Isaías 54:1-17
54 Pa Yerucharéü̃cüã̱xgüx, perü ĩane rü ñoma wüxi ya ngexe ya ngexacüxe ya taguma ãxacüxerüxü̃ nixĩ. ¡Natürü tagaãcü rü taãẽãcü pewiyaegü! Erü nüma ya Tupana rü ñanagürü: —Yima perü ĩane ya Yerucharéü̃ i ñoma nge i taguma íxraxacücürüxü̃ nax yixĩxü̃, rü ñu̱xma rü tá namuxũchi i norü duü̃xü̃gü ngẽma nge i ãtecüarü yexera —ñanagürü.
2 54:2-3 Rü Pa Ĩane ya Yerucharéü̃cüã̱xgüx, ¡rü nüxü̃ petaneta ya pepatagü ya naxchirunaxca̱x ixĩgüne rü nüxü̃ pema̱xneta i natü̱xügü, rü mea ípenapogü i ngẽma natü̱xügüarü tairuü̃gü! Erü perü tügünecüwawaama rü perü to̱xwecüwawaama tá nimux i duü̃xü̃gü. Rü ngẽma penegü rü petaagü tá nanapuxü̃ i muxü̃ma i togü i nachixü̃anegü, rü tá nawa namaxẽ ya yima ĩanegü ya ñu̱xma ingeãcune.
3 Nüü̃ nadau 54:2
4 54:4-5 ¡Rü taxṹ i pemuü̃exü̃! Erü taxũtáma ta̱xacü pemaxã nixugüe rü taxũtáma pexãnee. Rü yema guxchaxü̃gü ga ü̃pa pexü̃ ngupetüxü̃ rü tá nüxü̃ perüngümae rü taxũtáma nüxna pecua̱xãchie nax ñoma nge i yutecürüxü̃ nax pixĩgüxü̃. Erü nüma ya Tupana ya Guxü̃étüwa Ngẽxmacü ya pexü̃ ngóexẽẽcü rü tá pemaxã inacua̱x. Rü yima Iraétanüxü̃arü Tupana ya Üünecü nixĩ ya pexü̃ ínguxü̃xẽẽcü rü namaxã inacua̱x i guxü̃ma i ñoma i naanewa.
5 Nüü̃ nadau 54:4
6 54:6-7 Pa Iraétanüxü̃x, pema rü ñoma wüxi i pacü i ãtecü rü ngĩte ngĩxü̃ íta̱xcü rü naxĩ̱xãchiãẽcürüxü̃ pixĩgü. Natürü i ñu̱xma ya perü Tupana rü wena pexca̱x naca, rü pexü̃ ñanagürü: —Ngẽma nax pexü̃ íchawogüxü̃ rü paxaãchica̱xmare nixĩ, natürü i ñu̱xma rü tá pexü̃ chade erü poraãcü choxü̃́ pengechaü̃tümüxü̃gü.
7 Nüü̃ nadau 54:6
8 Rü yexguma pemaxã chanuxgu rü paxaxãchi pexna chixũgachi. Natürü pemaxã nüxü̃ chixu rü paxãma choxü̃́ pixauxãchitümüxü̃gü erü pexü̃ changechaü̃ rü ngẽma chorü ngechaü̃ rü tagutáma nagu̱x —ñanagürü ya perü ngü̃xẽẽruxü̃ ya Tupana.
9 Rü Tupana rü Iraétanüxü̃xü̃ ñanagürü: —Yema Noémaxã chanaxueguxü̃rüxü̃ nax tagutáma wena taxüchicü ya mucümaxã chanadaixü̃ i duü̃xü̃gü, rü ngẽxgumarüxü̃ ta i ñu̱xma rü pemaxã chanaxuegu nax tagutáma wena pemaxã chanuxü̃ rü pexü̃ chaxãxũnexü̃.
10 Rü woo yima ma̱xpǘnegü ixĩgachigu rü yima ma̱xpǘnegü rümáchanemaegüne rü yawa̱xgügux, Pa Yerucharéü̃x, natürü ngẽma chorü ngechaü̃ cuxca̱x rü tagutáma naxüchicüxü. Rü chorü uneta ga curü duü̃xü̃gümaxã nüxü̃ chixuxü̃ nax namaxã charüngüxmüxü̃ rü tagutáma nüxü̃ charüngüma —ñanagürü.
11 54:11-12 Rü ñanagürü ta: —Pa Yerucharéü̃cüã̱xgüx, ñu̱xma rü peyaxĩ̱xãchiãẽgü rü tataxuma ya texé ya pexü̃ taãẽxẽẽ́xe. Natürü i choma rü nutagü ya achabáchemaxã rü nutagü ya chafírumaxã tá ichanaxügü nax chanaxüxü̃ i perü ĩanearü poxeguxü̃tápü̱x. Rü nutagü ya rubímaxã tá chanaxü i norü dauxü̃taechicagü rü nutagü ya berílumaxã tá chanaxü i norü ĩã̱xgü rü nutagü ya mexẽchicümaxã tá chanaxü i naxtaxpü̱xgü i düxétüwa ngẽxmagüxü̃.
12 Nüü̃ nadau 54:11
13 Rü choma tá chanangúexẽxẽ i guxü̃ma i penegü, rü ngẽmaãcü guxãtáma taãẽwa tamaxẽ.
14 Rü perü ãẽ̱xgacügü rü tá mea pemaxã inacua̱xgü rü ngẽmaãcü tá peporae. Rü taxũtáma togüme̱xẽwa pengẽxmagü rü taxũtáma ta̱xacüca̱x pemuü̃e.
15 Rü ngẽxguma wüxi i nachixü̃ane pexca̱x íyaxüãchigu rü taxũtáma chorü mugagu nixĩ. Natürü pema rü tá nüxü̃ perüporamaegü.
16 Rü dücax, choma nixĩ ga chanango̱xẽẽxü̃ ga yema duü̃xü̃ ga fieru iguxü̃ nax naxnegü nawa naxüxü̃ca̱x. Rü yexgumarüxü̃ ta chanango̱xẽxẽ ga yema churaragü ga dairuü̃gü nax guxü̃ma iyanaxoxẽẽgüxü̃ca̱x.
17 Natürü taxúema tá tanaxü i wüxi i naxne i pexü̃ rüxoxẽẽxü̃. Rü pemax, Pa Iraétanüxü̃x, rü tá peyanangea̱xgüxẽxẽ i guxü̃ma i ngẽma pemaxã guxchaca̱x daugüxü̃, erü choma i Cori ya Tupana rü aixcüma nüxü̃ charüngü̃xẽxẽxü̃ i ngẽma chorü duü̃xü̃gü ixĩxü̃. Rü pemaxã chanaxuegu nax ngẽmaãcü tá yixĩxü̃ —ñanagürü ga Tupana.
