Isaías 48:1-22
48 Rü Tupana rü ñanagürü: —¡Perüxĩnüe Pa Acóbuarü Duü̃xü̃güx, Pa Iraétanüxü̃x, Pa Yudátaagüx! Pema rü Cori ya Tupanaégagu pegü pixu nax norü duü̃xü̃gü pixĩgüxü̃. Rü perü yumüxẽwa naxca̱x ípeca̱x i norü ngü̃xẽxẽ, natürü tama aixcüma naga pexĩnüe.
2 Pema rü nüxü̃ pixu nax yima ĩane ya üünene ya Yerucharéü̃wa pemaxẽxü̃ rü Iraéarü Tupana ya Guxãétüwa Ngẽxmacüarü duü̃xü̃gü pixĩgüxü̃, rü ngẽmaãcü pegü ípepoxü̃.
3 Rü yema marü ngupetüxü̃, rü choma rü naxü̃pa ga nax yanguxü̃ rü pemaxã nüxü̃ chixu. Rü chomatama nixĩ ga chanaxunagüxü̃ rü paxa chanaxüxü̃ ga yema nüxü̃ chixuxü̃, rü aixcüma ningu.
4 Rü choma rü nüxü̃ chacua̱x nax tama nüxü̃ pecua̱xégaxü̃ rü pitaieruxü̃ rü ñoma fieru rü bróũche i tama irüwe̱xãchixü̃rüxü̃ pixĩgü.
5 Rü ngẽmaca̱x ü̃pacürüwatama, rü naxü̃pa nax yanguxü̃ rü pemaxã nüxü̃ chixu i ngẽma tá ngupetüxü̃ nax ngẽmaãcü tama ñapegügüxü̃ca̱x: “Ngẽma naxchicüna̱xã i namaxã chatupanaã̱x nixĩ i naxüxü̃ i ngẽma”, ñapegügüxü̃.
6 Rü ngẽxguma chi mea nagu perüxĩnüegu i ngẽma nüxü̃ chixuxü̃, rü chi nüxü̃ pecua̱x nax aixcüma yixĩxü̃ i ngẽma. Rü ñu̱xma rü tá pemaxã nüxü̃ chixu i ngexwaca̱xü̃xü̃ i oregü i ẽxü̃guxü̃ rü taguma nüxü̃ pecuáxü̃.
7 Rü ñu̱xma rü tá chanango̱xẽxẽ i wüxi i ta̱xacü i ngexwaca̱xü̃xü̃ i tama nũxcüma üpetüxü̃ rü ñu̱xma rü ta tama nüxü̃ pexĩnüexü̃. Rü ngẽmaãcü taxucürüwa nüxü̃ pixu nax marü nüxü̃ pecuáxü̃ i ngẽma.
8 Rü pema rü taguma nüxü̃ pexĩnüechiga rü tama nüxü̃ pecua̱x i ngẽma, erü choma rü nüxü̃ chacua̱x nax tama chomaxã pixaixcümagüxü̃, rü noxritama pengóegu rü taguma chauga pexĩnüexü̃.
9 Natürü i choma rü pemaxã yáxna chaxĩnü erü chaugünatama chadau. Rü ngẽxguma chanuxgu rü chaugünatama chachogü nax tama pexü̃ chadaixü̃ca̱x.
10 Rü tama ñoma diẽrumü üxüwa iguxü̃rüxü̃ pexü̃ chimexẽẽgü, natürü i choma rü pexü̃ chimexẽẽgü namaxã i ngẽma ngúxü̃ i pexü̃ chingexẽẽxü̃.
11 Rü ngẽmaãcü chanaxü erü chaugünatama chadau nax taxúema chixri chauchiga idexaxü̃ca̱x. Rü tama chanaxwa̱xe nax chauchicüxü ta̱xacürü tupananetaxü̃mare picua̱xüü̃güxü̃ —ñanagürü.
Tupana rü Babiróniaanecüã̱xme̱xẽwa Iraétanüxü̃xü̃ ínanguxü̃xẽxẽ
12 Rü ñanagürü ga Tupana: —¡Perüxĩnüe Pa Acóbuarü Duü̃xü̃güx, Pa Iraétanüxü̃x! Choma nixĩ i pexü̃ chadexü̃. Rü chaxicatama nixĩ ya Tupana chixĩxü̃, rü guxü̃guma changexmaecha rü taguma icharüxo.
13 Rü choma nixĩ ga chorü poramaxã chanaxüxü̃ ga daxũguxü̃ i ĩane rü ñoma i naane. Rü yexguma naégaxü̃ chixuxgu rü nangóe ga daxũguxü̃ i naane rü ñoma i naane.
14 ¡Rü guxãma i pemax, Pa Iraétanüxü̃x, rü pengutaque̱xegü rü choxü̃́ iperüxĩnüe! ¿Rü petanüwa texé tanaxunagü i ngẽma tá ngupetüxü̃? Rü yimá Tupana nüxü̃ ngechaxü̃cü rü tá nayanguxẽxẽ i ngẽma Tupana nagu rüxĩnüxü̃ rü tá Babiróniaxü̃ napoxcu. Rü tá nanapoxcu i guxü̃ma i ngẽma Cadéuanecüã̱xgü.
15 Rü choma nixĩ i Chírumaxã nüxü̃ chixuxü̃ rü naxca̱x changemaxü̃ nax nua naxũxü̃ca̱x. Rü ngextá nüma ínaxũxü̃wa rü tá narüporamae.
16 ¡Rü nua pexĩ rü choxü̃́ iperüxĩnüe! Rü guxü̃ma ga yema nagu charüxĩnüxü̃ rü noxriarü ügügucürüwa rü taguma cúãcü nüxü̃ chixu. Rü yexguma Chíru Babiróniaxü̃ rüporamaegu rü choma rü yéma chayexma. Rü ñu̱xma i choma ya Cori ya Tupana ya Guxü̃étüwa Changexmaxü̃ rü chanamu i Chíru rü nüxna chanaxã i pora —ñanagürü.
17 Rü choma ya Iraétanüxü̃arü Tupana ya Üünecü ya perü ngü̃xẽẽruxü̃ ixĩcü rü ñachagürü: —Pa Iraétanüxü̃x, choma nixĩ i perü Tupana chixĩxü̃, rü choma rü pexü̃ changúexẽxẽ i ngẽma pexü̃́ mexü̃, rü pemaxã nüxü̃ chixu i ngẽma chanaxwa̱xexü̃ nax penaxüxü̃.
18 ¡Rü chierüx chauga pexĩnüegu! Rü yexguma chi naga pexĩnüegu ga chorü mugü rü ngẽma perü taãxẽ rü chi nixĩnagüchigü ñoma wüxi i natü irübaichigüxü̃rüxü̃, rü ngẽma perü taãxẽ rü ñoma már arü yuaperüxü̃ chi nata.
19 Rü yexguma chi naga pexĩnüegu ga chorü mugü rü ngẽma petaagü rü chi namuxũchi ñoma márwa ngẽxmacü ya naxnecürüxü̃, rü choma rü taguchima pexü̃ chadai, rü taguchima pexna chixũgachi.
20 ¡Ípechoxü̃ i Babiróniaanewa rü pibuxmü i ngẽma nachixü̃anewa! ¡Rü taãẽmaxã nüxü̃ pixu nax marü ípenguxü̃xü̃! ¡Rü guxü̃wama i ñoma i naanewa nüxü̃ pixu rü ñapegü: “Tupana rü norü duü̃xü̃gü i Acóbutanüxü̃xü̃ ínanguxü̃xẽxẽ”, ñapegü! —ñanagürü.
21 Rü woo yema taxü̃ ga naxnecüanewa pexü̃ nachopetüxẽxẽ, natürü tama pita̱xawae yerü nüma ga Tupana rü nanangǘxte̱xẽxẽ ga nuta rü yéma nayagoxü̃chíüxẽxẽ ga dexá.
22 Natürü naxca̱x i ngẽma chixri maxẽxü̃ rü nataxuma i taãxẽ. Rü nüma ya Cori ya Tupana nixĩ i ngẽma ñacü.
