Isaías 7:1-25
7 Rü Chíriaanearü ãẽ̱xgacü ga Rechíü̃, rü ñu̱xũchi Iraéanearü ãẽ̱xgacü ga Péca ga Remaría nane, rü ĩane ga Yerucharéü̃ca̱x ínayaxüãchi nax nagu nachocuxü̃ca̱x. Natürü ga yema taxre ga ãẽ̱xgacügü rü tama nüxü̃́ natauxcha nax yapugüãxü̃. Rü yema nangupetü ga yexguma Acháx ga Yotáü̃ nane ga Uchía nataxa ãẽ̱xgacü ixĩxgu ga Yudáanewa.
2 Rü Acáxmaxã rü napatacüã̱xmaxã nüxü̃ nayarüxugüe ga ore ga ñaxü̃: —Ngẽma Chíriacüã̱xgü rü Efraíü̃tanüxü̃maxã nügü narüngüxẽẽgü nax taxca̱x íyaxü̃ãchixü̃ca̱x —ñaxü̃. Rü yemaxü̃ naxĩnügu rü nüma ga Yudáanearü ãẽ̱xgacü rü norü duü̃xü̃gü rü inanaxügüe nax muü̃maxã yadu̱xruxexü̃ ñoma naixnecüwa ngẽxmagüxü̃ i naigü i buanecüemamaxã íxiã̱xtanücüüxü̃rüxü̃.
3 Rü yexguma ga Cori ya Tupana rü Ichaíamaxã nidexa rü ñanagürü: —¡Cune ya Cheá-yachúxü̃ igá nax ãẽ̱xgacü ya Acháxmaxã yanadexaxü̃ca̱x! Rü nüma ya Acháx rü yimá puchu ya dauxü̃wa ngẽxmacüwa ne daxü̃ i caxteanearü gu̱xwa nangẽxma. Rü ngẽma ínangexmaxü̃wa rü nüxna nangaicama i ngẽma nama i Naxchiru Íyauxgüxü̃anewa nadaxü̃.
4 Rü ñaa orexü̃ namaxã ixu: “¡Naxuãxẽ rü cugüna nadau! Natürü tama name nax cubaixãchixü̃ rü cumuü̃xü̃ rü icurümaãchixü̃ naxca̱x i ngẽma Chíriaanearü ãẽ̱xgacü i Rechíü̃ rü ñu̱xũchi Peca i Remaría nane i pemaxã nuexü̃. Erü ngẽmagü rü ñoma taxre i üxüchametü irücaixgüxü̃rüxü̃ nixĩgü, natürü paxa tá nixogü.
5 Rü ngẽma taxre rü nügümaxã nagu narüxĩnüe nax chixexü̃ cumaxã naxügüxü̃. Rü nügümaxã ñanagürügü:
6 ‘Ngĩxã Yudáanegu tachocu rü tanamuü̃exẽxẽ i duü̃xü̃gü, rü ngẽmaãcü yigüaxü̃́ tanayaxu i norü naane rü ñu̱xũchi tayamucuchi ya Tabeé nane nax Yudáarü naanearü ãẽ̱xgacü yixĩxü̃ca̱x’.
7 Natürü nüma ya Cori ya Tupana rü nüxü̃ nixu rü ngẽma nagu naxĩnüexü̃ rü tagutáma ngẽmaãcü ningu.
8 7:8-9 Rü Damácu nixĩ ya Chíriaanearü ĩane ya taxü̃ne, rü Rechíü̃ nixĩ i Damácuwa ãẽ̱xgacü ixĩxü̃. Rü Chamária nixĩ ya Efraíü̃tanüxü̃arü ĩane ya taxü̃ne, rü Remaría nane nixĩ i Chamáriawa ãẽ̱xgacü ixĩxü̃. Natürü ngẽxguma marü 65 ya taunecüwa nanguxgu rü ngẽma Efraíü̃tanüxü̃ rü tá inarüxo nax wüxi i nachixü̃ane nax yixĩxü̃. Rü ngẽxguma pema rü taxũtáma aixcüma choxü̃́ peyaxõgügu, rü pema rü tá ta iperüxo” —ñanagürü ya Tupana.
9 Nüü̃ nadau 7:8
Ichaía nüxü̃ nixu i Emanuéarü buxchiga
10 Rü Cori ya Tupana rü Acháxmaxã rü ta nidexa rü ñanagürü:
11 —¡Choxna naxca̱x naca nax dauxü̃wa rüe̱xna ñoma i naanewa chanaxüxü̃ i wüxi i mexü̃ i chorü poramaxã chaxüxü̃ nax ngẽmawa nüxü̃ cucuáxü̃ca̱x nax aixcüma yixĩxü̃ i ngẽma cumaxã nüxü̃ chixuxü̃! —ñanagürü.
12 Rü nüma ga Acháx rü Cori ya Tupanaxü̃ nangãxü̃ rü ñanagürü: —Taxucürüwa ngẽmaãcü chanaxü, erü choma rü taxũtáma Cori ya Tupanaxü̃ chaxü nax wüxi i cua̱xruxü̃ cha̱u̱xca̱x naxüxü̃ca̱x —ñanagürü.
13 Rü Ichaía rü ñanagürü: —Nüxü̃ pexĩnüe, Pa Dabítaagüx ¿Pemax, rü pexü̃́ nanataxuraxü̃ nax penachixewexü̃ i duü̃xü̃gü, rü ñuxãcü tá ta penachixewexü̃ ya chorü Tupana?
14 Rü nümatama ya Cori ya Tupana rü tá pexü̃ nüxü̃ nadauxẽxẽ i wüxi i cua̱xruxü̃. Rü ngẽma pacü i taguma yatüxü̃ cua̱xcü rü tá ngürü ixãxacü. Rü yimá ngĩne rü tá Emanuégu inaxüéga.*
15 7:15-16 Rü yimá ngĩne rü ngẽxguma õxchana yixĩxgu rü tá lechi ya pamüne rü beruremaxã naxãwemü. Natürü naxü̃pa nax nayaxü̃ rü mea naãẽxü̃ nacuáxü̃ ya yima bucü, rü ngẽma taxre i ãẽ̱xgacügü i Rechíü̃ rü Péca i nüxü̃ cumuü̃xü̃ rü tá inayarüxo i nachixü̃anegü.
16 Nüü̃ nadau 7:15
17 Rü Cori ya Tupana rü cuxca̱x rü cuchixü̃aneca̱x rü cutanüxü̃güca̱x tá ínananguxẽxẽ i taxü̃ i guxchaxü̃. Rü yema ngunexü̃ ga Efraíü̃tanüxü̃ rü Yudátanüxü̃na yaxĩgachiguwena rü taguma nüxü̃ tadau i wüxi i guxchaxü̃ i ngẽma guxchaxü̃rüxü̃ ãũcümaxü̃. Erü nua Yudáanewa Tupana tá ínananguxẽxẽ i Achíriaanearü ãẽ̱xgacü nax pexca̱x íyagoõchixü̃ca̱x —ñanagürü ga Ichaía.
18 Rü ngẽma ngunexü̃gu rü nüma ya Tupana rü tá ñoma murenügü i muxũchixü̃rüxü̃ tá cuxca̱x ínanangugüxẽxẽ i ngẽma churaragü i Equítuanearü natügü i yáxü̃guxü̃wa ne ĩxü̃. Rü ngẽxgumarüxü̃ tá ta cuxca̱x ínanangugüxẽxẽ i ngẽma Achíriaanecüã̱x i churaragü i ñoma beruretanü i muxũchixü̃rüxü̃ ixĩxü̃.
19 Rü guxü̃ma i ngẽma churaragü rü tá nügü ninu nagu i ngẽma doxonexü̃gü, rü nutaarü ãxmaxü̃gu, rü naanegü i tuxunecüã́xü̃gu, rü nachicagü i wocagü nawa axegüxü̃gu.
20 Rü ngẽma ngunexü̃gu rü nüma ya Cori ya Tupana rü tá Achíriaanearü ãẽ̱xgacüxü̃ namu nax Iraétanüxü̃ca̱x íyaxü̃ãchixü̃ca̱x. Rü taxtü i Eufrátearü tocutüwa tá ne naxĩ i ngẽma Achíriaanecüã̱x. Rü nümagü rü ñoma wüxi i nowayamaxã yadüpü̱xüeruxü̃ rü yadüxchinaguxü̃ rü yadüxü̃nexü̃rüxü̃ tá nixĩ naxca̱x i ngẽma Iraéanecüã̱xgü. Rü ngẽmaãcü tá ãne nüxü̃ ningexẽẽgü.
21 7:21-22 Rü ngẽma ngunexü̃gu rü yíxema tüxü̃́ ngẽxmaxe i wüxi i woca rü taxre i carnérugü rü tagutáma tüxü̃́ nataxu i lechi, rü lechi ya itaixü̃nemaxã taxãwemü. Rü guxãma ya yíxema duü̃xẽgü íyaxügüxe nawa i ngẽma dai rü tá lechi ya itaixü̃nemaxã rü beruremaxã taxãwemügü.
22 Nüü̃ nadau 7:21
23 Rü ngẽma ngunexü̃gu rü ngẽma naane ga noxri 1,000 i úba nawa rüxügüxü̃ rü 1,000 i diẽrugu ãtanüxü̃, rü tá tuxunecüxü̃ rü maxẽnecüxü̃ nananguxuchi.
24 Rü ngẽxguma texé nawa ũxgu rü würa rü chuxchimaxã tá ngéma taxũ nax naeü̃ ngẽxma tayarümáxü̃ca̱x, erü ngẽma nachixü̃ane rü tá tuxunecüxü̃ rü ĩchicüxü̃ nananguxuchi.
25 Rü yima ma̱xpǘnegü ga nũxcüma lampamaxã nagu itoegüne rü tá maxẽmaxã rü tuxunecümaxã narüxü, rü taxúetama nawa taxũ nax nagu tatoexü̃ca̱x. Rü wocachitaü̃waxica rü carnéruchitaxü̃waxica name.
Notas
^ 7:14 Rü ngẽma naéga i Emanué rü “Tupana tatanüwa nangẽxma”, ñaxü̃chiga nixĩ.
