Isaías 56:1-12
56 Tupana rü ñanagürü: —¡Nagu pemaxẽ i ngẽma aixcüma mexü̃ rü nagu pexĩ i ngẽma we̱xguxü̃! Erü paxa tá ichanawe̱x i chorü pora rü tá pexü̃ íchanguxü̃xẽxẽ.
2 Rü tataãxẽ ya yíxema naga ĩnüxe rü aixcüma yanguxẽẽ́xẽ i chorü mugü. Rü tataãxẽ ya yíxema rüngü̃xe i ngü̃xchigaarü ngunexü̃gu rü tügüna dauxe nax tama ta̱xacürü chixexü̃ taxüxü̃ca̱x —ñanagürü ya Tupana.
3 Rü ngẽxguma wüxi i duü̃xü̃ i to i nachixü̃anecüã̱x chowe rüxũxgu rü taxuca̱xma ñanagürü: —Tupana rü tá norü duü̃xü̃gütanüwa choxü̃ ínamuxũchi —ñanagürü. Rü yimá yatü ya yauxpü̱xücharecü rü taxuca̱xma ñanagürü: —Choma rü ñoma nai i paxü̃rüü̃mare chixĩ —ñanagürü.
4 56:4-5 Erü Cori ya Tupana rü ñanagürü: —Ngẽma depü̱xücharegüxü̃ i tama ngü̃xchigaarü ngunexü̃ puracüexü̃ rü naga ĩnüexü̃ i ngẽma chorü mugü, rü aixcüma yanguxẽẽgüxü̃ i chorü uneta, rü choma rü tá chanaxüchica nax yima chopata ya taxü̃nearü poxeguxü̃tápü̱xgü naxümatüxü̃ca̱x i naéga i tagutáma ngéma ípepigüxü̃. Rü ngẽma nixĩ nax yaxãxacüxü̃arü yexera rü yaxãnexü̃arü yexera rümemaexü̃. Rü tá nüxna chanaxã i wüxi i naéga i tagutáma ípixü̃.
5 Nüü̃ nadau 56:4
6 56:6-7 Rü ngẽma duü̃xü̃gü i to i nachixü̃anecüã̱xgü i choxü̃ icua̱xüü̃güxü̃ rü tama puracüeamaxü̃ ega ngü̃xchigaarü ngunexü̃wa nanguxgu rü aixcüma yanguxẽẽgüxü̃ i chorü uneta rü choma rü tá chorü ma̱xpǘne ya üünene ya Chióü̃wa chanagagü. Rü chorü yumüxẽpataxü̃wa tá chanataãẽxẽxẽ. Rü choma rü tá chanayaxu i norü ãmaregü i chorü ãmarearü guruü̃wa cha̱u̱xca̱x ínagugüxü̃, erü yima chopata rü Guxü̃ma i Duü̃xü̃güarü Yumüxẽpataxü̃ tá nixĩ i naéga.
7 Nüü̃ nadau 56:6
8 Rü choma rü tá nachixü̃aneca̱x chanawoeguxẽxẽ i ngẽma Iraétanüxü̃ i taxũta nachixü̃aneca̱x woeguxü̃. Rü tá chananutaque̱xe wüxigu namaxã i togü i nachixü̃anecüã̱x i duü̃xü̃gü. Rü choma ya Tupana nixĩ i nüxü̃ chixuxü̃ i ngẽma —ñanagürü.
Tupana nayangagü i ãẽ̱xgacügü i chixecümagüxü̃
9 Rü nüma ya Tupana rü ñanagürü: —Pa Iraétanüxü̃arü Uanügüx, ¡nua pexĩ rü ñoma naeü̃gü i düraexü̃rüxü̃ naxca̱x ípeyaxüãchi rü peyadai i chorü duü̃xü̃gü!
10 Rü pemax, Pa Chorü Duü̃xü̃güna Daugüxü̃x, rü ñoma pingexetüxü̃rüxü̃ pixĩgü, rü tama pexuãẽgü. Pema rü ñoma airugü i ngeã́xü̃rüü̃mare pixĩgü rü pipeechamare rü pixãnegügüechamare. Rü perü me nixĩ nax pepeexü̃.
11 Rü ñoma airugü i taiyaeechaxü̃ rü taguma ngãxpütüwegüxü̃rüxü̃ pixĩgü. Rü pema rü dauruü̃gü i tama nüxü̃ cua̱xgüégaxü̃ pixĩgü. Rü wüxichigü i pema rü perü ngúchaü̃ama pixü rü pexrütama ngẽmaxü̃guama perüxĩnüe.
12 Rü pemax, Pa Chorü Ĩanemaxã Icua̱xgüxü̃, rü ñaperügügü: “¡Nua pexĩ rü bínu tayaxaxü rü namaxã tangãxẽ rü ngẽmatátama taxüe! Rü moxü̃ãcüchigü rü tayexera taxaxegü”, ñaperügügü —ñanagürü ya Tupana.
