Isaías 62:1-12
62 Pa Chióü̃x, poraãcü cuxü̃ changechaü̃ rü ngẽmaca̱x taxũtáma ichayarüchiane. Rü Pa Yerucharéü̃x, taxũtáma charüngü̃ ñu̱xmatáta Tupana cuxü̃ rüporamaexẽxẽ. Rü ngẽxguma Tupana cuxü̃ rüporamaexẽẽgu rü ñoma ngexwaca ya ngunexü̃rüxü̃ tá cuxca̱x ningóone. Rü ngẽxguma Tupana curü uanügüme̱xẽwa curü duü̃xü̃güxü̃ ínguxü̃xẽẽgu rü ñoma wüxi i omü i cuxü̃ báxixü̃rüxü̃ tá nixĩ nax ngóonexü̃wa cungẽxmaxü̃.
2 Pa Yerucharéü̃x, ngẽxguma Tupana curü duü̃xü̃güxü̃ ínguxü̃xẽẽgu rü ngẽma togü i nachixü̃anegü tá nüxü̃ nadaugü. Rü guxü̃ma i ãẽ̱xgacügü i ñoma i naanewa maxẽxü̃ rü tá nüxü̃ nicua̱xãchitanü i curü pora. Rü ñu̱xũchi nüma ya Tupana rü tá wüxi i ngexwacaxü̃ i naéga cuxna naxã.
3 Rü cuma rü ñoma wüxi i ãẽ̱xgacüarü nga̱xcueruxü̃ i mexẽchixü̃ i Cori ya Tupaname̱xẽwa ngẽxmaxü̃rüxü̃ tá quixĩ.
4 Rü duü̃xü̃gü rü marü taxũtáma ñanagürügü: —Yerucharéü̃ rü ĩane ya íta̱xmarene nixĩ —ñanagürügü. Rü tá: —Tupanaarü Ĩane —ñanagürügü. Rü ngẽma curü naane rü taxũtáma —Naane i chixexü̃ —ñanagürügü. Rü ngẽxguma rü tá: —Naane i Tupanaarü Ixĩxü̃ —ñanagürügü. Erü Cori ya Tupana rü tá cumaxã nataãxẽ, rü curü naanearü yora tá nixĩ.
5 Rü ñoma wüxi ya ngextü̱xücü i wüxi i pacü nügümaxã ngĩxü̃ üarü yoraã̱xcürüxü̃ rü Tupana rü tá nügümaxã nanaxüarü yoraã̱x ya Yerucharéü̃. Rü Tupana rü tá nanamexẽxẽ ya yima ĩane rü namaxã tá nataãxẽ, ñoma wüxi ya yatü ya naxma̱xmaxã taãẽcürüxü̃.
6 62:6-7 Pa Yerucharéü̃cüã̱xgüx, choma rü perü ĩanearü poxeguxü̃tapü̱xétügu chanamugü i dauruü̃gü. Rü nümagü rü ngunecü rü chütacü tá pexü̃ ñanagürügü: —Pema ya Tupanaxü̃ icua̱xüü̃güxe, ¡rü taxṹ i perüchianegüxü̃! ¡Rü taxṹ i penangü̃xẽẽxü̃ ya Tupana ñu̱xmatáta wena naxü ya Yerucharéü̃ nax wüxi ya ĩane ya tachigane yixĩxü̃ca̱x! —ñanagürügü.
7 Nüü̃ nadau 62:6
8 Rü nüma ya Tupana rü nügüégagutama Iraétanüxü̃maxã nanaxuegu rü ñanagürü: —Tagutáma wena chanangexrü nax norü uanügü nangṍxü̃ i Iraétanüxü̃arü trigu rü ngẽma togümare i duü̃xü̃gü yaxaxgüxü̃ ya Iraétanüxü̃arü bínu ya poraãcü naxca̱x napuracüecü.
9 Rü ñu̱xma rü pematama tá penabuxu i penetüarü o rü tá penangõ̱x. Rü tá penabuxu i úbagü rü chopata ya taxü̃neã̱xtüwa tá peyaxaxü ya ngexwacaxü̃cü ya bínu, rü tá choxü̃ picua̱xüü̃gü —ñanagürü.
10 ¡Pa Yerucharéü̃cüa̱xgüx, ĩanearü ĩã̱xgüwa ípechoxü̃ rü penamexẽxẽ i ngẽma nama naxca̱x i petanüxü̃ i woeguxü̃! ¡Rü mea uãẽãcü penaxü̱x rü ípenawogü ya nutagü! ¡Rü penawãĩxnagü i wüxi i wonera nax nüxü̃ nadaugüxü̃ca̱x i ngẽma togü i nachixü̃anegü!
11 Rü Tupana rü guxü̃ma i duü̃xü̃gü i ñoma i naanewa maxẽxü̃maxã nüxü̃ nixu rü ñanagürü: —¡Ĩane ya Chióü̃cüã̱xgümaxã nüxü̃ pixu rü marü ínangu i norü nguxü̃xẽxẽruxü̃! ¡Rü namaxã nüxü̃ pixu rü Tupana rü marü ínananguxü̃xẽxẽ rü nanawoeguxẽxẽ i norü duü̃xü̃gü ga norü uanügü gagüxü̃! —ñanagürü.
12 Rü ngẽma togü i nachixü̃anegü rü tá ñanagürügü: —Iraétanüxü̃ rü Tupanaarü Duü̃xü̃gü i Üünexü̃ nixĩgü. Rü nüma ya Tupana rü marü ínananguxü̃xẽxẽ. Rü yima norü ĩane ya Yerucharéü̃ rü Ĩane ya Poraãcü Ngúchaxü̃ne nixĩ rü Ĩane ya Tama Ngéma Ta̱xmarene nixĩ —ñanagürügü tá.
