Job 13:1-28
13 Rü nüma ga Yox rü ñanagürü: —Guxü̃ma i ngẽma nüxü̃ pixuxü̃ rü chauxetümaxã nüxü̃ chadau, rü chauchi̱xẽmaxã nüxü̃ chaxĩnü.
2 Rü ngẽma pema nüxü̃ pecuáxü̃ rü choma rü ta nüxü̃ chacua̱x. Rü taxuwama nixĩ i pexü̃ nax charüñaxtügumaexü̃ i chorü cua̱xwa.
3 Natürü narümemae chi nixĩ nax Tupanamaxãxü̃chi chidexaxü̃ nax namaxã togü tachoxü̃gagüxü̃ca̱x ya yimá Guxãétüwa Ngẽxmacü.
4 Pema rü perü doramaxã peyadüxü i ngẽma aixcüma ixĩxü̃. Rü pema rü dutúrugü i taxúexü̃ma üxü̃güxe pixĩgü.
5 Rü ngẽxguma chi iperüchianegügu i pemax rü chi duü̃xü̃gü i cua̱xwa ngugüxü̃ pixĩxgü.
6 ¡Ẽcü mea iperüxĩnüe i ngẽxguma nüxü̃ chixuxgu i ngẽma nagu charüxĩnüxü̃!
7 ¿Ẽ̱xna pema nagu perüxĩnüegu rü Tupanaxü̃ namaxã ípepoxü̃xü̃ i ngẽma perü doragü, rü ngẽmaãcü doramaxã nüxü̃́ pepuracüexü̃?
8 ¿Ẽ̱xna nagu perüxĩnuegu rü Tupanaaxü̃́ mexü̃ pexüxü̃ ega norü poxü̃ruü̃gü pixĩgügu?
9 Natürü ¿ta̱xacü chi nangupetü ega Tupana pexna caxgu? ¿Rü pema rü chi penawomüxẽẽxü̃ ya Tupana ñoma wüxi i duü̃xü̃xü̃ pewomüxẽẽxü̃rüxü̃?
10 Rü ngẽxguma chi doramaxã Tupanaxü̃ ípepoxü̃gügu, rü nüma rü tá poraãcü pexü̃ ningagü.
11 Rü nüma ya Tupana rü tá inanawe̱x i norü pora rü tá muü̃maxã pexü̃ nidu̱xruxgüxẽxẽ.
12 Rü ngẽma perü dexagü i taxuxü̃ma mexü̃ nawa ngẽxmagüxü̃, rü ñoma naxtaxpü̱xgü i waixü̃münaxca̱xrüü̃mare nixĩgü nax taxuwama namexü̃.
13 ¡Rü ñu̱xma rü perüchianegü erü choma rü tá chidexa! Rü nüetama nixĩ ega ngẽma chorü dexagagu ta̱xacü choxü̃ ngupetügu
14 Rü choma rü tá Tupanape̱xewa chaugü íchapoxü̃ rü ãũcümaxü̃wa tá chanangexmaxẽxẽ i chorü maxü̃, rü nüetama ega chorü dexagagu ta̱xacü choxü̃ ngupetügu.
15 Rü woo chi Tupana choxü̃ ima̱xgu, natürü tá nüxü̃́ chayaxõõma. Rü nape̱xewa tá chaugü íchapoxü̃ama.
16 Rü ngẽxguma nüxü̃ chixuxgu i chorü guxchaxü̃gü rü ngürüãchi ngẽmaãcü tá chaugü íchanguxuchixẽxẽ, erü wüxi i chixexü̃arü üruxü̃ rü taxũtáma naxü̃tawa nangu.
17 ¡Ẽcü mea iperüxĩnüe i ngẽma ñu̱xma tá pemaxã nüxü̃ chixuxü̃!
18 Rü ñu̱xma rü tá chaugü íchapoxü̃, erü nüxü̃ chacua̱x ya Tupana rü tá nüxü̃ nixu nax taxuxü̃ma i chixexü̃ chaxüxü̃.
19 Rü ngẽxguma chi texé tüxü̃́ ngẽxmagu nax ta̱xacüca̱x Tupanape̱xewa choxü̃ tixuxü̃, rü choma rü chi íchayarüchianemare rü ñu̱xmatáta chayumare.
20 Pa Tupanax, nangẽxma i taxre i ta̱xacü i chanaxwa̱xexü̃ nax choxna cunaxãxü̃, rü ñu̱xũchi taxũtáma cuxcha̱xwa chicu̱x.
21 Rü marütama nax ngúxü̃ choxü̃ quingexẽẽxü̃ rü ñu̱xũchi marütama nax choxü̃ cumuü̃xẽẽxü̃.
22 Rü name nax cuma choxna cucaxü̃ rü choma rü tá cuxü̃ changãxü̃, rüe̱xna ega cunaxwa̱xegu rü choma rü tá chaxíra cumaxã chidexa rü ñu̱xũchi i cumax rü tá choxü̃ cungãxü̃.
23 ¡Chomaxã nüxü̃ ixu! ¿Ta̱xacü nixĩ i chorü chixexü̃gü i cupe̱xewa chaxüxü̃? ¿Rü ta̱xacüwa nixĩ i tama cuga chaxĩnüxü̃?
24 ¿Ta̱xacüca̱x cha̱u̱xcha̱xwa cudauegu? ¿Rü tü̱xcüü̃ wüxi i curü uanürüxü̃ chomaxã quixĩ?
25 Choma rü cupe̱xewa rü wüxi i naixatü i buanecü ingexü̃rüü̃mare chixĩ ¿Rü ta̱xacüca̱x choxü̃ quimáxchaü̃? Choma rü ñoma maxẽ i marü ipaxü̃rüxü̃ chixĩ. ¿Rü ta̱xacüca̱x chowe quingechigü?
26 Rü taxü̃ i poxcu chomaxã cuxuegu. Rü choxna naxca̱x cuca ga yema chixexü̃gü ga yexguma changextü̱xügu chaxüxü̃.
27 Rü cadénagümaxã choxü̃ íquichotaparagü. Rü cunangugü i guxü̃ma i ngẽma chaxüxü̃, rü ñu̱xũchi ngextá íchaxũxü̃wa rü cunangugü ya guxü̃ne ya chauchitügü.
28 Rü choma rü chigúchigü ñoma wüxi i ta̱xacü i ngauxü̃rüxü̃, rü ñoma wüxi i naxchiru i nawe ngṍxü̃rüxü̃.
