Job 10:1-22
10 Rü marü düxwa chipa nax ñoma i naanewa chamaxü̃xü̃. Rü ngẽma ngúxü̃ i chingexü̃gagu rü taxũtáma chaugüna chachogü nax nüxna chaca̱a̱xü̃ nax tü̱xcüü̃ ngúxü̃ choxü̃ yangexẽẽxü̃.
2 ¡Pa Tupanax, rü taxṹ i cuyachoguãchixẽxẽxü̃! ¡Rü chomaxã nüxü̃ ixu ega ta̱xacürü chixexü̃ cupe̱xewa chaxüxgu!
3 ¿Rü cumatama nax choxü̃ cuxüxü̃, rü tü̱xcüü̃ ngẽmaãcü chomaxã quixĩ, rü chomaxã cuchixecüma? ¿Ẽ̱xna cuxü̃́ name nax ngúxü̃ choxü̃ quingexẽxẽxü̃ rü ñu̱xũchi namaxã cutaãxẽxü̃ i ngẽma chixexü̃gu maxẽxü̃arü ĩnügü?
4 ¿Ẽ̱xna ñoma yatügümare nüxü̃ daugüxü̃ãcüma nüxü̃ cudau i duü̃xü̃gü?
5 ¿Ẽ̱xna ngẽma curü maxü̃ rü ñoma wüxi i duü̃xü̃ i yuwa̱xexü̃arü maxü̃rüxü̃ nanuxmare?
6 10:6-7 ¿Rü tü̱xcüü̃ naxca̱x cudau i chorü guxchaxü̃gü, rü naxca̱x ícuca i chorü chixexü̃gü woo nüxü̃ cucua̱xgu nax taxuxü̃ma i chixexü̃ chaxüxü̃, rü taxúetama choxü̃ ípoxü̃xü̃ naxcha̱xwa i curü pora?
7 Nüü̃ nadau 10:6
8 Rü cumatama rü cuxme̱xmaxã choxü̃ cuxü. ¿Rü tü̱xcüü̃ i ñu̱xma i choxü̃ quimáxchaü̃xü̃?
9 ¡Rü nüxna nacua̱xãchi nax waixü̃müwa choxü̃ cuxüxü̃! ¿Ẽ̱xna wena waixü̃müte̱xexü̃ choxü̃ quixũxẽxẽchaü̃?
10 Rü cuma rü waixü̃müte̱xewa cunaxü ga chaxune, ñoma lechiwa quechu ixüxü̃rüxü̃.
11 Rü choxü̃ cuxümachi rü choxü̃ cuxüxcha̱xmüxü̃. Rü nügüna cuyaxũxgüxẽxẽ ga chauxchina̱xãgü rü chorü tarumagü.
12 Rü maxü̃ choxna cuxã rü choxü̃ cungechaxü̃. Rü ngẽma nax choxna cudauxü̃gagu nixĩ nax chamaxü̃xü̃.
13 Natürü i ñu̱xma rü nüxü̃ chacua̱x nax cuãẽwa nayexmaxü̃ ga wüxi ga ĩnü ga cuxicatama nüxü̃ cucuáxü̃.
14 Rü yema ĩnü nixĩ nax choxü̃ tá cupoxcuxü̃ ega chixexü̃ chaxüxgu, rü tama nüxü̃ cuxüpetümarexü̃ i chorü chixexü̃.
15 Rü ngẽxguma chi aixcüma chixexü̃ chaxüxgu rü marü icharütaxu. Rü woo ega taxuxü̃ma i chixexü̃ chaxüxgu rü taxucürüwa chataãxẽ, erü choxü̃ cuxãnexẽxẽ rü choxü̃ cunaxĩ̱xãchiãẽxẽxẽ.
16 Rü ngẽxguma chi cuxcha̱xwa chiñaxgu, rü cuma rü ñoma wüxi i leóü̃rüxü̃ chi chowe cunge. Rü icunawe̱x i curü pora nax ngẽmaãcü choxü̃ quimáxü̃ca̱x.
17 Rü taguma cuxü̃́ nataxu i ngẽma chauchigaxü̃ cumaxã ixugüxü̃. Rü ngẽma nax chomaxã cunuxü̃ rü nitachigü. Rü ñoma wüxi i churaratücumürüxü̃ tama ícuyachaxãchi nax cha̱u̱xca̱x ícuyagoõchixü̃.
18 ¿Rü tü̱xcüü̃ ga choxü̃ cungo̱xẽxẽxü̃? Rü narümemae chi nixĩ ga nax chayuxü̃ naxü̃pa nax texé choxü̃ dauxü̃.
19 Rü narümemae chi nixĩ nax taguma chamaxü̃xü̃ rü chauéanüwa noxtacüma naxmaxü̃wa chaxũxü̃.
20 10:20-22 Rü ñu̱xma nax nanuxũxü̃ i chorü maxü̃, rü ¡taxṹ i choxü̃ cunaxĩ̱xãchiãẽxẽxẽxü̃ nax ngẽmaãcü íxrarüwa chataãẽxü̃ca̱x naxü̃pa nax chayuxü̃, rü nawa chaxũxü̃ i ngẽma waanexü̃ i taxucürüwama nawa itaeguxü̃ rü guxü̃guma ẽanexü̃! —ñanagürü ga Yox.
21 Nüü̃ nadau 10:20
22 Nüü̃ nadau 10:20
