Isaías 65:1-25
65 Tupana rü ñanagürü: —Yema duü̃xü̃gü ga taxuxü̃ma ga ta̱xacüca̱x choxna cagüxü̃ nixĩ ga chauxü̃tawa ĩxü̃. Rü yema duü̃xü̃gü ga tama cha̱u̱xca̱x daugüxü̃ nixĩ ga choxü̃ yangaugüxü̃. Rü duü̃xü̃gü ga taguma chomaxã idexagüxü̃maxã nixĩ ga nüxü̃ ñachaxü̃: “Chanuxma nixĩ”, ñachaxü̃.
2 Rü guxü̃ i ngunexü̃gu íchamemare nax chanadexü̃ i ngẽma duü̃xü̃gü i tama chauga ĩnüexü̃ i chixexü̃weama rüxĩxü̃ rü noxrütama ngúchaü̃ ügüamaxü̃.
3 Rü ngẽma duü̃xü̃gü rü guxü̃guma ngúxü̃ choxü̃ ningexẽẽgü namaxã i norü chixexü̃gü. Rü putüraanecügüwa naxü̃na ínagugü naxca̱x i norü tupananetagü. Rü norü guruxü̃ i ladriyunaxca̱xwa nayagugü i pumarate̱xe.
4 Rü ngẽma duü̃xü̃gü rü yuetamaü̃güwa narütogü rü ãxmaxü̃gügu napegü nax ngéma yuetaxü̃ yacua̱xüü̃güxü̃ca̱x. Rü nanangõ̱xgü i chu̱xuxü̃ i cuchimachi, rü norü paneragü rü ngẽma namachitüü̃maxã nayaxüãcugü.
5 Rü ngẽma duü̃xü̃gü rü ñanagürügü: “Taxṹ i toxna cungaicamaxü̃ erü duü̃xü̃gü i üünexü̃ tixĩgü”, ñanagürügü. Natürü ngẽma duü̃xü̃gü rü ñoma üxü i guxü̃ i ngunexü̃ iyaa̱u̱xraxü̃rüxü̃ nixĩgü. Rü choxü̃ nachixewe ñoma üxüema i taxmaraü̃gu cáixcuemaxü̃rüxü̃.
6 Natürü guxü̃ma i ngẽma naxügüxü̃ rü chope̱xegu naxümatü, rü ngẽmaca̱x rü taxũtáma chanangupetüxẽẽmare. Rü ngẽma chixexü̃ i naxügüxü̃gagu tá naxca̱x íchananguxẽxẽ i norü natanü.
7 Rü ngẽma nax namáetagüxü̃ca̱x rü nanatügü rü ta namáetagüxü̃ca̱x rü tá chanapoxcue. Rü nümagü rü poraãcü choxü̃ nanuxẽẽgü erü ma̱xpǘnegüwa naxchicüna̱xãgüca̱x pumarate̱xe ínagugü. Rü ngüchitaeruxü̃güwa choxü̃ tachoxü̃gagü rü yemaacü choxü̃́ nanangu̱xẽẽgü. Rü ngẽmaca̱x i choma rü tá chanapoxcue —ñanagürü. Rü nüma ya Cori ya Tupana nixĩ i ngẽma ñaxü̃.
Cori ya Tupana rü duü̃xü̃gümaxã mexü̃ naxuegu
8 Nüma ya Tupana rü ñanagürü: —Ngẽxguma poraãcüma yaxãxtüü̃gu i úbagü rü duü̃xü̃gü rü tama nanaxaiya̱xü̃gü, erü nüxü̃ nacua̱xgü nax tacütama ya bínu nawa nüxü̃́ ínguxuchixü̃. Rü ngẽxgumarüxü̃ tá ta i chomax, rü ngẽma nax nüxü̃ changechaü̃xü̃gagu i ngẽma chorü duü̃xü̃gü rü taxũtáma chanadai i guxü̃ma i Iraétanüxü̃.
9 Rü ngẽma Acóbutaagü rü tá chayamuxẽxẽ. Rü tá chayamuxẽxẽ i Yudátanüxü̃ nax ma̱xpǘneanewa namaxẽxü̃ca̱x. Rü ngẽma duü̃xü̃gü i nüxü̃ chaxunetaxü̃na tá nixĩ i chanaxãxü̃ i ngẽma naane, rü ngéma tá namaxẽ i chorü duü̃xü̃gü.
10 Rü Charóü̃arü metachinüanexü̃wa rü tá carnérugümaxã nayapa, rü Acóxarü doxonexü̃wa tá nayachibüe i norü wocagü i ngẽma chorü duü̃xü̃gü i choxü̃́ yaxõgüxü̃.
11 Natürü i pema rü choxna pixĩgachitanü, rü nüxü̃ perüngümae ya yima chopata ya ma̱xpǘne ya üünexü̃wa ngẽxmane. Rü ñu̱xũchi ngẽma tupananetagü i Gáx i mexü̃ ueguxü̃, rü Mení i chixexü̃ ueguxü̃, rü pema rü õna rü bínu nüxna pexãgü.
12 Rü ngẽmaca̱x pemaxã chanaxuegu nax taragu tá peyuexü̃. Yerü yexguma pexca̱x chacaxgu rü tama choxü̃ pengãxü̃gü, rü yexguma pemaxã chidexagu rü tama choxü̃́ iperüxĩnüe. Rü penaxüama ga yema tama chanaxwa̱xexü̃ rü penayauxgü ga yema choxü̃ nuxẽẽxü̃ —ñanagürü ga Tupana.
13 Rü Tupana rü ñanagürü ta: —Ngẽma chorü duü̃xü̃gü i choxü̃́ yaxõgüxü̃ rü taxũtáma nataiyae, natürü i pema ya choxna ixĩgachitanüxẽ rü tá pitaiyae. Rü ngẽma chorü duü̃xü̃gü rü tá naxaxegü, natürü i pema rü tá pita̱xawae. Rü ngẽma chorü duü̃xü̃gü rü tá nataãẽgü, natürü i pema rü tá pexãnee.
14 Rü nümagü rü tá taãẽãcüma nawiyaegü, natürü i pema rü tá ngechaü̃maxã rü ĩ̱xãchiãẽmaxã aita pexüe rü pixauxe.
15 Rü ngẽma chorü duü̃xü̃gü rü peégamaxã tá nixĩ i togü i duü̃xü̃gümaxã chixexü̃ naxuegugüxü̃. Rü choma ya Cori ya Tupana ya Guxü̃étüwa Ngẽxmaxe rü tá pexü̃ chadai. Natürü ngẽma chorü duü̃xü̃güna tá chanaxã i wüxi i naéga i ngexwaca̱xü̃xü̃.
16 Rü yíxema ñaa nachixü̃anewa ngü̃xẽẽca̱x íca̱xe rü chauégagu tá naxca̱x ítaca, erü choma rü aixcüma chayanguẽxẽ i ngẽma nüxü̃ chixuxü̃. Rü yíxema ñaa nachixü̃anewa ta̱xacüca̱x ixunetaxe rü chauégagu tá itaxuneta erü choma rü chayanguxẽxẽ i ngẽma chorü uneta. Rü yema chixexü̃gü ga ü̃pa pexüexü̃ rü marü nüxü̃ icharüngüma rü marü tama nagu charüxĩnü.
17 Dücax, rü guxü̃ma i ngẽma dauxü̃wa nüxü̃ idauxü̃ rü ngexwaca̱xü̃xü̃ tá chaxü. Rü ngẽxgumarüxü̃ ta i ñoma i naane rü to i ngexwaca̱xü̃xü̃ tá chaxü. Rü ngẽma nüxíraxü̃xü̃ rü marü tá nüxü̃ itarüngüma rü taxúetama texé ñuxgu nüxna tacua̱xãchi.
18 Rü name nixĩ nax guxü̃guma namaxã petaãẽgüxü̃ i ngẽma tá chaxüxü̃. Erü tá chanaxü ya wüxi ya ngexwacaxü̃ne ya Yerucharéü̃ i taxuxü̃ma i chixexü̃ nawa ngẽxmane. Rü ngẽma duü̃xü̃gü i nawa maxẽxü̃ rü tá aixcüma nataãẽgü.
19 Rü choma rü tá ta namaxã chataãxẽ ya yima ĩane ya Yerucharéü̃ rü tá namaxã chataãxẽ i ngẽma chorü duü̃xü̃gü i nawa maxẽxü̃. Rü yima ĩanewa rü marü taxũtáma nüxü̃ taxĩnü i axu rü taxúetama ngúxü̃ tinge rü ngẽmagagu aita taxü.
20 Rü ngéma rü tataxuma ya buxe ya noxretama i ngunexü̃ maxü̃́xẽ rü paxa yuxe, rü bai ya yaxguã̱x ya tama mea rüyaexe. Rü yíxema 100 ya taunecü tüxü̃́ ngẽxmaxe yuxe rü tá ngextü̱xütama. Rü yíxema tama 100 ya taunecüwa nguxe nax tayuxü̃ rü tümaarü chixexü̃gagutama nixĩ i paxa tayuxü̃.
21 Rü ngẽma chorü duü̃xü̃gü rü tá naxüpatagü rü napatagüwa tá namaxẽ. Rü naanegüwa tá namaxã natoegü i úbagü rü úbagümaxã tá naxãwemügü.
22 Rü taxũtáma texé taxüpata nax togue nawa maxü̃xü̃ca̱x. Rü taxũtáma texé tatoxe nax togue nangṍxü̃ca̱x. Rü ngẽma chorü duü̃xü̃gü rü tá mucü ya taunecü namaxẽ ñoma wüxi i nairüxü̃. Rü tá nanangõ̱xgü i ngẽma nümatama naxca̱x napuracüexü̃.
23 Rü taxũtáma natüca̱xma naxüane i duü̃xü̃gü, rü nataxutáma i naxacügü i paxa yuexü̃. Erü nümagü rü nataagü nixĩ ga yema duü̃xü̃gü ga Tupana mexü̃ namaxã ueguxü̃. Rü ngẽxgumarüxü̃ tá ta Tupana mexü̃ namaxã naxuegu i ngẽma nataagüarü nataagü.
24 Rü naxü̃pa nax nüma choxna nacagüexü̃, rü choma ya Tupana rü marü tá nüxü̃ changãxü̃. Rü naxü̃pa nax yanachianegüxü̃ nax choxna nacagüexü̃, rü choma rü marü tá nüxü̃ chaxĩnü.
25 Rü ngẽma airu i naixnecücüã̱x rü tá carnérumaxã wüxiwa nachibüe. Rü ngẽma leóü̃ rü wocarüxü̃ tá maxẽ nangõ̱x. Rü ngẽma ãxtape rü marü taxũtáma tüxü̃ nangõ̱x, erü ngẽma waixü̃mü tá nangõ̱x. Rü guxü̃wama ya yima ma̱xpǘne ya chopata nawa ngẽxmanewa rü taxúetama ya texé chixexü̃ taxü —ñanagürü. Rü nüma ya Cori ya Tupana nixĩ i ngẽma ñaxü̃.
