Isaías 64:1-12
64 ¡Ẽcü ínangegü i ngẽma caixanexü̃ i dauxü̃wa ngẽxmaxü̃, Pa Tupanax, rü ngéma írüxĩ! Rü yima ma̱xpǘnegü rü tá naxĩã̱xãchitanü i ngẽxguma cungo̱xgu.
2 Rü ngẽxguma núma cuxũxgu rü ñoma üxü i chuchuxü̃necü ixaxexẽẽxü̃rüxü̃ tá quixĩ, rü ñoma üxü i dexá idocachiüxẽẽxü̃rüxü̃ tá quixĩ. Rü ngẽxguma i ngẽma curü uanügü rü tá nüxü̃ nacua̱xgü nax cuxicatama Tupana quixĩxü̃. Rü ngẽma nachixü̃anegüarü duü̃xü̃gü rü tá cupe̱xewa nidu̱xrue.
3 Rü yexguma guma ma̱xpǘnegügu ícurüxĩ̱xgu rü Moichépe̱xewa cunaxüxgux ga yema ãũcümaxü̃ ga tama duü̃xü̃gü nagu irüxĩnüexü̃, rü guma ma̱xpǘnegü rü cupe̱xewa nixĩãxtanücüxü.
4 Rü nũxcümacürüwa taguma texé nachiga taxĩnü rü texé nüxü̃ tadau i to i Tupana i naxüxü̃ i ngẽma cuma cuxüxü̃ tümaca̱x ya yíxema cuxü̃́ yaxõgüxe.
5 Rü cuma rü tüxü̃ cuyaxu ya yíxema tümaarü taãẽmaxã mexü̃ üxe rü nüxna cua̱xãchixe nax tanaxüxü̃ i ngẽma cuma cunaxwa̱xexü̃. Natürü i ñu̱xma rü tomaxã cunu erü cupe̱xewa chixexü̃ taxügü rü nũxcümacürüwatama tama cuga taxĩnüe.
6 Rü guxãma i toma rü cupe̱xewa duü̃xü̃gü i ixãũãchixü̃ tixĩgü. Rü woo i ngẽma taxüxü̃ i toxca̱x mexü̃, rü cupe̱xewa rü ñoma wüxi i wexa i ãũãchixü̃rüxü̃ nixĩ. Rü guxãma chixexü̃gu tayi ñoma naixatügü i pagüxü̃ irüyi̱xixü̃rüxü̃. Rü torü chixexü̃gü rü toxü̃ nigagü ñoma buanecü i ta̱xacü ngextá cuegüxü̃rüxü̃.
7 Rü tataxuma ya texé ya cumaxã idexaxe rü pora üxe nax cuxü̃tawa ngü̃xẽẽca̱x ítaca̱a̱xü̃. Rü ngẽma torü chixexü̃gagu nixĩ i toxcha̱xwa iquicúxü̃ rü toxü̃ ícuwogüxü̃.
8 Natürü ngẽmaétüwa, Pa Corix Pa Tupanax, rü cuma nixĩ i Tonatü quixĩxü̃. Toma rü waixü̃mü tixĩgü rü cuma nixĩ i torü üruxü̃ quixĩxü̃. Rü guxãma i toma rü cumatama toxü̃ cuxü.
9 Pa Corix Pa Tupanax ¡taxṹ i poraãcü tomaxã cunuxü̃! ¡Rü taxṹ i nüxna cucua̱xãchixü̃ ga yema chixexü̃ ga taxüxü̃! ¡Rü dücax, nagu rüxĩnü nax curü duü̃xü̃gü tixĩgüxü̃!
10 Rü yima curü ĩanegü ya üünegüne rü nachica i taxúema nagu ãpataxü̃ nixĩgü. Rü Chióü̃ rü wüxi i chianexü̃ nixĩ. Rü Yerucharéü̃ rü nagu napogüe rü taxuwama name.
11 Rü yima torü ngutaque̱xepataxü̃ ya mexẽchine rü üünene ga tonatügü cuxü̃ nawa icua̱xüü̃güne rü nixa. ¡Rü ngẽma cupataarü ngẽmaxü̃gü i toxü̃́ chu̱xuxü̃ rü nichixe!
12 Rü guxü̃ma i ngẽma ngupetüxü̃étüwa Pa Tupanax, ¿rü taxũtáma e̱xna ta̱xacü cuxü? ¿Ẽ̱xna taxũtáma toxü̃ cungãxü̃, rüe̱xna yexera tá toxü̃ cupoxcueama?
