Job 1:1-22
1 Rü Úxanegu naxãchiü̃ ga wüxi ga yatü ga Yoxgu ãégacü. Nüma rü meama namaxü̃ rü nataxuma ga chixexü̃ ga nachiga. Rü aixcüma Tupanaarü ngúchaü̃ naxü, rü nügüna nadau nax taxúemaxã chixexü̃ naxüxü̃.
2 1:2-3 Rü nüma ga Yox rü nüxü̃́ nayexma ga 7 ga nanegü rü tomaepü̱x ga naxacügü. Rü nüxü̃́ nayexma ta ga 7,000 ga carnérugü, rü 3,000 ga caméyugü, rü 500 chimüü̃ ga wocagü ga puracüruxü̃ ixĩgüxü̃, rü 500 ga búrugü ga ingexü̃. Rü yexgumarüxü̃ ta nüxü̃́ nayexma ga muxü̃ma ga norü puracütanüxü̃. Rü yemaacü ga nüma ga Yox rü wüxi ga yatü ga guxãarü yexera muarü yemaxü̃ã̱xü̃chicü nixĩ ga yema nachixü̃ane ga éstewaama yexmaxü̃wa.
3 Nüü̃ nadau 1:2
4 Rü gumá Yox nanegü rü wüxichigü napatawachigü nanaxügüxü̃ ga peta ga nawa nügüna naxugüüxü̃. Rü yexgumarüxü̃ ta guxü̃guma tüxna naxugüxü̃ ga guxema tomaepü̱x ga naeya̱xgü.
5 Rü yexguma marü nawena ga yema nanegüarü peta ga naxügüüxü̃, rü nüma ga Yox rü nanegüca̱x nangemaxü̃. Rü pa̱xmamaxü̃chima ínarüdaüxü̃ rü wüxichigü ga nanegüégagu rü naxacügüégagu Tupanaca̱x nayama̱x rü nayagu ga wüxi ga naxü̃na nax yemaacü Tupana nüxü̃́ nüxü̃ rüngü̃maxü̃ca̱x ga yema nanegüarü rü naxacügüarü chixexü̃gü. Rü yemaacü nanaxüüxü̃ ga Yox yerü nagu narüxĩnü rü nanegü rü naxacügü rü ngürüãchi marü Tupanape̱xewa guxchaxü̃ naxügüe ga norü ĩnüwa ga yexguma peta naxügüxü̃gu.
6 Rü wüxi ga ngunexü̃ ga yexguma Cori ya Tupanape̱xewa naxĩxgu ga norü orearü ngeruü̃gü ga daxũcüã̱x, rü nüma ga Chataná rü ta Cori ya Tupanape̱xewa nangu.
7 Rü nüma ga Cori ya Tupana rü Chatanána naca rü ñanagürü: —¿Ngextá ne cuxũ i cumax? —ñanagürü. Rü nüma ga Chataná rü Corixü̃ nangãxü̃ rü ñanagürü: —Nawa ne chaxũ nax nagu íchayaxüeguxü̃ i ngẽma naane —ñanagürü.
8 Rü yexguma ga nüma ga Cori rü ñanagürü nüxü̃: —¿Tama ẽ̱xna cunangugü ya yimá chorü duü̃ ya Yox? Erü nataxuma i ngẽma naanewa ya yimárüxü̃ aixcüma chauga ĩnücü rü mea cha̱u̱xca̱x maxü̃cü. Rü nataxuxü̃ma i chixexü̃ i nachiga rü mea nügüna nadau nax taxúemaxã chixexü̃ naxüxü̃ca̱x —ñanagürü.
9 Natürü nüma ga Chataná rü Corixü̃ nangãxü̃ rü ñanagürü: —Tama natüca̱xmamare cuga naxĩnü.
10 Erü cuma rü cunachu̱xu nax taxúema guxchaxü̃ namaxã üxü̃ca̱x i nümax rü guxcüma ya nanegü rü naxacüã̱xgü rü norü ngẽmaxü̃gü. Rü cuma rü nüxü̃ curüngü̃xẽxẽ i guxü̃ma i ta̱xacü inaxüxü̃wa, rü ngẽmaca̱x i nüma i ñu̱xma rü wüxi ya yatü ya guxãarü yexera muarü wocaã̱xü̃chicü nixĩ nawa i ngẽma naane.
11 ¡Rü dücax, nüxü̃ iyanaxoxẽxẽ i guxü̃ma i ngẽma nüxü̃́ ngẽxmaxü̃, rü ngẽxguma tá nüxü̃ cudau nax cupe̱xewatama cumaxã naguxchigaxü̃! —ñanagürü.
12 Rü nüma ga Cori ya Tupana rü Chatanáxü̃ nangãxü̃ rü ñanagürü: —Marü name. ¡Ẽcü naxü i ta̱xacü i cuma cunaxwa̱xexü̃ namaxã i guxü̃ma i norü ngẽmaxü̃gü ya yimá Yox! Natürü tama chanaxwa̱xe nax namaxãxü̃chi chixexü̃ cuxüxü̃ —ñanagürü. Rü yexguma ga nüma ga Chataná rü Cori ya Tupanana nixũgachi.
13 1:13-14 Rü wüxi ga ngunexü̃ ga yexguma nanegü rü naxacügü wüxi ga peta ga taxü̃ ínaxügüyane naenexẽ ga yacüpatawa, rü wüxi ga yatü Yoxpatawa nangu rü namaxã nüxü̃ nayarüxu ga ñaa ore: —Yexguma naanewa aimüaneruxü̃ i wocagümaxã ítapuracüeyane, rü ngẽma búrugü ga ingexü̃ rü torü ngaicamana nachibüe.
14 Nüü̃ nadau 1:13
15 Rü ngürüãchi ngéma nangugü i Chabéutanüxü̃, rü naxca̱x nangĩ̱xgü i ngẽma wocagü rü búrugü, rü taramaxã nanadai i chomücügü i puracütanüxü̃. Rü chaxicatama chiña nax cumaxã nüxü̃ chayarüxuxü̃ca̱x —ñanagürü.
16 Rü taũtama yagúegayane ga yema yatü rü to ga yatü yéma nangu rü ñanagürü: —Wüxi ya ãẽmacü yexma nangu rü wüxigu norü dauruü̃gümaxã nanadai i ngẽma carnérugü. Rü chaxicatama chiña nax cumaxã nüxü̃ chayarüxuxü̃ca̱x —ñanagürü.
17 Rü yema yatü rü ta taũtama yagúegayane rü yéma nangu ga norü tomaepü̱x ga yatü rü ñanagürü: —Tomaepü̱xtücumü i Cadéuanecüã̱xgü toxca̱x ínayaxüãchi rü naxca̱x nangĩ̱xgü i curü caméyugü rü taramaxã nanadai i chomücügü i puracütanüxü̃. Rü chaxicatama chiña nax cumaxã nüxü̃ chayarüxuxü̃ca̱x —ñanagürü.
18 1:18-19 Rü yema yatü rü ta taũtama yagúegayane rü yéma nangu ga to ga puracütanüxü̃ rü ñanagürü: —Yimá cunegü rü ngẽma cuxacügü rü cune ya yacüchiü̃wa taxü̃ i peta inaxügü. Rü ngürüãchi ngéma ínachianexü̃waama ne naxũ ya wüxi ya taxüchicü ya buanecü rü guxü̃cüwawa nagu nangu ya yima ĩ rü cunegüétügu rü cuxacügüétügu nangutaü̃. Rü guxü̃ma i cunegü rü cuxacüã̱xgü rü ngẽxma tayue. Rü chaxicatama chiña nax cumaxã nüxü̃ chayarüxuxü̃ca̱x —ñanagürü.
19 Nüü̃ nadau 1:18
20 Rü yexguma ga nüma ga Yox rü inachi rü norü ngechaü̃maxã nügüchirugu nagáugü rü nügü rü waixü̃müanegu nayangücuchi rü Tupanaxü̃ nicua̱xüxü̃.
21 Rü yexguma rü ñanagürü: —Ngexchiruxãcü chauéanüwa chabu nax ñoma i naanewa changóxü̃ca̱x. Rü ngẽxgumarüxü̃ tá ta taxuxü̃táma chinge i ngẽxguma chayu̱xgu. Rü nüma ya Cori ya Tupana choxna nanaxã i guxü̃ma, rü nümatama wena choxna nanayaxu. ¡Namecümaxüchi ya Cori ya Tupana! —ñanagürü.
22 Rü yemaacü ga Yox rü woo guxü̃ma ga yema guxchaxü̃gü nüxü̃ nax ngupetüxü̃ rü tama chixexü̃ naxü rü tama Tupanamaxã naguxchiga.
