Job 14:1-22
14 Rü ngẽma yatü i ngexewa íxraxü̃ rü nanuxũ i norü maxü̃, rü muxü̃ i guxchaxü̃gü nüxü̃́ nangẽxma.
2 Rü ñoma wüxi i putürachacu i boxüxü̃ rü paxãma rüñẽ̱xẽxü̃rüxü̃ nixĩ. Rü ñoma wüxi i naxchipeta i paxãma ngupetüxü̃ rü iyarütaxuxü̃rüxü̃ nixĩ i duü̃xü̃arü maxü̃.
3 ¿Rü ñu̱xma rü tü̱xcüü̃ nixĩ i chixri choxü̃ cudawenüxü̃? ¿Rü tü̱xcüü̃ nixĩ i cugüpe̱xewa cha̱u̱xca̱x cungemaxü̃ nax choxna cucaxü̃ca̱x?
4 Rü taxúema tümamaxã nanguxü̃ nax wüxi i chixexü̃wa tanayaxuxü̃ i ta̱xacü i mexü̃.
5 Rü cuma nixĩ i nüxü̃ cucuáxü̃ nax ñuxre i ngunexü̃ tá namaxü̃xü̃ i wüxi i duü̃xü̃. Rü cuma nixĩ i nagu cuxunetaxü̃ i ngẽma ngunexü̃ i nagu tá nayuxü̃. Rü ngẽma ngunexü̃ rü taxũtáma nangupetü nax nayuxü̃.
6 Rü ngẽmaca̱x chanaxwa̱xe i ícuyachaxãchi nax choxü̃ cungugüechaxü̃ nax ngẽmaãcü taãẽwa changexmaxü̃ca̱x. ¡Rü taxṹ i choxna cunachu̱xuxü̃ nax ñoma wüxi i puracütanüxü̃rüxü̃ chataãẽxü̃ca̱x ñu̱xmatáta nagú i chorü ngunexü̃gü!
7 Rü ngẽxguma yadaxüchigu i wüxi i nai rü ngéma nayaxü i nachine i yixcüra tá rüxüxü̃. Rü ngẽxguma naxüxgu rü taxũtáma narüxoxochi nax namaxü̃xü̃. Nüxü̃́ nangẽxmaama i norü maxü̃ erü wena tá narüxüchine rü tagutáma nixĩ nax tautáma wena naxüamaxü̃.
8 14:8-9 Rü ngẽxguma woo marü waixü̃müanegu nanga̱u̱xgu i ngẽma nachime, natürü ngẽma naxchúma̱xã i yaxü̃ ega dexá nawa nguxgu rü tá narüxüama, rü ñoma wüxi i nai i ngexwaca rüxüxü̃rüxü̃ tá narüxügüchacüxü.
9 Nüü̃ nadau 14:8
10 Natürü ngẽxguma nayu̱xgu i wüxi i duü̃xü̃ rü ngẽxma nayagu i norü pora rü ngẽxma nayacua̱x i norü maxü̃.
11 14:11-12 Rü ñoma natügü rü nataagü i iyachegüxü̃rüxü̃ nixĩ i torü maxü̃. Rü ngẽxguma nayu̱xgu i wüxi i duü̃xü̃ rü ínaca. Rü ngẽma duü̃xü̃ rü ñu̱xma nax nangẽxmaxü̃ i dauxü̃guxü̃ i naane rü tagutáma naxmaxü̃wa ínarüda i norü pewa.
12 Nüü̃ nadau 14:11
13 Rü chierüx yuexü̃ íngexmagüxü̃gu choxü̃ quicu̱xgu ñu̱xmata cuxü̃ nangupetü i ngẽma curü nu. Rü ñu̱xũchi ngẽmawena chanaxwa̱xe i nüxü̃ cuxuneta i ngunexü̃ i nagu tá choxna cucua̱xãchixü̃.
14 Rü ngẽxguma nayu̱xgu i wüxi i yatü ¿rü ñuxãcü tá wena namaxü̃xü̃? Choma rü guxü̃ i ngunexü̃gu íchayanguxẽxẽ nax chorü puracüwa icharüngü̃xü̃ rü nawa íchanguxuchixü̃ i ngẽma ngúxü̃ i chingexü̃.
15 Cuma rü choxna chi cuca, rü ñu̱xũchi choma rü cuxü̃ chi changãxü̃ rü taãẽãcüma chi choxna cudau erü cuma nixĩ ga choxü̃ cuxüxü̃.
16 Rü ñu̱xma nax cunangugüxü̃ i wüxichigü i ngẽma chaxüxü̃ rü tama nüxü̃ cudawenü i chorü chixexü̃gü.
17 Rü ngẽxguma chi nüxü̃ curüngü̃magu i chorü chixexü̃gü, rü ñu̱xũchi choxü̃́ icuyanaxoxẽxẽ ga yema chixexü̃gü ga chaxüxü̃.
18 Rü yima ma̱xpǘnegü rü nagu̱x i ngẽxguma nabuxgu. Rü yimá nutapütagü rü to i nachicawa nadixgü.
19 Rü ñoma dexá i nuta imu̱xgüpütaxü̃rüxü̃, rü ñu̱xũchi ñoma pucü i waixü̃müte̱xe ingexü̃rüxü̃ nixĩ nax cuma icuyanaxoxẽẽxü̃ i ngẽma duü̃xü̃gü ínangu̱xẽẽxü̃.
20 Rü wüxicana icuyanaxoxẽxẽ rü cunayaxu i norü maxü̃ nax yanaxoxü̃ca̱x. Rü ngẽmaãcü naxmaxü̃wa ícunamuxũchi.
21 Rü ngẽxguma duü̃xü̃gü nanegüxü̃ tachigaxẽẽgügu rü nüma rü tama nüxü̃ nacua̱x i ngẽma. Rü ngẽxguma chixexü̃gu nayixgu i nanegü rü nüma rü tama nüxü̃ nacua̱x.
22 Rü ngẽma ngúxü̃ i naxü̃newa yangexü̃ rü ñu̱xũchi ngẽma ngúxü̃ i norü maxü̃newa yangexü̃xica tá nixĩ i nüxü̃ nacuáxü̃ —ñanagürü ga Yox.
