Isaías 59:1-21
59 Rü ngẽma Tupanaarü pora rü guxü̃guma nanaxa̱i̱xrügumaraxü̃ rü guxü̃guma ningu nax chixexü̃wa tüxü̃ ínanguxü̃xẽẽxü̃ca̱x. Rü ngẽxgumarüxü̃ ta i nüma rü tama nangauxchixẽ, rü ngẽmaca̱x guxü̃guma tüxü̃ naxĩnü ega nüxna ícaxgu.
2 Natürü yema perü chixexü̃gü ga pexüxü̃ rü Tupanacha̱xwa pexü̃ nitoxyepe̱xe. Rü ngẽma perü pecadugügagu pexcha̱xwa nügü nidüxchametü ya Tupana nax ngẽmaãcü tama pexü̃ naxĩnüxü̃ca̱x.
3 Rü pema rü nagümaxã pixãũãchime̱xẽ nagagu nax pimáetagüxü̃. Rü pidorata̱xagü rü chixexü̃maxã pidexagü.
4 Rü taxúema i pema mexü̃ i ĩnümaxã ãẽ̱xgacü ya guxchaxü̃arü mexẽẽruü̃pe̱xewa pexĩ. Rü ngẽma guxchaxü̃ ínamexẽẽgüpe̱xewa rü taxúema nüxü̃ tixu i ngẽma ore i aixcüma ixĩxü̃. Rü nüxü̃ tixu i ngẽma dora ixĩxü̃ rü taxúema aixcümaxü̃ tixu. Erü chixexü̃maxã penapagü rü tama aixcüma penango̱xẽxẽ i ngẽma perü chixexü̃gü.
5 Rü pema rü ñoma wüxi i duü̃xü̃ i ãxtapecharaü̃ íchuxẽẽxü̃rüxü̃ pixĩgü erü chixexü̃guxicatama perüxĩnüe. Rü pema rü ñoma wüxi i duü̃xü̃ i pawüchiãü̃wa naxchiru üxü̃rüxü̃ pixĩgü erü ngẽma perü ĩnü rü taxuwama name. Rü ngẽxguma texé pexü̃ irüwe̱xãchixẽẽchaü̃gu rü pema rü yu tümamaxã pexuegu erü máetaguxicatama pemaxẽ.
6 Rü ngẽma pawüchiãü̃wa rü taxucürüwa wüxi i naxchiru taxü rü taxúema nagu ticu̱x i naxchiru i pawüchiãü̃naxca̱x. Rü ngẽxgumarüxü̃ ta i ngẽma chixexü̃gü i pexügüxü̃ rü taxuwama name erü perü ĩnü rü máetaxicatama nixĩ.
7 Rü pepaxaãẽgü nax pemáetagüxü̃ rü tüxü̃ pima̱x ya yíxema taxuxü̃ma i chixexü̃ üxe. Rü máetaguxicatama perüxĩnüe rü ngẽmaca̱x penadai i duü̃xü̃gü rü ngẽma ípechopetüxü̃wa rü guxü̃ma nachixe.
8 Rü tama nüxü̃ pecua̱x i ngẽma nacüma i mexü̃, rü taxuwama name i ngẽma pexüxü̃. Rü ngẽma pecüma rü nachixe, rü texé ya pemaxã ãmücüxe rü tagutáma taãẽwa tangexma.
9 Rü tórü chixexü̃gagu Tupana tama paxa tórü uanügüme̱xẽwa tüxü̃ ínanguxü̃xẽxẽ. Rü yixema nagu tarüxĩnüe nax paxa chi íinguxü̃xü̃, natürü tórü uanügüme̱xẽwa tangexmagüama. Nagu tarüxĩnüe nax paxa ngóonexü̃wa tá imaxẽxü̃ natürü ẽanexü̃wa tangexmagüama.
10 Rü yixema rü ñoma ngexetügüxü̃ i ĩxtapü̱xgu idaugüetanüxü̃rüxü̃ tixĩgü. Rü ngunecü rü ñoma chütacü ixĩxgurüxü̃ ta̱xacügu tayayi. Rü woo nax imaxẽxü̃, natürü ñoma iyuexü̃rüxü̃ tixĩgü.
11 Rü guxãma i yixema rü ñoma osu i düraxü̃rüxü̃ tingi̱netanücüxü rü muxtucurüxü̃ tangechaxü̃gagü. Rü ítanangu̱xẽxẽ nax tórü uanügüme̱xẽwa ínguxü̃xü̃ natürü ya Tupana rü tama paxa tüxü̃ narüngü̃xẽxẽ. Rü tanaxwa̱xe nax ngẽma uanügüme̱xẽwa ínguxü̃xü̃ natürü naxme̱xwa tangexmagüama.
12 Rü yixema rü Tupanamaxã ta̱xacü tixugüe rü ngẽma tórü chixexü̃gütama nixĩ i tüxü̃ íxuaxü̃xü̃. Rü ngẽma tórü chixexü̃ rü tawa nangẽxmagü, rü nüxü̃ tacua̱x i tórü pecadugü.
13 Rü tama Tupanaga taxĩnüe rü tama namaxã tixaixcümagü. Rü nüxna tixĩgachi. Rü máetachiga tidexagü rü tanaechitaegü. Rü duü̃xü̃güxü̃ tawomüxẽxẽ.
14 59:14-15 Rü nüxü̃ taxo i ngẽma mexü̃, rü nüxna tayáxü̃gugü i ngẽma aixcüma we̱xguxü̃. Rü tama tayanguxẽxẽ i ngẽma duü̃xü̃güpe̱xewa nüxü̃ ixuxü̃. Rü tama tixaixcümagü. Rü yíxema nüxna ixũgachixe i ngẽma chixexü̃ rü tüxü̃́ naxca̱x tangĩ̱x i ngẽma tümaarü ngẽmaxü̃gü. Rü nüma ya Tupana rü nanu rü tama nataãxẽ namaxã i ngẽma ixüxü̃, erü nüxü̃ nadau nax nataxuxü̃ma i mexü̃.
15 Nüü̃ nadau 59:14
16 Rü nüma ya Tupana rü namaxã naba̱i̱xãchi nax taxúema taétüwa üxü̃. Rü ngẽmaca̱x nümatama rü norü poramaxã tüxü̃ ínanguxü̃xẽxẽ.
17 Wüxi i churara rü nicuxcuchi i norü churarachiru rü nananucu i norü poxü̃ruxü̃ nax inawéãxü̃ca̱x i norü pora. Rü nüma ya Tupana rü ngẽxgumarüxü̃ ta inanawe̱x i norü pora. Rü inanawe̱x i nacüma i aixcüma we̱xguxü̃, rü norü pora i namaxã ínanguxü̃xẽẽãxü̃ i norü duü̃xü̃gü. Rü inanawe̱x i norü pora i namaxã napoxcueãxü̃ i ngẽma norü duü̃xü̃güarü uanügü, erü poraãcü nüxü̃́ nachu̱xu i norü duü̃xü̃gü.
18 Rü nüma ya Tupana rü tá wüxichigüna nanaxã i ngẽma poxcu i woetama nüxna üxü̃. Rü tá nanapoxcue i norü uanügü. Rü ngẽma naxchi aiexü̃ rü tá namaxã nanu rü woo ngẽma norü uanügü i márcutügu ãchiü̃güxü̃ rü tá nanapoxcue.
19 Rü ngẽxguma nüxü̃ nadaugügu i Tupanaarü pora, rü guxü̃ma i duü̃xü̃gü i éstewa rü ñu̱xmata oéstewa maxẽxü̃ rü tá muü̃maxã nidu̱xrugü. Erü nüma ya Cori ya Tupana rü ñoma natü i nagoxü̃chíüxü̃ i tacü ya buanecü icuexü̃chíüxü̃rüxü̃ tá ínangu.
20 Rü Tupana rü tá tüxü̃ ínanguxü̃xẽxẽ ya yíxema Chióü̃cüã̱xgü rü guxãma ya Acóbutaagü ya nüxü̃ rüxoexe i tümaarü chixexü̃gü. Rü Cori ya Tupanatama nixĩ i ngẽma ñaxü̃.
21 Rü nüma ya Tupana rü ñanagürü: —Ñaa nixĩ i chorü uneta i ngẽma duü̃xü̃gümaxã nüxü̃ chixuxü̃: “Rü ngẽma Chauãxẽ i cuwa ngẽxmaxü̃, rü ngẽma chorü ore i cua̱xwa ngẽxmaxü̃ rü tagutáma cuxna rü cunegüna rü cutaagüna nixũgachi” —ñanagürü ya Cori ya Tupana.
