rüxü̃ tá nixĩ.
15 Rü ngẽma ẽxü̃guxü̃xü̃ cua̱xgüxü̃ ga ü̃pacürüwa nüxna peca̱xgüxü̃, rü wüxichigü rü tá norü doragu narütauxe rü taxũtáma pexü̃ ínapoxü̃ —ñanagürü ya Tupana.
