Isaías 6:1-13
6 Rü gumá taunecü ga ãẽ̱xgacü ga Uchía nagu yucü rü nüxü̃ chadau ga Cori ya Tupana ga wüxi ga tochicaxü̃ ga dauxü̃wa yexmaxü̃wa nax natoxü̃. Rü yema naxpechinüchiru rü nanatüétü ga guma napata ga taxü̃ne.
2 Rü naétüwa nayexmagü ga daxũcüã̱xgü. Rü wüxichigü ga yema rü nüxü̃́ nayexma ga 6 ga naxpe̱xatügü. Rü taxre ga naxpe̱xatümaxã rü nügü nidüxchiwegü, rü guma nai ga taxre ga naxpe̱xatümaxã nügü nidüxparagü, rü guma nai ga taxremaxã rü nixüüxü̃.
3 Rü guxü̃ma ga yema daxũcüã̱x rü nügü ñanagürügü: —Naxüüne, naxüüne, naxüüne ya Cori ya Tupana ya Guxãétüwa Ngẽxmacü. Rü ngẽma norü üüne rü ñoma i naane namaxã nanapá —ñanagürügü.
4 Rü yema nagamaxã rü guma Tupanapata ga taxü̃nearü ĩã̱x rü naxĩã̱xãchi. Rü nümatama ga guma Tupanapata ya taxü̃ne rü caixanexü̃maxã nanapá.
5 Rü yexguma ga chomax rü ñaxü̃gu charüxĩnü: —Ñu̱xmawaxix rü chaugümaxã changechaü̃ erü tá chayu. Erü choma nax duü̃xü̃ chixĩxü̃ rü chauxetümaxã nüxü̃ chadau ya yimá ãẽ̱xgacü ya Cori ya Guxãétüwa Ngẽxmacü. Rü chaua̱x rü naxãũãchi rü duü̃xü̃gü i ãũãchiarü dexaã̱xgǘxü̃tanüwa chamaxü̃ —ñaxü̃gu charüxĩnü.
6 Rü yexguma rü wüxi ga yema daxũcüã̱x rü chauxü̃tawa naña. Rü ãmarearü guruü̃wa wüxi ga ãchataxü̃maxã wüxi ga ã́xwe nayaxu.
7 Rü gumá ã́xwe rü cha̱u̱a̱xwa nayaxũ̱xãchixẽxẽ, rü ñanagürü choxü̃: —¡Dücax! daa ã́xwe rü cua̱xwa nixũ̱xãchi rü ngẽmaca̱x i curü chixexü̃ rü marü inayarüxo. Rü ngẽma curü chixexü̃gü rü Tupana rü marü cuxü̃́ nüxü̃ narüngüma —ñanagürü.
8 Rü yexguma rü nüxü̃ chaxĩnü ga naga ga Cori ya Tupana ga ñaxü̃: —¿Texéxü̃ tá ichamuãchixü̃ i ñu̱xmax? ¿Rü texé tá tixĩ ya yíxema tórü orearü ngeruxü̃ ixĩxẽ? —ñanagürü. Rü yexguma ga chomax rü chanangãxü̃ rü ñachagürü: —Daxe chixĩ, Pa Corix. Ẽcü, ¡choxü̃ inamuãchi! —ñachagürü.
9 Rü nüma rü ñanagürü choxü̃: —¡Ẽcü inaxũãchi rü ñaa duü̃xü̃gümaxã nüxü̃ ixu i ñaa ore! “Rü woo nüxü̃ nax naxĩnüexü̃ i chorü ore rü taxũtáma nüxü̃ nacua̱xgü nax ta̱xacüchiga yixĩxü̃. Rü woo nüxü̃ nax nadaugüxü̃ i ngẽma mexü̃ i chaxüxü̃ rü taxũtáma nüxü̃ nacua̱xgüéga nax ta̱xacüchiga yixĩxü̃.
10 Rü ngexrüma nax chorü oremaxã cuyaxucu̱xẽgüxü̃ i ñaa duü̃xü̃gü i norü ĩnügutama rüxĩnüexü̃, erü taxũtáma cuga naxĩnüe. Rü nüetama ega nügü yangauxchixexẽẽgu na̱xcha̱xwa i chorü ucu̱xẽgü nax tama nüxü̃ naxĩnüexü̃ca̱x. Rü nüetama ega nügü yangexetügu na̱xcha̱xwa i ngẽma mexü̃ i naxca̱x chaxüxü̃ nax tama nüxü̃ nadaugüxü̃ca̱x rü ngẽmaãcü tama cha̱u̱xca̱x nawoeguxü̃ca̱x nax choma naxca̱x chayataanexẽẽgüxü̃ca̱x” —ñanagürü choxü̃.
11 6:11-12 Rü yexguma ga choma rü nüxna chaca rü ñachagürü: —¿Ñuxre i ngunexü̃ tá nixĩ i ngẽmaãcü yixĩxü̃, Pa Corix? —ñachagürü. Rü yexguma ga nüma rü choxü̃ nangãxü̃ rü ñanagürü: —Ngẽmaãcü tá nixĩ ñu̱xmatáta yima ĩanegü rü nagu napogüe, rü taxuxü̃táma i duü̃xü̃ ínayaxü rü ñu̱xmatáta ya yima ĩpatagü rü nangearü duü̃xü̃güã̱xgü rü naanegü rü nabáianemare rü ñu̱xmatáta íchanamuxü̃ i ngẽma duü̃xü̃gü i norü naanewa, rü ngẽmaãcü i nachixü̃ane rü nangeãcumare.
12 Nüü̃ nadau 6:11
13 Rü woo chi 100 tanüwa rü 10 i duü̃xü̃gü íyaxüxgu nawa ya yima ĩane rü ngẽma rü tá ta nadai ñoma wüxi i nai i daxüchixü̃rüxü̃. Natürü ñoma wüxi i naixchimewa ngexwaca̱xü̃xü̃ i nane rüxüamaxü̃rüxü̃ tá nixĩ i ngẽma Iraétanüxü̃. Erü noxretama tá ínayaxü, rü ngẽmatanüwa tá ne naxĩ i duü̃xü̃gü i aixcüma chauga ĩnüexü̃ —ñanagürü ga Tupana.
