Job 15:1-35
15 Rü yexguma ga Erifá rü nanangãxü̃ga rü ñanagürü:
2 —Wüxi i yatü i cua̱x nüxü̃́ ngẽxmaxü̃ rü tama dexa i taxuwama mexü̃maxã nanangãxü̃. Rü ngẽma curü ore i cugü namaxã ícupoxü̃xü̃ rü ñoma buanecürüü̃mare nixĩ.
3 Rü wüxi ya yatü ya aixcüma nüxü̃ cuácü rü tama naechita nidexamare, rü tama nügü ínapoxü̃ namaxã i ore i natüca̱xmamare ixĩxü̃.
4 Natürü i cuma rü tama Tupanaxü̃ cumuü̃. Rü tama aixcüma nüxü̃ cungechaxü̃.
5 Rü ngẽma curü ĩnü i chixexü̃ nixĩ i ngẽmaãcü cuxü̃ idexaxẽẽxü̃ rü nüxü̃ quixuxü̃ i dexagü i tama aixcüma ixĩgüxü̃.
6 Rü tama choma nixĩ i cuxü̃ chixuxü̃, natürü ngẽma curü dexagüwa nixĩ i cugütama quixuxü̃.
7 ¿Ẽ̱xna cuma nagu curüxĩnügu rü cuxíra nixĩ ga cungóxü̃? ¿Rü cuxca̱x rü cuxíra nixĩ i cungóxü̃ naxü̃pa ga ma̱xpǘnegü?
8 ¿Ẽ̱xna nagu curüxĩnügu nax Tupanaarü ucu̱xẽruxü̃ quixĩxü̃, rüe̱xna cugüca̱x rü cuxicatama nixĩ i wüxi i yatü i nüxü̃ cuáxü̃ quixĩxü̃ i ñoma i naanewa?
9 ¿Rü ta̱xacü nixĩ i nüxü̃ cucuáxü̃ rü toma tama nüxü̃ tacuáxü̃? ¿Rü ta̱xacü nixĩ i nüxü̃ cucuáxü̃ i tama torü cua̱xwa ngẽxmaxü̃?
10 Tomagü rü duü̃xü̃gü i marü yaexe tixĩgü rü cunatüarü yexera cua̱x toxü̃́ nangẽxma.
11 ¿Rü tama ẽ̱xna cuxü̃́ ningu i ngẽma ucu̱xẽ ya Tupana namaxã cuxü̃ taãẽxẽẽxü̃ rü ngẽma ucu̱xẽ i toma ngechaü̃ãcüma cumaxã nüxü̃ tixuxü̃?
12 ¿Rü tü̱xcüü̃ i ngẽma ngúxü̃ i quingexü̃ cuxü̃ narüporamae rü ngẽmaca̱x cunuxetü?
13 ¿Rü tü̱xcüü̃ Tupanamaxã cunu rü ngẽmaca̱x tama cuxãne nax nape̱xewa naxca̱x quidexaxü̃ i ngẽma cuxca̱x ínguxü̃?
14 Rü nataxuma i yatü i aixcüma mea maxü̃xü̃ rü bai i nangẽxmaxü̃ i yatü i ngearü chixexü̃ã́xü̃.
15 15:15-16 Rü nüma ya Cori ya Tupana rü tama nüxü̃́ nayaxõ i woo ngẽma norü orearü ngeruü̃gü i daxũcüã̱xgü erü woo nümagü rü ta ñuxguacü rü ínatüe. Rü bai i ngẽma dauxü̃guxü̃ i naane rü aixcüma nape̱xewa namexü̃, rü yexera taxũtáma nüxü̃́ nayaxõ i ngẽma yatü i chixexü̃gu maxü̃xü̃ rü chixexü̃gu rüxĩnüxü̃ ñoma ita̱xawa̱xgu rü dexágu rüxĩnüxü̃rüxü̃.
16 Nüü̃ nadau 15:15
17 ¡Ẽcü choxü̃ irüxĩnü! Erü tá cumaxã nüxü̃ chixu i ngẽma marü choxü̃ ngupetüxü̃wa nüxü̃ chacuáxü̃.
18 Rü ngẽma cua̱x i cumaxã tá nüxü̃ chixuxü̃ rü ngẽma nixĩ i cua̱x i ngẽma duü̃xü̃gü i nüxü̃ icuáxü̃ tüxü̃ ngu̱xẽẽgüxü̃. Nümagü rü norü o̱xigüwa nixĩ ga nangúexü̃ i guxü̃ma i ngẽma cua̱x.
19 Rü nümagü ga norü o̱xigü rü nüxicatama nixĩ ga nayauxgüãxü̃ ga ñoma ga naane, naxü̃pa nax togü ga duü̃xü̃gü ga tóxnamana ne ĩxü̃ nawa maxẽxü̃.
20 Rü ngẽma duü̃xü̃ i chixexü̃ rü nuwa̱xexü̃, rü norü maxü̃ rü nanuxũ rü guxü̃guma nachixeãẽechamare.
21 Rü nüxü̃ naxĩnü i nagagü i inaba̱i̱xgüxü̃. Rü ngẽxguma nagu naxĩnügu nax taxuxü̃ma i ãũcümaxü̃ nüxü̃́ ngẽxmaxü̃ rü ngĩ́ta̱xagüxü̃ naxca̱x ínayaxüãchi.
22 Rü ngẽma duü̃xü̃ i chixexü̃ üxü̃ rü taxucürüwa norü yucha̱xwa niña erü wüxi i taramaxã tá nayama̱xgü.
23 Rü ngẽma naxü̃ne rü ngurucugüwemü tá nixĩ. Rü nüma rü nüxü̃ nacua̱x nax taxucürüwa iyanaxoxü̃ nax nayuxü̃.
24 Rü ngẽma guxchaxü̃gü rü ngúxü̃gü tá nanaxĩ̱xãchiãẽxẽxẽ ñoma wüxi i ãẽ̱xgacü daica̱x naxca̱x íyagoõchigurüxü̃.
25 Rü ngẽma nixĩ i nüxü̃ ngupetüxü̃ i ngẽma duü̃xü̃ i Tupanamaxã nuxü̃ rü namaxã nügü choxü̃gagüxü̃ ya Yimá Guxãétüwa Ngẽxmacü.
26 Rü ngẽma duü̃xü̃ rü norü numaxã rü norü poxü̃ruü̃maxã Tupanaca̱x niña nax namaxã nügü nada̱i̱xü̃ca̱x.
27 15:27-28 Rü norü ngümaxã nipu̱xchametü rü natapütüwe, natürü yima ĩanegü ya nawa namaxü̃newa rü tá nachianemare erü naxĩgü i duü̃xü̃gü rü marü taxuwatáma name,
28 Nüü̃ nadau 15:27
29 Rü taxũtáma muxü̃ i ngunexü̃ natai i norü diẽru rü norü ngẽmaxü̃gü. Rü ngẽxma tá nüxü̃́ inarüxo nax nadiẽruã́xü̃, rü bai tá yamuxẽxẽãxü̃ i norü ngẽmaxü̃gü i ñoma i naanewa.
30 Rü taxũtáma norü yucha̱xwa niña. Rü ñoma wüxi i nai i ngexwaca rüxüchacüüxü̃ rü üxüwa iguxü̃rüxü̃ tá nixĩ nax nayuxü̃. Rü ñoma putürachacugü i buanecü rüyixẽẽxü̃rüxü̃ tá nixĩ.
31 Rü yíxema chixexü̃ üxe rü tama name i ngẽma tümaarü ngẽmaxü̃gü i natüca̱xmamare ixĩgüxü̃axü̃́ tayaxõ, erü ngẽma tümaarü ngẽmaxü̃gü rü tá tüxü̃ nawomüxẽxẽ rü ngẽmagagu chixexü̃wa taxũ.
32 Rü ngẽma chixexü̃ üxü̃ rü paxatáma nayu. Rü ñoma wüxi i nai i yuchacüüxü̃ rü tama wena maxü̃xü̃rüxü̃ tá nixĩ.
33 Rü ñoma nanetü i úba i tama idauarü oṍxü̃rüxü̃ tá nixĩ. Rü ñoma wüxi i oribu i dexü̃chacuxü̃rüxü̃ tá nixĩ.
34 Rü ngẽma chixexü̃ i duü̃xü̃gü rü tá inayarüxogü. Rü yima napatagü ya womüxẽẽgu nüxü̃́ ngẽxmane rü tá nixae.
35 Rü nümagü rü guxchaxü̃ nax naxügüxü̃ca̱x nadaugü, rü ngẽmaãcü chixexü̃ naxügü rü nawomüxẽẽtaegü —ñanagürü ga Erifá.
