Isaías 55:1-13
55 Cori ya Tupana rü ñanagürü: —¡Guxãma ya texé ya ita̱xawaexe rü nua taxĩ rü tayaxaxegü! ¡Rü yíxema ngearü diẽruã̱xgüxe rü nua taxĩ rü trigu rü bínu rü lechica̱x tadaugü rü ngetanüãcü tanangõ̱xgü rü taxaxegü!
2 ¿Rü ta̱xacüca̱x i diẽrumaxã penaxütanü i ngẽma tama õna ixĩxü̃? ¿Rü ta̱xacüca̱x penaxütanü i ngẽma tama nawa itaãẽxü̃? ¡Rü mea choxü̃́ iperüxĩnüe rü tá mexü̃ i õna pengõ̱xgü rü õna i chíxü̃maxã tá pengaxpütüwe!
3 ¡Rü cha̱u̱xca̱x pexĩ, rü choxü̃́ iperüxĩnüe! ¡Chauga pexĩnüe rü tá pemaxẽ! Rü choma rü tá pemaxã chanaxü i wüxi i uneta i taguma gúxü̃. Rü ngẽmaãcü tá chayanguxẽxẽ ga yema chorü uneta ga ãẽ̱xgacü ga nüxü̃ changechaü̃xü̃chicü ga Dabímaxã nüxü̃ chixuxü̃.
4 Rü choma rü gumá ãẽ̱xgacüxü̃ chaxuneta nax chauétüwa yadexaxü̃ca̱x nape̱xewa ga yema togü ga nachixü̃anegü. Rü nüxü̃ chaxuneta nax namaxã inacuáxü̃ca̱x rü nangúexẽẽãxü̃ca̱x ga yema togü ga nachixü̃anecüã̱xgü.
5 Rü pemax, Pa Iraéanecüã̱xgüx, rü tá naxca̱x pengẽma i togü i nachixü̃anecüã̱xgü i tama pexü̃ cuáxü̃. Rü nümagü rü tá paxaãẽãcü pexca̱x naxĩ, erü choma i perü Tupana ya Üünecü rü guxü̃ma i ngẽma nachixü̃anegüétüwa pexü̃ changexmagüxẽxẽ —ñanagürü ya Cori ya Tupana.
6 ¡Rü naga pexĩnüe ya Cori ya Tupana rü ñoma rü ta pexna naxu! ¡Rü nüxna peca rü ñoma rü ta pexna nangaicama!
7 Rü ngẽma duü̃xü̃ i chixecümaxü̃, rü name nixĩ i nüxü̃ narüxo i ngẽma nacüma i chixexü̃. Rü ngẽma duü̃xü̃ i chixexü̃gu rüxĩnüxü̃, rü name nixĩ i nüxü̃ narüxo i ngẽma chixexü̃ i nagu naxĩnüxü̃. ¡Rü Cori ya Tupanaca̱x pewoegu! Rü tá nüxü̃́ pengechaü̃tümüxü̃gü. ¡Rü naxca̱x pewoegu ya tórü Tupana! Erü nüma rü ínamemare nax pexü̃́ nüxü̃ nangümaxü̃ i perü chixexü̃gü.
8 Erü nüma ya Tupana rü ñanagürü: —Ngẽma choma nagu charüxĩnüxü̃ rü tama perü ĩnümaxã nawüxigu. Rü ngẽma choma chaxüxü̃ rü tama pema pexüxü̃maxã nawüxigu.
9 Rü ngẽxgumarüxü̃ i daxũguxü̃ i naane rü ñoma i naaneétüwa nax nangẽxmaxü̃, rü ngẽxgumarüxü̃ ta nixĩ i ngẽma chorü ĩnü rü perü ĩnüétüwa nangẽxma rü ngẽma chaxüxü̃ rü ngẽma pexüxü̃étüwa nangẽxma.
10 Rü yimá pucü rü ngẽma gáuxü̃ rü dauxü̃wa narüyi rü tama wena dauxü̃wa naxĩ, natürü nayawaixẽxẽ i waixü̃mü nax naxügüxü̃ca̱x i nanetügü rü ngẽmaãcü nangẽxmaxü̃ca̱x i naxchire nax inatoxü̃ca̱x rü norü o nax nangṍxü̃ca̱x.
11 Rü ngẽxgumarüxü̃ ta nixĩ i ngẽma chorü ore i cha̱u̱a̱xwa ixũxũxü̃. Rü taxũtáma ngẽmaãcümare cha̱u̱xca̱x nataegu. Rü ngẽma chorü oregagu rü tá ningu rü tá naxü i ngẽma choma chanaxwa̱xexü̃ rü ngẽma nüxü̃ chixuxü̃.
12 Rü pemax, Pa Iraétanüxü̃, rü tá taãẽãcü Babiróniaanewa ípechoxü̃, rü mea tá pechixü̃aneca̱x pewoegu. Rü ngẽxguma pexü̃ nadaugügu ya yima ma̱xpǘnegü rü taãẽãcü tá pexü̃ nayauxgü. Rü guxü̃ma i ngẽma naigü i naixnecüwa rüxügüxü̃ rü norü taãẽmaxã tá nixĩãxtanügü.
13 Rü ngẽma tuxugü írüxügüchiréxü̃wa rü tá narüxügü i pinugü. Rü ngẽma naxcugü írüxügüchiréxü̃wa rü tá narüxügü i nanetügü i yixixü̃ i mirtu. Rü guxü̃ma i ñoma i naanewa ngẽxmagüxü̃ rü tá Tupanaxü̃ nicua̱xüü̃gü rü ngẽmaãcü i duü̃xü̃gü rü tá nüxü̃ nacua̱xgü nax Tupana rü guxü̃guma nangẽxmaechaxü̃ —ñanagürü ya Tupana.
