Isaías 66:1-24
66 Tupana rü ñanagürü: —Ngẽma daxũguxü̃ i naane rü chorü tochicaxü̃ nixĩ rü ñoma i naane rü chorü chicutüchica nixĩ. ¿Rü ngexta tá nixĩ i choxü̃́ penaxüxü̃ ya wüxi ya chopata? ¿Rü ngexta tá nixĩ i choxü̃́ penaxüxü̃ i wüxi i nachica i nagu charüngü̃xü̃?
2 ¡Rü choma nixĩ i chanaxüxü̃ i guxü̃ma i ñoma i naanewa nüxü̃ idauxü̃ rü yemaacü nixĩ ga nangóexü̃! Rü choma ya Cori nixĩ i ngẽma ñachaxü̃. Rü choma rü tüxü̃ chadawenü ya yíxema ngearü diẽruã̱xgüxe rü yíxema naxĩ̱xãchiãẽgüxe ya naga ĩnüexe i chorü ore.
3 Natürü ngẽma duü̃xü̃gü i chixexü̃gu maxẽxü̃ rü nanaxügü i ngẽma nümatama nagu naxĩnüexü̃. Rü ngẽxguma cha̱u̱xca̱x yama̱xgüãgu i wüxi i woca i yatüxü̃ rü cha̱u̱xca̱x rü ñoma wüxi ya duü̃xẽ tüxü̃ yama̱xgüxü̃rüxü̃ nixĩgü. Rü ngẽxguma cha̱u̱xca̱x yama̱xgüãgu i wüxi i carnéru rü cha̱u̱xca̱x rü ñoma wüxi ya airu cha̱u̱xca̱x yama̱xgüãxü̃rüxü̃ nixĩgü. Rü ngẽxguma choxna naxãgüãgu i norü ãmare i trigu rü cha̱u̱xca̱x ñoma cuchiarü nagü choxna naxãgüxü̃rüxü̃ nixĩgü. Rü ngẽxguma pumarate̱xe cha̱u̱xca̱x yagugügu rü cha̱u̱xca̱x ñoma wüxi i naxchicüna̱xãca̱x yagugüãxü̃rüxü̃ nixĩgü. Rü ngẽma duü̃xü̃gü i ngẽma ügüxü̃ rü taãẽãcü nanaxü i guxü̃ma i ngẽma chixexü̃.
4 Natürü choma rü tá ta nüxü̃ chaxuneta i ngẽma poxcu i namaxã tá chanapoxcuexü̃. Rü tá naxca̱x íchananguxẽxẽ i ngẽma guxchaxü̃ i poraãcü nüxü̃ namuü̃exü̃. Erü ngéma ichacagü natürü taxúema choxü̃ tangãxü̃, rü ngẽxguma chidexagu rü taxúema choxü̃ taxĩnü. Rü nanaxü i ngẽma tama chanaxwa̱xexü̃, rü nagu namaxẽ i ngẽma tama namaxã chataãẽxü̃ —ñanagürü ga Tupana.
5 Rü ñanagürü: —¡Dücax, pema nax Tupanaga pexĩnüexü̃, rü iperüxĩnüe i norü ore! Rü nümaxü̃ i pemücügü i pexchi aiexü̃ rü pewe ingẽxü̃tanüxü̃ naxca̱x nax chorü duü̃xü̃gü pixĩgüxü̃, rü choxü̃ nacugüeãcüma rü ñanagürügü: “Ẽcü Tupana toxü̃ nawé i norü pora erü nüxü̃ tadaugüchaü̃ nax petaãẽgüxü̃”, ñanagürügü. Natürü ngẽma pemücügü i ngẽmaãcü idexagüxü̃ rü Tupana tá nanaxãneexẽxẽ.
6 Rü ĩanewa rü Tupanapata ya taxü̃newa inanaxũ i wüxi i naga. Rü ngẽma naga nixĩ i Tupanaga i namaxã yangagüãxü̃ i norü uanügü.
7 Rü Yerucharéü̃ rü ngürüãchi naxíraxacü naxü̃pa nax tangu̱xnecaxü̃. Rü nabu i wüxi i nane.
8 ¿Texé nüxü̃ taxĩnü i ore i nangexgumaraü̃xü̃? ¿Rü texé nüxü̃ tadau i ta̱xacü i nangexgumaraü̃xü̃? ¿Rü ñuxãcü wüxitama i ngunexü̃gu nango̱x i wüxi i nachixü̃ane? ¿Rü ñuxãcü wüxi ya ĩane rü ngürüãchimare nango̱x? Natürü yima ĩane ya Chióü̃ rü yexguma guxchaxü̃wa nayexmagu rü wüxitama i ngunexü̃gu ngürüãchi nawoegu ga norü duü̃xü̃gü.
9 ¿Rü ñu̱xma nax choma yixĩxü̃ i norü uanügüme̱xẽwa íchanguxü̃xẽẽxü̃ i ngẽma duü̃xü̃gü, rü ñuxãcü tá nüxna chanachu̱xuxü̃ nax norü ĩaneca̱x nawoeguxü̃? —ñanagürü. Rü nüma ya Cori ya Tupana nixĩ i ngẽma ñaxü̃.
10 Rü Tupana rü ñanagürü: —Pema nax Yerucharéü̃xü̃ pengechaü̃güxü̃ rü naxca̱x nax pexauxexü̃, rü ñu̱xma rü name nax wüxigu guxãma Yerucharéü̃maxã petaãẽgüxü̃.
11 Rü pema Pa Yerucharéü̃cüã̱xgüx, rü tá poraãcü petaãẽgü, ñoma wüxi i õxchana i norü mama meama maixü̃ rü ngãxpütüwexü̃rüxü̃.
12 Erü choma ya Cori ya Tupana rü ñachagürü: “Choma rü ñoma wüxi i natüarü dexá i mea iyaxü̃rüxü̃ tá Yerucharéü̃wa chananguxẽxẽ i taãxẽ. Rü togü i nachixü̃anegüarü ãmaregü rü tá paxa pexca̱x íchanangugüxẽxẽ ñoma wüxi i natü i poraü̃chíüxü̃rüxü̃. Rü ngẽmaãcü i pema, Pa Yerucharéü̃cüã̱xgüx, rü ñoma wüxi i õxchana i meama maixü̃rüxü̃ tá pengãxpütüwegü. Rü choma rü tá chauchacüxügu pexü̃ chigagü rü choperemawa tá pexü̃ chameãxẽ.
13 Rü ñoma wüxi i mama i naxacüxü̃ meãẽxü̃rüxü̃ rü choma rü tá pexü̃ chataãẽxẽxẽ i Yerucharéü̃wa” —ñanagürü ga Tupana.
14 Rü ngẽxguma tá ngẽmaxü̃ pedaugügu, rü perü maxü̃newa rü tá petaãẽgü. Rü ñoma maxẽ i ngexwaca̱xü̃xü̃rüxü̃ tá pexü̃́ nangẽxma i ngexwaca̱xü̃xü̃ i maxü̃. Rü nüma ya Cori ya Tupana rü tá norü duü̃xü̃güxü̃ nanawe̱x i norü pora. Natürü norü uanügüxü̃ rü tá nanawe̱x i norü nu.
15 Rü nüma ya Tupana rü tá üxüemagu ínangu rü yima norü carugü ya daiwexü̃ rü ñoma wüxi ya buanecü ya íxã̱ũ̱xemacürüxü̃ tá nixĩgü. Rü tá nanapoxcue i norü uanügü, rü ngẽma norü poxcu rü ñoma üxüema iya̱u̱xraxü̃rüxü̃ tá nixĩ.
16 Erü Tupana rü üxümaxã rü taramaxã tá nanapoxcue i guxü̃ma i ñoma i naanewa maxẽxü̃ i duü̃xü̃gü. Rü tá namuxũchi i ngẽma poxcugu yuexü̃.
17 Tupana rü ñanagürü: —Wüxigu tá nayue i ngẽma duü̃xü̃gü i nügü imexẽẽgüxü̃ nax putüranecüwa naxchicüna̱xãgüxü̃ yacua̱xüü̃güxü̃ca̱x rü ngẽma duü̃xü̃gü i nangõ̱xgüxü̃ i cuchimachi rü ü̃cagü rü togü i naeü̃gü i ãũãchixü̃. Rü wüxicana tá nayue i ngẽma duü̃xü̃gü, erü meama nüxü̃ chacua̱x i ngẽma chixexü̃ i naxügüxü̃ rü nagu naxĩnüexü̃. Rü ngẽxguma i choma rü tá íchangu nax chanangutaque̱xexẽẽxü̃ca̱x i guxü̃ne ya ĩanecüã̱xgü rü nachixü̃anecüã̱xgü. Rü nüma rü tá nua naxĩ rü tá nüxü̃ nadaugü i ngẽma chorü üünemaxã chaxüxü̃.
18 Erü choma rü nüxü̃ chacua̱x i ngẽma nagu naxĩnüexü̃ rü ngẽma naxügüxü̃ i ngẽma duü̃xü̃gü. Rü ngẽmaca̱x i choma rü tá chanangutaque̱xexẽxẽ i guxü̃ma i nachixü̃anecüã̱xgü i duü̃xü̃gü i to i nagawa idexagüxü̃. Rü tá nua nangugü rü tá nüxü̃ nadaugü i chorü pora.
19 Rü wüxi i cua̱xruxü̃ tá nüxü̃ chawe̱x i ngẽma duü̃xü̃gü i maxẽxü̃. Rü togü i nachixü̃anegüwa tá chanamugü i Tárchixwa rü Líbiawa rü Lídiawa i ngextá mea würaarü maxü̃xü̃ ínacua̱xgüxü̃wa. Rü tá nawa chanamugü i Tubáxwa rü Gréchiawa rü ngẽma nachixü̃anegü i yáxü̃wa ngẽxmagüxü̃ i márpechinüwa i ngextá taguma chauchigaxü̃ ínaxĩnüexü̃wa rü taguma chorü poraxü̃ ínadaugüxü̃wa. Rü nümagü rü tá ngẽma nachixü̃anegüwa nüxü̃ nixugüe i chorü porachiga.
20 Rü nua chorü ma̱xpǘne ya üünene ya Yerucharéü̃wa ngẽxmanewa tá nanagagü i ngẽma petanüxü̃ i guxü̃ i nachixü̃anegüwa ne nagagüxü̃. Rü nümaxü̃ rü tá cowaruétügu rü togü i carugu, rü togü i caruü̃gu rü togü i mulaétügu rü togü i caméyuétügu tá nua nanagagü, ñoma Iraétanüxü̃ naxpáü̃ i mexü̃gu norü ãmaregü chopata ya taxü̃newa ngẽgüxü̃rüxü̃ —ñanagürü.
21 Rü Tupana rü nidexachigüama rü ñanagürü: —Natanüwa i ngẽma rü nümaxü̃ rü tá nüxü̃ chaxuneta nax chacherdótegü yaxĩgüxü̃ca̱x rü togü nax Lebítanüxü̃gü yaxĩgüxü̃ca̱x i chopatawa. Rü choma ya Cori ya Tupana nixĩ i ngẽma ñaxü̃ —ñanagürü.
22 Rü ñanagürü ta: —Ngẽma petaagü rü ngẽma peéga rü guxü̃gutáma nangẽxmagüecha naxrüxü̃ i ngẽma ngexwaca̱xü̃xü̃ i daxuguxü̃ i naane rü ngexwaca̱xü̃xü̃ i ñoma i naane i tá chaxüxü̃.
23 Rü wüxichigü ya tauemacüarü ügügu rü ñu̱xũchi wüxichigü i yüxüarü chabadugu rü guxü̃ma i duü̃xü̃gü rü tá nua naxĩ nax choxü̃ yacua̱xüü̃güxü̃ca̱x. Rü choma ya Cori ya Tupana nixĩ i ngẽma ñachaxü̃ —ñanagürü.
24 Rü ñanagürü ta: —Ngẽxguma ínachoxü̃gu i ngẽma chorü duü̃xü̃gü rü tá nüxü̃ nadaugü nax nayuexü̃ i ngẽma duü̃xü̃gü i chomaxã rüxuanügüxü̃. Rü ngẽma õ̱xmigü i nangõ̱xgüxü̃ rü taguma nayue, rü yima üxüema ya ínaguxü̃ne rü taguma nixo. Rü guxü̃ma i duü̃xü̃gü i ngéma chopetüxü̃ rü tá poraãcü naxã̱ũ̱ã̱xgü i ngẽxguma nüxü̃ nadaugügu —ñanagürü ga Tupana.
