Isaías 9:1-21
9 Rü nüma ya Tupana rü woo guxchaxü̃wa nayexmaxẽẽãgu ga Gariréaane ga noxri Chaburóü̃ane rü Netaríane ixĩxü̃, natürü nawena rü tá nanatachigaxẽxẽ. Rü ngẽma Gariréaane rü natü ya Yudáü̃arü tocutüwa tá inaxügü rü ñu̱xmata márwa nangu i duü̃xü̃gü i tama yaxõgüxü̃ íxãchiü̃güxü̃wa.
2 Rü ngẽma Gariréaanecüã̱x ga noxri ẽanexü̃wa yexmagüxü̃ rü nüxü̃ nadaugü ga wüxi ga taxü̃ ga omü ga nangóonexẽẽruxü̃. Rü yema omü rü poraãcü tüxü̃ nangóonetanüxẽxẽ ga guxema ẽanexü̃wa yexmagüxe.
3 Rü ñu̱xmax, Pa Cori Pa Tupanax, rü poraãcü taãxẽ toxca̱x ícunguxẽxẽ rü ngẽma taãxẽ rü aixcüma nataxüchi. Rü guxãma tataãẽgü i cupe̱xewa ñoma tonetüarü o tibuxgügurüxü̃ rü ñoma churaragü i norü uanügüarü ngẽmaxü̃gü nügümaxã itoyegurüxü̃.
4 Yerü yema Madiáü̃anearü ãẽ̱xgacüme̱xẽwa toxü̃ ícunguxü̃xẽẽgurüxü̃ rü cuma rü toxü̃ ícunguxü̃xẽxẽ nawa ga yema ngúxü̃ ga tingegüxü̃ rü toxü̃ yaxĩ̱xãchitanüãẽxẽẽxü̃ ga yexguma naxme̱xwa tayexmagügu ga yema ãẽ̱xgacü ga chixri tomaxã icuáxü̃.
5 Rü ngẽma botagü i churaragü nagu icuaixgüxü̃ rü ñu̱xũchi ngẽma naxchirugü i nagümaxã iducharaxü̃ rü üxüwa tá ínagugü, rü ngẽxma tá nixae rü inayarüxogü.
6 Erü tatanügu nabu i wüxi i õxchana. Rü nüma ya Tupana rü tüxna nanamu ya yimá nane. Rü yimána nixĩ i naxããxü̃ i pora nax tamaxã inacuáxü̃ca̱x. Rü ñaagü tá nixĩ i naégagü i namaxã naxugüãxü̃: “Mexẽchicü ya Ucu̱xẽruxü̃”, rü “Tupana ya Poraxüchicü”, rü “Tanatü ya Taguma Yucü, rü Tupana Nane ya Ngüxmüxẽẽruxü̃ ixĩcü”. Rü ngẽma tá nixĩ i naégagü.
7 Rü nüma rü tá ãẽ̱xgacü ya Dabíchicüxü ingucuchicü nixĩ. Rü ngẽma norü pora nax ãẽ̱xgacü yixĩxü̃ rü guxü̃ i nachixü̃anegüwa tá nangu. Rü ngẽma nügümaxã nax inangüxmüxẽẽãxü̃ i duü̃xü̃gü rü tagutáma inayarüxo. Rü ngẽma nax ãẽ̱xgacü yixĩxü̃ rü mea tá duü̃xü̃gümaxã inacua̱x, rü mexü̃gu tá narüxĩnü rü guxãarü mexü̃ca̱x tá nadau i guxü̃guma. Rü ngẽmaãcü tá nanaxü erü ngẽma nixĩ i norü ngúchaü̃ i nagu naxĩnüxü̃ ya yimá Cori ya Tupana ya Guxãétüwa Ngẽxmacü.
Cori ya Tupana rü Iraéanecüã̱xmaxã nanu
8 9:8-9 Rü nüma ya Cori ya Tupana rü Acóbu nataagü i Iraétanüxü̃ca̱x nayamu ga norü ore. Rü guxü̃ma i Efraíü̃tanüxü̃ i ĩane i Chamáriagu ãpatagüxü̃ rü nüxü̃ nicua̱xãchitanü. Natürü nümagü rü nügü ínatagüãcü rü nügü yacua̱xüü̃güãcü ñanagürügü:
9 Nüü̃ nadau 9:8
10 —Woo inagüxgu ya tórü ĩanearü poxeguxü̃ ya ladriyunaxca̱x, natürü nachicüxü tá tananucu ya nutagü. Rü woo yabüyegu ya yima omütagü i nai ya doxü̃nenaxca̱x, natürü nachicüxü tá tananucu ya omütagü ya ocayiwanaxca̱x —ñanagürügü.
11 Natürü nümatama ya Cori ya Tupana rü tá ngéma nanamu i ãũcümaxü̃chixü̃ i uanügü nax Iraétanüxü̃ca̱x íyaxüãchixü̃.
12 Rü éstewaama ne naxĩ i Chíriaanecüã̱xgü, rü oéstewaama ne naxĩ i Firitéutanüxü̃. Rü ñoma ta̱xacü i noxtacüma íga̱xaxü̃rüxü̃ tá Iraéanecüã̱xgüxü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraéanecüã̱xgümaxã inarüngü̃xmü. Rü yexeraãcü nayaxãxũnechigüama.
13 Natürü nüma i Iraétanüxü̃ rü tama yimá Tupana ya napoxcuecüca̱x nawoegu, rü tama naga naxĩnüechaü̃ ya yimá Tupana ya Guxãétüwa Ngẽxmacü ya poraxüchicü.
14 Rü ngẽmaca̱x ya Cori ya Tupana rü Iraétanüxü̃ca̱x tá taxü̃ i guxchaxü̃ ínanguxẽxẽ ñoma wüxi i naxü̃na ídaeréxü̃xü̃ rü ídaeeruxü̃rüxü̃. Rü ñoma wüxi ya tema rü wüxi i dexne rü wüxitama i ngunexü̃gu idaxüchigüxü̃rüxü̃ tá namaxã naxü.
15 Rü ngẽma naeru rü nachiga nixĩ i Iraéanearü ãẽ̱xgacügü rü norü ngü̃xẽẽruü̃gü. Rü ngẽma narexü̃ rü nachiga nixĩ i orearü uruü̃gü i doramaxã ngu̱xẽẽtaegüxü̃.
16 Rü ngẽma norü ãẽ̱xgacügü rü chixexü̃gu nanayixẽxẽ ga Iraétanüxü̃. Rü ngẽma duü̃xü̃gü i nawe rüxĩxü̃ rü düxwa inayarütauxe.
17 Rü nüma ya Cori ya Tupana rü ngẽmaca̱x tama namaxã nixauxãchi i ngextü̱xüxü̃gü, rü ñu̱xũchi tama nüxü̃́ tangechaü̃tümüxü̃ ya taxcutagü rü yutegüxe. Erü guxü̃ma i duü̃xü̃gü rü chixexü̃arü üruü̃gü nixĩgü rü naechitamare chixexü̃ i dexamaxã nidexagü. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngüxmü, rü yexeraãcü nayaxãxũnechigüama.
18 Rü ngẽma chixexü̃ rü nanachixexẽxẽ i duü̃xü̃gü ñoma üxüema i paxa tuxunecügu rü maxẽnecügu nangexẽẽxü̃rüxü̃. Rü ñu̱xũchi naixnecüwa nangexẽẽxü̃rüxü̃ rü naema rü ñoma buanecü ya íxãũxẽmacü ya ngurinarüxü̃ nixĩ i ngẽma chixexü̃.
19 9:19-20 Rü yimá Cori ya Tupana ya Guxãétüwa Ngẽxmacüarü nugagu nixĩ i yaxãxü̃ i Iraétanüxü̃arü naane, rü ngẽma üxüema nixĩ i yaguxü̃ ya ĩane. Rü duü̃xü̃gü rü taxũtáma nügüenexẽmaxã nügü nangechaü̃gü. Rü taiyamaxã tá nanaxĩ̱xãchiãẽgü. Rü yíxema norü tügünecüwagu ãchixü̃xẽ rü tá tümawemüca̱x nangĩ̱x rü noxtacüma nayaga, natürü tá nataiyaama. Rü ngẽma to rü tá yíxema norü to̱xwecüwagu ãchiü̃xẽ rü tá tüxna nanapu i tümaarü õna, natürü taxũtáma nüxü̃́ ningu. Rü duü̃xü̃gü rü düxwa tá naxacügümaxã nixãwemü.
20 Nüü̃ nadau 9:19
21 Rü Efraíü̃tanüxü̃ rü Manachétanüxü̃maxã tá nügü nadai. Rü ngẽmawena rü ngẽma taxre rü wüxigu tá Yudáaneca̱x ínayaxüãchi. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngü̃xmü, rü yexeraãcü nayaxãxũnechigüama.
