Isaías 49:1-26
49 Pema i nachixü̃anegü i márpechinüwa ngẽxmagüxü̃ rü pema i nachixü̃anegü i yáxü̃wa ngẽxmagüxü̃, ¡rü choxü̃́ iperüxĩnüe! Nüma ya Cori ya Tupana choxü̃ naxuneta naxü̃pa nax chabuxü̃. Rü nüxü̃ nixu i chauéga ga yexguma chaueanüwatama chayexmagu.
2 Rü Tupana rü ñoma tara i meama téxü̃rüxü̃ nayaxĩxẽxẽ ya chorü conü, rü naxme̱xmaxã choxü̃ ínapoxü̃. Rü ñoma ochagu ya meama ãmaguxnerüxü̃ choxü̃ nixĩxẽxẽ rü nachixü̃gu chomaxã nanguxü̃.
3 Rü ñanagürü choxü̃: —Pa Iraéx, cuma rü chorü duü̃ quixĩ rü cuwa tá chanango̱xẽxẽ i chorü pora —ñanagürü.
4 Natürü ga choma rü nagu charüxĩnü rü chaugümaxã ñachagürü: —Natüca̱xmamare poraãcü chapuracü rü chipa, rü taxuxü̃ma i chorü natanüxü̃ chadau —chaugümaxã ñachagürü. Natürü guxü̃ma i ngẽma chaxüxü̃ rü Tupaname̱xẽwa nangẽxma, rü norü poramaxã chanaxü. Rü ngẽma chorü natanü rü nüma rü marü ínanamexẽxẽ.
5 Rü nüma ya Cori ya Tupana rü chauéanüwa choxü̃ nango̱xẽxẽ nax norü duü̃xü̃ chixĩxü̃ca̱x rü ngẽmaãcü Iraétanüxü̃ i Acóbuarü duü̃xü̃güxü̃ naxca̱x chawoeguxẽẽxü̃ca̱x nax wenaxarü norü duü̃xü̃gü yixĩgüxü̃ca̱x. Rü Tupanape̱xewa rü poraãcü nüxü̃́ chame rü ngẽmaca̱x choxü̃ naporaxẽxẽ. Rü ngẽma nixĩ i nagu charüxĩnü.
6 Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.
7 Rü nüma ya Iraétanüxü̃arü Tupana ya Üünecü ya nüxü̃ rüngü̃xẽẽcü rü ñanagürü ta: —Pa Iraétanüxü̃x, ñu̱xma rü ngẽma togü i nachixü̃anecüã̱xgü rü poraãcü pexü̃ nacugüe, rü pexchi naxaie rü nügüme̱xẽwa penangexmagüxẽxẽ rü norü ãẽ̱xgacügüarü puracütanüxü̃ pixĩgü. Natürü wüxi i ngunexü̃ rü wenatáxarü peporae rü ngẽxguma pexü̃ nadaugügu i ngẽma togü i nachixü̃anegüarü ãẽ̱xgacügü rü pepe̱xegu tá nacaxã́pü̱xügü erü choma ya perü Tupana ya üünecü nax chixĩxü̃ rü pexü̃ chaxuneta nax chorü duü̃xü̃gü pixĩgüxü̃ca̱x. Rü choma rü guxü̃guma chayanguxẽxẽ i ngẽma nüxü̃ chixuxü̃ —ñanagürü.
Wena tá naporae i Iraétanüxü̃
8 Rü nüma ya Cori ya Tupana rü ñanagürü ta: —Yexguma nawa nanguxgu ga ngunexü̃ nax chorü ngü̃xẽẽca̱x ípecaxü̃ rü choma rü pexü̃ chanawe̱x nax pexü̃ changechaü̃xü̃. Rü yexguma penaxwa̱xegu nax pexü̃ íchapoxü̃xü̃ rü pexü̃ charüngü̃xẽxẽxü̃. Rü ñu̱xma i choma rü tá pexna chadau nax wüxi i ngü̃xẽxẽ nüxü̃́ pixĩgüxü̃ca̱x i togü i duü̃xü̃gü. Rü ngẽmaca̱x i pemax, Pa Iraétanüxü̃x, rü wena tá nawa pemaxẽ i ngẽma naanegü ga perü uanügü chixexẽẽgüxü̃ rü ngẽmaãcü tá wena penamexẽxẽ i pechixü̃ane.
9 Rü pema rü tá ñaperügü nüxü̃ i ngẽma poxcuexü̃: “¡Marü ípenguxü̃!” ñaperügü tá. Rü ngẽma ẽanexü̃wa ngẽxmagüxü̃ rü tá ñaperügü nüxü̃: “¡Ípechoxü̃ rü nangóonexü̃wa pexĩ!” ñaperügü tá. Pema rü guxü̃ma i namagücüwawa tá nüxü̃ peyangau i mecü ya maxẽ, rü guxü̃ne ya ma̱xpǘnegüwa rü tá nayima ya maxẽ naxca̱x i perü wocagü.
10 Rü taxũtáma petaiyae rü pita̱xawae rü taxũtáma üa̱xcü pexü̃́ nangu̱x, erü choma rü pexü̃ changechaü̃ rü pemaxã ichacua̱x, rü dexá íngẽxmaxü̃wa tá pexü̃ chagagü.
11 Rü ma̱xpǘneanegu tá chayadaxẽxẽ i wüxi i nama rü tá ichayanawéanexẽxẽ i ngẽma namagü nax ngẽmagu pexĩxü̃ca̱x —ñanagürü ga Tupana.
12 Rü pema ya Iraétanüxü̃ rü tá yáxü̃wama ne pexĩ, rü ñuxre rü nórtewaama rü togü rü oéstewaama rü togü rü Equítuanearü súrwaama tá ne pexĩ.
13 ¡Pa Daxũguxü̃ i Naanex, taãẽãcü Tupanaxü̃ icua̱xüxü̃! ¡Rü Pa Ñoma i Naanex, poraãcüma nataãxẽ! ¡Rü Pa Ma̱xpǘnegüx, taãxẽãcü Tupanaxü̃ picua̱xüxü̃gü! Erü nüma ya Cori ya Tupana rü nanataãẽxẽxẽ i norü duü̃xü̃gü i ngúxü̃ ingegüxü̃, erü nüxü̃́ nangechaü̃tümüxü̃gü.
14 Nüma i Chióü̃cüã̱xgü rü ñanagürügü: —Cori ya Tupana rü marü tüxna nixũgachi rü tüxü̃ ínawogü —ñanagürügü.
15 Natürü nüma ya Cori ya Tupana rü ñanagürü: —¿Ẽ̱xna wüxi i mama rü tá nüxü̃ yanangümaxü̃ nax ngĩnexü̃ nangechaxü̃xü̃? Rü woo ngĩma ngĩnexü̃ nangümagu, natürü i choma rü tagutáma pexü̃ icharüngüma.
16 Rü yima perü ĩane ya Yerucharéü̃ rü cho̱xme̱xgu naxümatü i naéga, rü taguma nüxü̃ icharüngüma i ngẽma norü poxeguxü̃tápü̱x.
17 Rü ngẽma perü uanügü i perü ĩane chixexẽẽgüxü̃ rü paxa tá ínixĩ. Rü paxa tá ínangugü nax wena tá namexẽẽgüxü̃ ya perü ĩane.
18 ¡Rü dücax, yea pecüwagu perüdaunü nax ñuxãcü guxü̃ma i Iraétanüxü̃ ĩtaque̱xexü̃ rü Yerucharéü̃ca̱x woeguxü̃! Rü choma ya Cori ya Tupana rü chauégagu pemaxã nüxü̃ chixu rü guxü̃ma i Yerucharéü̃arü duü̃xü̃gü rü ñoma wüxi i pacü i ãtechaü̃cüarü nga̱xãẽruü̃rüxü̃ tá nixĩ i perü ĩanewa.
19 Rü pemax, Pa Yerucharéü̃cüã̱x, rü woo guxchawa peyexmagü ga noxri, natürü i ñu̱xma rü marü pexna ínixĩ i ngẽma perü uanügü i perü ĩane ya Yerucharéü̃xü̃ chixexẽẽgüxü̃. Rü ñu̱xma rü tá namuxũchi i duü̃xü̃gü i nawa maxẽxü̃ ya yima perü ĩane rü tá nayangechica i ngẽma duü̃xü̃gü i perü naanewa maxẽxü̃.
20 Rü penegü ga noxri to ga nachixü̃anewa gagüxü̃, rü nümagü rü tá pexmachi̱xẽwa ñanagürügü: “Ñaa nachixü̃ane rü toxca̱x naxíanexü̃chi. Rü name i to i nachica toxna pexã nax ngéma tamaxẽxü̃ca̱x”, ñanagürügü tá.
21 Rü ngẽxguma i pema Pa Yerucharéü̃cüã̱xgüx, rü tá peãẽwa ñaperügügü: “¿Texé tixĩ ya tüxna namugüxe i ñaa tanegü? Yixemagü rü tingexacügüchire̱x rü taxuacüma tixãxacü rü tüxü̃xica nua nawogü. ¿Rü texé tixĩxü̃ ya nayaexẽẽ́xẽ i ñaa tanegü? ¿Rü ngextá ne naxĩ?” ñaperügü tá —ñanagürü ya Tupana.
22 Rü ñanagürü ta: —Choma rü tá chanamu i ngẽma togü i nachixü̃anegücüã̱x rü tá nüxna chanaxã i wüxi i cua̱xruxü̃ nax nua nachacüügügu nagagüãxü̃ca̱x i penegü rü naatügügu yagagüãxü̃ca̱x i pexacügü.
23 Rü ngẽma togü i nachixü̃anegüarü ãẽ̱xgacügü rü tá penatürücügü nixĩgü, rü ngẽma naxma̱xgü rü tá peerücügü nixĩgü. Rü pepe̱xegu tá nacaxã́pü̱xügü rü tá nanade̱xexgü i perü mairaxü̃chipatügü. Rü tá nüxü̃ picua̱xãchitanü nax chaxicatama Tupana chixĩxü̃ rü ngẽma choxü̃́ yaxõgüxü̃ rü tagutáma naxãneexü̃ —ñanagürü.
24 Rü wüxi i churara i poraxü̃ rü taxuacüma nüxna tayapu i ngẽma daiwa nayaxuxü̃. Rü wüxi i duü̃xü̃ i iyaxuxü̃ rü taxuacüma niña naxme̱xwa i ngẽma churara i poraxü̃.
25 Natürü choma ya Tupana rü ñachagürü: —Ngẽma churara i poraxü̃na tá nanapugü i ngẽma íyaxuxü̃. Rü ngẽma churaragüarü ãẽ̱xgacüna tá nanapugü i ngẽma napuxü̃chiréxü̃. Rü pemaxã nüxü̃ chixu, Pa Iraétanüxü̃x, rü chomatátama nixĩ i perü uanügüme̱xẽwa íchananguxü̃xẽẽxü̃ i penegü rü pexacügü.
26 Rü ngẽma perü uanügü rü nügü tátama nangõ̱xcue, rü nagüwa tátama naxaxegü ñoma bínu yaxaxgüxü̃rüxü̃. Rü ngẽmaãcü i guxü̃ma i duü̃xü̃gü rü tá nüxü̃ nicua̱xãchitanü nax choma ya Cori ya Tupana ya Acóbuarü duü̃xü̃güarü ngü̃xẽẽruxü̃ ya poracü nax chixĩxü̃. Rü choma nixĩ i Iraétanüxü̃xü̃ íchanguxü̃xẽxẽxü̃ —ñanagürü ga Tupana.
