Isaías 51:1-23
51 Rü ñanagürü ga Tupana: —¡Choxü̃́ iperüxĩnüe i guxãma i pemax ya cha̱u̱xca̱x daugüxe rü nagu ĩxẽ i ngẽma aixcüma mexü̃! Pema rü Abraáü̃taxa rü Chárataxa pixĩgü.
2 Rü dücax, penatü ga Abraáü̃ rü peé ga Chára nixĩ ga maxü̃ pexna ãcü. Rü yexguma Abraáü̃ca̱x chacaxgu rü nüma rü nüxicatama wüximare nixĩ, natürü i choma rü nüxü̃ charüngü̃xẽẽxü̃ rü nüxna chanamugü i muxü̃ma i nataagü.
3 Rü woo guxchawa nangẽxma ya Chióü̃ rü choma rü tá chanataãẽxẽxẽ i norü duü̃xü̃gü. Rü yima ĩane ya ñu̱xma chixene rü ĩane ya mexẽchine tá chayanguxuchixẽxẽ. Rü yema ori̱xnecü ga Edéü̃gu chatogüxü̃rüxü̃ tá namexẽchi. Rü yima ĩanewa tá nangẽxma i taãxẽ rü norü duü̃xü̃gü rü tá taãẽãcü napaetagü rü norü wiyaegümaxã tá choxü̃ nicua̱xüü̃gü —ñanagürü.
4 Rü ñanagürü ta ga Tupana: —Pa Chorü Duü̃xü̃güx ¡choxü̃́ iperüxĩnüe! ¡Rü chauga pexĩnüe, Pa Iraétanüxü̃x! Rü choma rü tá chanango̱xẽxẽ i ngẽma chorü ore. Rü chorü mugü rü guxü̃ i nachixü̃anegüarü nangóonexẽẽruxü̃ tá nixĩ.
5 Rü choma rü paxa tá chorü duü̃xü̃güxü̃ íchapoxü̃. Rü paxa tá íchananguxü̃xẽxẽ naxme̱xwa i norü uanügü. Rü chorü poramaxã tá guxü̃ i nachixü̃anegümaxã ichacua̱x. Rü ngẽma nachixü̃anegü i yáxü̃wa már arü tocutüwa ngẽxmagüxü̃ rü tá cha̱u̱xca̱x nadaugü rü tá chorü porana narüyoü̃.
6 ¡Rü dücax, rü dauxü̃gu perüdaunü rü ñoma i naanegu perüdaunü! Erü guxü̃ma i ngẽma dauxü̃wa nüxü̃ pedauxü̃ rü ñoma caxixü̃rüxü̃ tá inarütaxu rü ñoma i naane rü wüxi i naxchiru i ngauxü̃rüxü̃ tá nagu̱x. Rü ngẽma duü̃xü̃gü i nawa maxẽxü̃ rü ñoma murenü yuexü̃rüxü̃ tá nayue. Natürü ngẽma maxü̃ i chorü duü̃xü̃güna chaxãxü̃ rü taguma nagu̱x. Rü ngẽma chorü ngü̃xẽxẽ rü guxü̃gutáma nangẽxmaecha.
7 51:7-8 ¡Choxü̃́ iperüxĩnüe i pema nax nüxü̃ pecuáxü̃ i ngẽma nacüma i aixcüma iwéxü̃ rü naga pexĩnüexü̃ i chorü mugü! ¡Rü taxṹ i pemuü̃exü̃ rü perümaãchitanüxü̃ i ngẽxguma ta̱xacü pemaxã yaxugüegu i duü̃xü̃gü! Erü nümagü rü tá nayue rü ñoma naxchiru i naweane ngõ̱xgüxü̃rüxü̃ tá nixĩgü. Rü õ̱xmigü rü tá nanangõ̱xgü ñoma wüxi i naxchiru i carnéruta̱xanaxca̱x nangõ̱xgüxü̃rüxü̃. Natürü chaucüma rü taguma inarüxo rü chorü pora i namaxã íchapoxü̃ i chorü duü̃xü̃gü rü guxü̃guma nangẽxmaecha —ñanagürü ga Tupana.
8 Nüü̃ nadau 51:7
9 51:9-10 ¡Pa Tupanax, paxa nango̱xẽxẽ i curü pora! ¡Rü inawe̱x i curü pora ga yexguma nũxcüma icunawe̱xgurüxü̃! ¿Tama ẽ̱xna cuma yixĩxü̃ ga cunada̱i̱xü̃ ga yema Equítuanecüã̱xgü ga yexguma cuyapayexẽẽgu ga már rü natamawa cuyachoü̃xẽẽgu ga curü duü̃xü̃gü ga Equítuanecüã̱xme̱xẽwa ícunguxü̃xẽxẽxü̃?
10 Nüü̃ nadau 51:9
11 Rü ngẽxgumarüxü̃ i ñu̱xma rü aixcüma tá nawoegu i ngẽma Iraétanüxü̃ i Babiróniaanecüã̱xme̱xẽwa ícunguxü̃xẽẽxü̃. Rü taãẽãcü tá nawiyaegü rü ngẽmaãcü tá Chióü̃gu nachocu. Rü guxü̃gutáma nataãẽchametügü rü ngẽma axu rü ngúxü̃gü rü tá narüxogü.
12 Rü Tupana rü Yerucharéü̃xü̃ ñanagürü: —Chomatama nixĩ i cuxü̃ chataãẽxẽẽxü̃. ¿Rü texéxü̃ nixĩ i cumuü̃exü̃? ¿Ẽ̱xna yatügüxü̃ i duü̃xü̃gümare ixĩgüxü̃? Natürü nümagü rü ñoma maxẽrüxü̃ nayue.
13 ¿Ẽ̱xna marü choxü̃ curüngümae nax choma yixĩxü̃ ga cuxü̃ chango̱xẽxẽxü̃ rü chayangeechixü̃ ga daxũguxü̃ ga naane rü chanaxüxü̃ ga ñoma ga naane? ¡Rü taxṹ i nüxü̃ cumuü̃exü̃ i ngẽma uanügü i norü numaxã cuxü̃ daixchaü̃xü̃! ¿Natürü ngexü̃ nixĩ i guxü̃ma i ngẽma norü nu?
14 Rü paxa tá ínanguxuchi i ngẽma duü̃xü̃ i ñu̱xma poxcuwa ngẽxmaxü̃. Rü marü taxũtáma poxcupataü̃gu nayu, rü marü tagutáma nüxü̃́ nataxu i norü paũ.
15 Rü choma nixĩ ya curü Tupana ya Guxãétüwa Ngẽxmacü chixĩxü̃. Rü choma nixĩ i chayaxĩã̱xchiüxẽẽxü̃ i már rü chayacuxcuxẽẽxü̃ ya yuapegü.
16 Rü choma nixĩ ga cumaxã nüxü̃ chixuxü̃ ga yema chanaxwa̱xexü̃ nax nüxü̃ quixuxü̃, rü choma rü tá chorü poramaxã cuxna chadau. Rü choma nixĩ ga chanaxüxü̃ ga daxũguxü̃ ga naane rü ñoma i naane, rü ñu̱xma rü ñacharügü: “Pa Chióü̃cüã̱xgüx, pema nixĩ i chorü duü̃xü̃gü pixĩgüxü̃”, ñachagürü —ñanagürü ga Tupana.
Iraétanüxü̃maxã nanu ya Tupana
17 ¡Peba̱i̱xãchie Pa Yerucharéü̃cüã̱xgüx! ¡Peba̱i̱xãchie rü íperüdagü i pema nax Tupana pemaxã nuxü̃! Rü poraãcü ngúxü̃ pingexü̃ rü ñu̱xma rü pengearü poraã̱x.
18 Rü guxü̃ma i petanüwa, Pa Yerucharéü̃cüã̱xgüx, rü tataxuma ya texé ya mea pemaxã icuáxe. Rü petanüwa rü tataxuma ya texé ya pexme̱x yayauxãchixe.
19 Ñaa ga taxre ga guxchaxü̃ petanügu nangu, rü perü uanügü nagu napogüe ga pechixü̃ane rü nanadeãcu, rü petanüxü̃ rü daigu rü taiyamaxã nayue. ¿Rü texéaxü̃́ tá ipexauxãchitümüxü̃güxü̃? ¿Rü texé tá pexü̃ taãxẽxẽxẽxü̃?
20 Pa Yerucharéü̃cüã̱x, pema rü ñoma cowügü i yütagu yixü̃rüxü̃ peturae rü namagüarü poxõchigüwa pecaquegü. Rü Tupanaarü nu rü pexna nangu rü ngẽmaca̱x ngúxü̃ pingegü.
21 Rü ngẽmaca̱x Pa Yerucharéü̃cüã̱xgüx, pema nax ñoma bínuwa pengãxẽxü̃rüxü̃ pixĩgüxü̃ ¡rü iperüxĩnüe i ngẽma perü Tupana nüxü̃ ixuxü̃!
22 Rü yimá perü Cori ya Tupana ya norü duü̃xü̃güxü̃ ípoxü̃cü rü ñanagürü: —Yexguma pemaxã chanuxgu rü poraãcü pexü̃ chapoxcue rü yemaacü pexü̃ chanaxĩ̱xãchitanüãẽxẽxẽ ñoma bínumaxã pengaxegurüxü̃. Natürü tá íchayanaxoxẽxẽ i ngẽma poxcu rü marü taxũtáma wena ngẽma poxcumaxã pexü̃ chapoxcue.
23 Rü ñu̱xma rü tá chanapoxcue i ngẽma perü uanügü ga pexü̃ ñagüxü̃: “¡Waixü̃müanegu piñugü nax peétüwa tachopetüxü̃ca̱x!” ñagüxü̃. Rü yexguma ga pema rü naga pexĩnüe rü nümagü rü peétüwa nachopetü —ñanagürü ga Tupana.
