Isaías 57:1-21
57 Rü ngẽxguma nayu̱xgu i wüxi i duü̃xü̃ i mecümaxü̃ rü duü̃xü̃güaxü̃́ nanataxuraü̃mare. Rü ngẽxguma nayuegu i duü̃xü̃gü i mecümaxü̃ rü taxúema nüxü̃ tacua̱xéga nax nawa ínanguxü̃xü̃ i ñoma i naanearü chixexü̃.
2 Rü ngẽma duü̃xü̃gü i aixcüma Tupanaga ĩnüexü̃ rü ngẽxguma nayuegu rü nüxna narüngü̃gü i chixexü̃.
Tupana rü tama namaxã nataãxẽ i ngẽma duü̃xü̃gü i tupananetachicüna̱xãgümaxã tupanaã́xü̃
3 Rü Tupana rü ñanagürü: —Pa Yuüxü̃ Nanegüx, pema rü nanegü pixĩgü i yatü i naxma̱xna ngexü̃ i naxü̃nemaxã taxexü̃maxã maxü̃xü̃. ¡Rü nua pexĩ rü choxü̃́ iperüxĩnüe!
4 ¿Rü texéxü̃ yixĩxü̃ i pecugüexü̃ i pemax? ¿Rü texécha̱xwa yixĩxü̃ i pidaugachigüxü̃? ¿Rü texéna yixĩxü̃ i pede̱xgüexü̃? Pema rü pecadu nanegü pixĩgü, rü duü̃xü̃ i dorata̱xgüxü̃ pixĩgü.
5 Rü naigü i taxü̃tüxü̃wa rü guxü̃ma i naigü i metanüxü̃tüxü̃wa rü pegümaxã pemaxẽ nax ngẽmaãcü nüxü̃ picua̱xüü̃güxü̃ca̱x i ngẽma perü tupananetagü. Rü doxonexü̃güwa rü nutatanüarü ãxmagüxü̃wa perü tupananetagüca̱x tüxü̃ pidai rü tüxü̃ ípigu ya penegü rü pexacügü.
6 Rü pemax Pa Iraétanüxü̃x, rü ngẽma ngatewa ngẽxmagücü ya nutagü ya ingoracüxü̃ picua̱xüü̃gü. Rü naxca̱x ngéma penana i perü ãmaregü i bínu rü trigute̱xe. Rü ñu̱xma nawena i guxü̃ma i ngẽma, ¿rü pexca̱x rü tá namaxã chataãẽxü̃ i ngẽma pexüxü̃?
7 Rü pema rü wüxi ya máchanene ya ma̱xpǘnegu pexĩgü rü ngẽxma pepegü rü ngéma perü tupananetagüxü̃ picua̱xüü̃gü rü naxca̱x peyagu i naxü̃nagü.
8 Rü pema rü penawãxta i perü ĩã̱x rü ngẽxma penanu i perü tupananetagü rü nape̱xewa penaxü i perü ngúchaü̃ rü ngẽmaãcü nüxü̃ picua̱xüü̃gü i perü tupananetagü.
9 Rü tupananeta i Molóxca̱x pibuxmü rü naxca̱x ngéma penana i oribuarü chíxü̃gü rü muxü̃ma i pumaragü, rü naxca̱x pedaugü i yuetaãẽgüarü ucu̱xẽgü.
10 Rü yáxü̃wa naxca̱x pexĩ nax nüxü̃ picua̱xüü̃güxü̃ca̱x i ngẽma togü i tupananetagü, rü taguma pipae, erü perü ngúchaü̃tama pexü. Natürü guxü̃ma i ngẽma rü natüca̱xmamare nixĩ.
11 ¿Rü ta̱xacügü nixĩ i ngẽma perü tupananetagü i nüxü̃ pemuü̃exü̃ rü nüxü̃ picua̱xüü̃güxü̃, rü ngẽmaca̱x choxü̃ iperüngümaexü̃chixü̃ rü tama chauga pexĩnüexü̃? ¿Ẽ̱xna pema rü tama choxü̃ pemuü̃e erü muxü̃ i ngunexü̃ chachianemare rü taxu ñachagürü?
12 Natürü ñu̱xmata pemaxã nüxü̃ chixu rü ngẽma pexüxü̃ i pexca̱x mexü̃ rü taxuwama name.
13 Rü ngẽxguma aita naxca̱x pexüegu nax ngü̃xẽẽca̱x nüxna pecaxü̃ rü ngẽma naxchicüna̱xãgü i nüxü̃ picua̱xüü̃gü rü taxũtáma pexü̃ narüngü̃xẽxẽ rü taxũtáma pexü̃ ínanguxü̃xẽxẽ. Rü buanecü rü tá nayana rü wüxi i cue ñaxü̃maxã rü tá narüxogü. Natürü yíxema choxü̃́ yaxõgüxe rü tá ñaa nachixü̃anegu taxãchixü̃, rü yima ma̱xpǘne ya üünene ya Chióü̃wa tá tamaxẽ —ñanagürü ya Tupana.
Ngẽma nüxü̃ rüxoexü̃ i norü chixexü̃ rü Tupana nüxü̃́ nüxü̃ narüngüma
14 Tupana rü ñanagürü: —¡Penamexẽxẽ i wüxi i nama i meama iwéxü̃ rü ípenawogü i guxü̃ma i toxyepe̱xeruü̃gü nax ngẽmagu naxĩxü̃ca̱x i chorü duü̃xü̃gü!
15 Erü choma ya Tupana ya Guxü̃étüwa Ngẽxmacü rü guxü̃guma chamaxü̃ rü chauéga rü Üünecü nixĩ. Rü ñachagürü: “Choma rü daxũwa chamaxü̃ i ngextá ínaxüünexü̃wa. Natürü tüxü̃ charüngü̃xẽẽxü̃ rü tüxü̃ chaporaxẽxẽ ya yíxema ngearü diẽruã̱xgüxe rü yíxema naxĩ̱xãchiãẽgüxe”.
16 Pa Chorü Duü̃xü̃güx, marü taxũtáma pexü̃ chixuecha rü taxũtáma guxü̃guma pemaxã chanu. Erü ngẽxguma chi chanuechagu rü guxü̃ma i ngẽma duü̃xü̃gü i changóexẽẽxü̃ rü chi choxü̃ narüxoe.
17 Rü yema Iraétanüxü̃arü pecadugagu nixĩ ga noxri chanuxü̃ rü chanapoxcuexü̃ rü nüxna chixũgachixü̃. Natürü ga nümagü rü chomaxã nanueama rü yexera norü ngúchaü̃we narüxĩ.
18 Choma rü nüxü̃ chadau i nacüma i chixexü̃, natürü tá nüxü̃ charüngü̃xẽẽxü̃ nax nüxü̃ naxoexü̃ca̱x. Rü tá chanataãẽxẽxẽ nax tama naxoegaãẽgüxü̃ca̱x. Rü guxãma ya yíxema ngechaü̃güxe rü tá tüxü̃ chataãẽxẽxẽ.
19 Rü choma rü guxü̃ i chorü duü̃xü̃gümaxã tá ñacharügü: “Choma rü tá pemaxã charüngüxmü i pema i yáxü̃wa ngẽxmagüxe rü pema i ngaicamawa ngẽxmagüxe. Rü tá pexü̃́ nüxü̃ charüngüma i perü pecadugü.
20 Natürü ngẽma duü̃xü̃gü i chixexü̃arü üruü̃gü rü ñoma már arü yuape i taguma íyachaxãchixü̃rüxü̃ nixĩgü. Rü ñoma yuape i már buxchíüxü̃ i ãũãchixü̃ ingegüxü̃rüxü̃ nixĩgü.
21 Rü ngẽma chixexü̃arü üruü̃güca̱x rü nataxuma i taãxẽ” —ñanagürü ga Tupana.
