Isaías 60:1-22
60 ¡Íperüdagü, Pa Yerucharéü̃cüã̱xgüx! Erü wena ngóonexü̃wa pengẽxmagü. Rü Tupanaarü pora rü petanüwa nangẽxma.
2 Rü ẽanexü̃wa nangema i ñoma i naane, rü guxü̃ma i nachixü̃anegüca̱x rü nawaane. Natürü nüma ya Cori ya Tupana rü tá pexca̱x nanangóonexẽxẽ rü pewa tá inanawe̱x i norü pora.
3 Rü guxü̃ma i nachixü̃anegü rü tá naxca̱x naxĩ i ngẽma ngóonexü̃ i pewa ngẽxmaxü̃. Rü ngẽma nachixü̃anegüarü ãẽ̱xgacügü rü pexü̃tawa tá naxĩ nax pexü̃ íyadaugüxü̃ca̱x nax wena nachixü̃ane i poraxü̃ pixĩgüxü̃.
4 ¡Rü dücax, pegücüwagu perüdaunü nax guxü̃ma i Iraétanüxü̃ naxĩtaque̱xexü̃ nax Yerucharéü̃ca̱x nawoeguxü̃! Rü penegü rü yáxü̃wa tá ne naxĩ, rü pexacügü rü duü̃xü̃gü rü tá ngĩchacüügu ngĩxü̃ ngéma ne nagagü.
5 Rü ngẽxguma ngẽmaxü̃ pedaugügu rü tá poraãcü petaãẽgü rü taãẽmaxã tá penapagü. Rü ngẽma márpechinüwa ngẽxmagüxü̃ i nachixü̃anegücüã̱x rü tá pexca̱x ngéma nanana i norü ngẽmaxü̃gü.
6 Rü muxü̃tama i duü̃xü̃gü i togü i nachixü̃anegücüã̱x rü tá caméyugügu Yerucharéü̃wa naxĩ. Rü tá ínangugü i Madiáü̃cüã̱xgü rü Efácüã̱xgü. Rü guxü̃ma i Chabáanecüã̱xgü rü núma tá naxĩ namaxã i norü úirugü rü pumaragü. Rü tá choxü̃ nicua̱xüü̃gü naxca̱x i ngẽma mexü̃ i chorü poramaxã chaxüxü̃.
7 Rü ngẽma Quedáxanecüã̱xarü carnérugü rü pexrü tá nixĩgü. Rü ngẽma Nebaióxanearü carnérugü rü pexme̱xwa tá nangẽxmagü nax ãmare i namaxã chataãẽxü̃ cha̱u̱xca̱x piguxü̃ca̱x i chorü ãmarearü guruü̃wa. Rü choma rü tá yexera chanamexẽxẽ ya chopata ya taxü̃ne.
8 60:8-9 ¿Rü ta̱xacügü nixĩgü i ngẽma paxa ngéma ne üxü̃ ñoma caixanexü̃ paxa i ñaxü̃rüxü̃ rü ñoma muxtucugü i paxa naxchiãü̃ca̱x ibuxmüxü̃rüxü̃? Rü yimágü nixĩ ya wapurugü ya wüxigu Tárchixarü wapurugümaxã yáxü̃wa ne ĩxü̃ne. Rü yimá nixĩ ya wapurugü i yáxü̃wa cuxacügü tüxü̃ ne gagüne namaxã i tümaarü úirugü rü diẽrugü naxca̱x ya Cori ya curü Tupana ya Üünecü ya pexü̃ poraxẽẽcü i pema i Iraétanüxü̃.
9 Nüü̃ nadau 60:8
10 Pa Yerucharéü̃cüã̱xgüx, choma rü pemaxã chanu ga noxri, rü yemaca̱x nixĩ ga pexü̃ chapoxcuxü̃. Natürü i ñu̱xmax rü tá pexü̃ chanawe̱x nax poraãcü pexü̃ changechaü̃xü̃. Rü to i nachixü̃anecüã̱xgü i duü̃xü̃gü rü tá wena nayamexẽẽgü i perü ĩanearü poxeguxü̃tápü̱x. Rü ngẽma togü i nachixü̃anearü ãẽ̱xgacügü rü tá pexü̃ narüngü̃xẽxẽ.
11 Rü ngẽma Yerucharéü̃arü ĩã̱xgü rü ngunecü rü chütacü rü taxũtáma narüwãxta. Rü ngẽmaãcü i ngẽma togü i nachixü̃anecüã̱xgüarü ãẽ̱xgacügü rü tá núma nanana i norü ngẽmaxü̃gü i mexẽchixü̃.
12 Rü guxü̃ma i ngẽma nachixü̃anegü i tama pexü̃ rüngü̃xẽẽxü̃ rü tá narüxogü.
13 Rü Tupana rü Yerucharéü̃cüã̱xgüxü̃ ñanagürü: —Guxü̃ma i naigü i mürapewa i mexü̃ i Líbanuwa ngẽxmagüxü̃ i pinugü rü abétugü rü chipregü rü tá norü nga̱xãẽruxü̃ nixĩgü ya chopata ya taxü̃ne i ngextá íchachixü̃wa.
14 Rü yema ü̃pa perü uanügü ixĩgüxü̃ rü ngẽma nataagü rü tá núma pexü̃tawa naxĩ rü pepe̱xegu tá nügü ínarüxíxragü. Rü yema noxri pexchi aiexü̃ rü tá pepe̱xegu nacaxã́pü̱xügü rü tá pexü̃ ñanagürügü: “Perü ĩane ya Chióü̃ rü Iraétanüxü̃arü Tupana ya Üünecüarü Ĩane nixĩ”, ñanagürügü tá.
15 Rü yexguma pexna yaxũgachigu ga yema togü ga duü̃xü̃gü rü pexchi naxaie rü taxúema perü ĩanearü namagüwa naxüpetü. Natürü i ñu̱xma i choma rü tá pexü̃ charüngü̃xẽxẽ nax petachigaxü̃ca̱x rü guxü̃gutáma taãẽwa pengẽxmagüxü̃ca̱x.
16 Rü ngẽma togü i nachixü̃anegü rü tá pexna nanana i ngẽma rümemaegüxü̃ i nawemügü rü ngẽma norü ãẽ̱xgacügü rü tá pexca̱x núma nanana i norü ngẽmaxü̃gü. Rü ngẽmawa tá nüxü̃ pecua̱x nax choma ya Tupana ya poracü yixĩxü̃ i pexü̃ íchapoxü̃xü̃ rü pexü̃ íchanguxü̃xẽẽxü̃, Pa Acóbutanüxü̃x.
17 Rü choma ya perü Tupana, rü mexü̃wa rü taãẽwa tá pexü̃ chamaxẽxẽ. Rü choma rü bróũchechicüxü tá pexna chanaxã i úiru, rü fieruchicüü tá pexna chanaxã i diẽrumü, rü mürapewachicüü tá pexna chanaxã i bróũche rü nutagüchicüxü tá pexna chanaxã i fieru.
18 Rü ngẽma perü naanewa rü marü tagutáma máetachigaxü̃ rü chixexü̃chigaxü̃ pexĩnüe rü ngẽma perü naane rü marü tagutáma texé tanachixexẽxẽ. Rü ngẽma Yerucharéü̃arü poxeguxü̃tápü̱x rü “Nguxü̃xẽxẽruxü̃”, tá nixĩ i naéga. Rü ngẽma norü ĩã̱xgü rü “Cua̱xüxü̃”, tá nixĩ i naéga.
19 Rü ngunecü rü marü taxũtáma penaxwa̱xe nax üa̱xcü pexü̃ báxixü̃, rü chütacü rü marü taxũtáma penaxwa̱xe nax tauemacü pexü̃ báxixü̃, erü choma ya perü Cori tá nixĩ i perü omü i guxü̃gutáma ichabáxixü̃. Rü choma ya perü Tupana tá nixĩ i perü poraxẽẽruxü̃.
20 Rü yimá perü üa̱xcü rü tagutáma narüxücu, rü perü tauemacü rü tagutáma nixo, erü choma ya perü Cori nixĩ i perü omü i guxü̃gutáma ichabáxixü̃. Rü ngẽmaãcü tá ichayanaxoxẽxẽ i perü ngechaü̃.
21 Rü guxü̃ma i ngẽma Yerucharéü̃wa maxẽxü̃ rü duü̃xü̃gü i aixcüma mexü̃gu rüxĩnüexü̃ tá nixĩgü. Rü guxü̃gutáma nachixü̃anearü yora tá nixĩgü. Rü ngẽma duü̃xü̃gü rü ñoma wüxi i nanetü i chomatama ichatoxü̃rüxü̃ tá nixĩgü rü ngẽmatanüwa tá nango̱x i chorü pora.
22 Rü ngẽma duü̃xü̃gü i ñu̱xma noxremarexü̃ rü tá nimu rü wüxi i nachixü̃ane i poraxü̃ tá nixĩgü. Rü chaxicatama nixĩ ya Tupana chixĩxü̃. Rü ngẽxguma nawa nanguxgu i ngẽma ngunexü̃ rü paxa tá chanaxü i guxü̃ma i ngẽma —ñanagürü ya Tupana.
