Job 11:1-20
11 Rü yexguma ga Chofá ga Naamáxanecüã̱x rü Yoxü̃ nangãxü̃ rü ñanagürü:
2 —Guxü̃ma i ngẽma curü dexagü i nüxü̃ quixuxü̃ rü tá chanangãxü̃. Rü tama ngẽma nax namaarü dexaã́xü̃ca̱x nixĩ i aixcüma yixĩxü̃ i wüxi i duü̃xü̃arü ore.
3 ¿Rü cuma nagu curüxĩnügu i ngẽma curü dexamaxã chi toxü̃ curüngea̱xgüxẽxẽ rü taxuechima cuxü̃ tangãxü̃gaxü̃ naxca̱x i ngẽma curü ore i namaxã toxü̃ cucugücüraxü̃xü̃?
4 Rü cuma nüxü̃ quixuxgu rü nawe̱xgu i ngẽma curü ĩnü, rü cugü ícurümearü maxü̃ã̱x i Tupanape̱xewa.
5 Chierüna Tupana idexagu nax cumaxã nüxü̃ yaxuxü̃ca̱x i ngẽma nüma cumaxã nagu naxĩnüxü̃.
6 Rü nüma ya Tupana rü chi cuxca̱x nanango̱xẽxẽ nax ta̱xacüwa yixĩxü̃ ga chixexü̃ cuxüxü̃, erü nüma rü aixcüma nüxü̃ nacua̱x i guxü̃ma i cuxüxü̃. Rü ngẽmaãcü i cuma rü tá nüxü̃ cucua̱x rü íxramarexü̃ i poxcu cuxna naxã rü tama ngẽma poxcu i curü chixexü̃ icuxüxü̃maxã wüxiguxü̃ãcü cuxü̃ napoxcu.
7 ¿Rü nüxü̃ cucuáxü̃ yixĩxü̃ i ngẽma Tupanaarü cua̱x i ẽxü̃guxü̃? ¿Rü cuxü̃́ natauxchaxü̃ nax nüxü̃ cucuáxü̃ i ngẽma nüxü̃ nacuáxü̃ ya Yimá Guxãétüwa Ngẽxmacü?
8 Rü ngẽma Tupanaarü cua̱x rü dauxü̃guxü̃ i naanexü̃ nangupetü nax nataxüchixü̃. Rü ngẽma norü cua̱x rü már arü mátamaxü̃arü yexerawa nangu. ¿Rü ñuxãcü tá nüxü̃ cucua̱x i ngẽma nagu naxĩnüxü̃?
9 Rü ngẽma norü cua̱x rü ñoma i naanearü yexerawa nangu rü ngẽma már arü yexerawa nixĩ i nanguxü̃.
10 Rü ngẽxguma chi Tupana nua ũxgu rü chi cuxü̃ napoxcugu rü cuxna nacagu i curü maxü̃chiga, ¿rü texé tá ítayachaxãchixẽxẽ?
11 Rü nüma ya Tupana rü aixcüma nüxü̃ nacua̱x nax texé tixĩxü̃ ya yíxema idorata̱xáxe. Rü nüma rü nüxü̃ nadau i ngẽma chixexü̃. ¿Ẽ̱xna cuma nagu curüxĩnügu rü tama nixĩ i nüxü̃ nacuáxü̃ i ngẽma cuxüxü̃?
12 Rü wüxi i duü̃xü̃ i tama naãẽxü̃ cuáxü̃ i Tupanaarü cua̱xwa nügü ngu̱xẽẽchaü̃xü̃ rü ñoma wüxi i dauxchitacüã̱x i búruacü i tama íyapuxü̃ i nügü duü̃xü̃wa ngu̱xẽẽchaü̃xü̃rüxü̃ nixĩ.
13 ¡Tupanana cugü naxã! ¡Rü nüxna naca nax cuxü̃ nangü̃xẽxẽxü̃ca̱x!
14 Rü ngẽxguma chixexü̃ cuxü̱xgu ¡rü nüxna ixũgachi! Erü tama name i wena curü maxü̃wa cunaxüchica i ngẽma chixexü̃.
15 Rü ngẽxgumarica tá nixĩ i cungearü chixexü̃ãcüma cudaunagüxü̃ rü taãẽãcüma Tupanamaxã quidexaxü̃ rü taxũtáma cumuü̃xü̃.
16 Rü ngẽxguma nüxü̃ quixuxgu i curü chixexü̃ rü tá nüxü̃ curüngü̃ma i ngẽma ngúxü̃ i quingexü̃. Rü ñoma dexá i ya̱xpetüxü̃rüxü̃ tá nangupetü i ngẽma curü guxchaxü̃gü i ñu̱xma cuxü̃́ ngẽxmagüxü̃.
17 Rü ngẽma curü maxü̃ rü tá yexera inabaxi üa̱xcü tocuchigu ibáxigurüxü̃. Rü ngẽma curü oragü i nagu ngúxü̃ quingexü̃ rü ñoma ngexwaca yangunexü̃rüxü̃ tá nixĩ.
18 Rü tá cutaãxẽ rü taxuca̱xma cumuü̃. Rü mea tá cupe erü Tupana tá cuxna nadau.
19 Rü taxuxü̃táma ta̱xacü cuxü̃ ínabaixgü ega ngẽxguma icurüngüxgu. Rü muxü̃ma i duü̃xü̃gü tá cuxü̃tawa nangugü nax ngü̃xẽxẽca̱x cuxna yacagüxü̃ca̱x.
20 Natürü ngẽma duü̃xü̃gü i chixexü̃gu maxẽxü̃ rü natüca̱xma tá ngü̃xẽxẽca̱x nadaugü. Rü taxuxü̃táma nüxü̃ nayangaugü i wüxi i nachica i nagu nangü̃güxü̃, rü yuxicatátama nixĩ i nagu nangü̃güxü̃ —ñanagürü ga Chofáx.
