Isaías 50:1-11
50 Nüma ya Tupana rü ñanagürü nüxü̃: —Pa Iraétanüxü̃x, ¡Taxṹ i nagu perüxĩnüexü̃ nax íchanatáxü̃ i perü mama i Iraéane ñoma wüxi ya yatü naxma̱xü̃ ítáxü̃rüxü̃! ¡Rü taxṹ i nagu perüxĩnüexü̃ nax pemaxã chataxexü̃ nax togüarü mugüruxü̃ pixĩgüxü̃ca̱x rü yemaacü chanaxütanüxü̃ca̱x ga wüxi ga chorü ngetanü! Rü pemaxã chataxe nagagu ga yema perü pecadugü yerü tama chauga pexĩnüechaü̃. Rü perü mama i Iraéane rü íchanata̱x yerü pema rü tama chauga pexĩnüe.
2 ¿Rü ta̱xacüca̱x tama texéxü̃ nua chayangau ga yexguma nua chaxũxgu? ¿Rü yexguma nua ichacagügu rü ta̱xacüca̱x taxúema choxü̃ tangãxü̃? ¿Ẽ̱xna nagu perüxĩnüe nax tama chaporaxü̃ nax togüme̱xẽwa pexü̃ chapuxü̃xü̃? ¿Ẽ̱xna nagu perüxĩnüe nax tama chaporaxü̃ nax pexü̃ íchanguxü̃xẽxẽxü̃ naxme̱xwa i perü uanü? Rü aixcüma pemaxã nüxü̃ chixu rü choma choxü̃́ nangẽxma i pora nax chanamuxü̃ i már rü natügü nax yachegüxü̃ca̱x rü ngẽmaãcü naxnücüane nax yaxĩgüxü̃ca̱x rü choxnigü rü ngearü dexáã́xü̃maxã nayuexü̃ rü yayixexü̃.
3 Rü choma rü dauxü̃wa chanawaanexẽxẽ ñoma wüxi i nge i yutecü i naxchiru i waxü̃gu icu̱xcürüxü̃ —ñanagürü ya Tupana.
Tupana rü norü duü̃xü̃ narüngü̃xẽxẽ
4 Rü choma i Ichaía rü ñachagürü: —Tupana rü choxü̃ nangu̱xẽxẽ nax norü ore i taãxẽ tüxna ãxü̃maxã chayaxucu̱xẽgüxü̃ nax naporaexü̃ca̱x i ngẽma ipaexü̃ rü ngúxü̃ ingegüxü̃. Rü guxü̃ i pa̱xmama rü Tupana choxü̃ ínarüdaxẽxẽ nax wüxi i ngúetanüxü̃ i mexü̃rüxü̃ nüxü̃ chaxĩnüxü̃ca̱x i norü ngu̱xẽẽtae.
5 Rü Tupana rü choxü̃ nangu̱xẽxẽ nax naga chaxĩnüxü̃ca̱x. Rü taguma namaxã chanuama rü taguma nüxü̃ chaxo.
6 Rü chauca̱xwe̱x nüxna chaxã nax choxü̃ nacua̱i̱xgüxü̃ca̱x. Rü yexguma choxü̃ natuxchinagugügu rü tama nüxna chayanuxü̃. Rü tama chidaugachi ga yexguma chauchametüwa nacua̱i̱xgügu rü chixexü̃ chomaxã yaxugügügu.
7 Rü Tupana nixĩ ya choxü̃ rüngü̃xẽẽcü rü ngẽmaca̱x tama choxü̃́ nangu̱x woo chomaxã naguxchigagügu. Rü ngẽmaca̱x yáxna chaxĩnü ñoma wüxi ya nuta ya tama iã̱xãchicürüxü̃, erü nüxü̃ chacua̱x nax tagutáma chaxãnexü̃.
8 Rü yimá chorü poxü̃ruxü̃ rü chauxü̃tawa nangẽxma. Rü ngẽxguma chi texé tüxü̃́ nangẽxmagu i ta̱xacüca̱x choxü̃ ítaxuaxü̃xü̃, rü ngĩxã wüxigu ãẽ̱xgacüpe̱xewa taxĩ. Rü ngẽxguma chi texé choxü̃ ixuxchaü̃gu rü ẽcü nua taxũ rü chope̱xewa chomaxã nüxü̃ tixu.
9 Rü Tupana ya Guxãétüwa Ngẽxmacü nixĩ ya choxü̃ rüngü̃xẽẽcü. ¿Rü texé tá tixĩ ya poxcu chomaxã ueguxe? Rü guxü̃ma i chorü uanügü rü tá nayue rü ñoma naxchiru i naweane ngõ̱xgüxü̃rüxü̃ tá nixĩgü.
10 Rü pema nax Tupanaxü̃ pemuü̃exü̃ rü norü duü̃xü̃ga pexĩnüexü̃, rü ngẽxguma waanexü̃wa i omü ínataxuxü̃wa pexĩxgu rü ¡Tupanagu perüxĩnüe rü nüxü̃́ peyaxõgü!
11 Natürü i pema rü toguama perüxĩnüe rü perütama omügü penanaixẽxẽ nax nagu pexĩxü̃ca̱x. Rü ngẽmaãcü Tupanaxü̃ pexo. Rü ngẽmaca̱x i nüma ya Tupana ya Guxãétüwa Ngẽxmacü rü tá pexü̃ napoxcue rü ngúxü̃ pexü̃ ningexẽxẽ —ñachagürü.
