Job 16:1-22
16 16:1-2 Rü yexguma ga Yox rü nanangãxü̃ rü ñanagürü: —Marü muẽ̱xpü̱xcüna nüxü̃ chaxĩnü i ngẽmatama i dexa. Pema rü tama taãxẽ choxna pexã, rü yexeraãcü ngúxü̃ choxü̃ pingexẽẽgü.
2 Nüü̃ nadau 16:1
3 Rü ngẽma perü dexagü i taxuwama mexü̃ rü ipeyadaxẽẽmare. ¿Rü ñuxguxüratáta nüxü̃ perüxoexü̃ nax chixri chauchiga pidexagüechaxü̃?
4 Rü ngẽxguma chi pexü̃ nangupetügu i ngẽma ñu̱xma choxü̃ ngupetüxü̃, rü choma rü chi pema pidexagüxü̃rüxü̃ chidexa rü pexü̃ chacugüãcüma chanexáeru rü muxũchixü̃ma i oremaxã chidexa.
5 Natürü i choma rü chi pemaxã nüxü̃ chixu i ore i namaxã pexü̃ chataãẽxẽẽxü̃ nax ngẽmaãcü pora pexna chaxãxü̃ca̱x.
6 Natürü ngẽma nax chidexaxü̃ rü tama choxü̃́ nanangupetüxẽxẽ i ngẽma ngúxü̃ i chingexü̃. Rü woo chi charüngea̱xgu rü tama choxü̃́ nanangupetüxẽxẽ nax choxü̃́ nangúxü̃.
7 Rü Cori ya Tupana rü choxna nanayaxu i guxü̃ma i chorü pora, rü choxü̃́ nanadai i guxü̃ma i chauxacügü.
8 Rü ñu̱xma rü ñoma chapoxcuxü̃rüxü̃ choxü̃ nixĩxẽxẽ. Rü chixexü̃ chauchigaxü̃ nixu. Rü wüxi i doramare ixĩxü̃ i oremaxã choxü̃ nixuchiga.
9 Rü Cori ya Tupana rü ñoma wüxi i naeü̃ i düraxü̃ i chowe íñaü̃xü̃ rü chaugu wagüxü̃rüxü̃ nixĩ i chomaxã. Rü nüma rü ñoma chorü uanü yixĩxü̃rüxü̃ choxü̃ nadawenü.
10 Rü duü̃xü̃gü rü chauxü̃tawa naxĩ nax choxü̃ nacugüexü̃ca̱x rü choxna nawüa̱xgüxü̃ca̱x. Rü choxü̃ napegüchiwegüxü̃ca̱x nax ngẽmaãcü choxü̃ naxãnexẽẽgüxü̃ca̱x.
11 Rü nüma ya Tupana rü duü̃xü̃gü i chixexü̃ ügüxü̃ i máetagüxü̃me̱xẽgu choxü̃ nanguxẽxẽ.
12 Rü yexguma taãẽwa chayexmagu rü nüma ga Tupana rü chaunaxãgu choxü̃ niyaxu. Rü choxü̃ nanu̱xnaxã rü íxraxü̃gu choxü̃ nadaü̃gü. Rü ñu̱xũchi norü chuxchi nagu namaxü̃xü̃ruxü̃ choxü̃ nixĩxẽxẽ.
13 Rü guxü̃cüwawa chuxchi cha̱u̱xca̱x ne nacu̱x. Rü tama nüxü̃́ changechaü̃tümüxü̃ rü chuxchimaxã choxü̃ nimupetüxü̃ne. Rü chauü̃nüta rü waixü̃müanegu nawoonemare.
14 Rü ñoma wüxi i churara i daiwa ũxü̃rüxü̃ cha̱u̱xca̱x niña nax muxü̃wama choxü̃ napi̱xẽẽxü̃ca̱x.
15 Choma rü chorü ngechaü̃maxã naxchiru i témüxü̃gu chicu̱x, rü waixü̃müte̱xegu chaugü chicu̱xchametü.
16 Rü axumaxã charüchachiwe rü chadáuxetü.
17 Rü ngẽmaãcü choxü̃ nangupetü woo taguma ñuxgu texémaxã chanuxgu rü woo guxü̃guma namexgu i chorü yumüxẽ.
18 Rü ñaa guxchaxü̃gü i cha̱u̱xca̱x íngugüxü̃gagu, rü chanaxwa̱xe nax texé choxü̃ ípoxü̃xü̃. Rü ngẽma naxca̱x íchaca̱xaxü̃ nixĩ nax naxü̃pa nax chayuxü̃ rü aixcüma nangóxü̃ nax tama bexma pecadu chaxüxü̃gagu yixĩxü̃ i ngúxü̃ chingexü̃.
19 16:19-20 Rü bexmana tayíxema i daxũguxü̃ i naanewa ya chauétüwa idexaxe rü Tupanape̱xewa nüxü̃ ixuxe i ngẽma nagu charüxĩnüxü̃ nax ngẽmaãcü nüma ya Tupana rü nüxü̃ nadauxü̃ca̱x i ngẽma chauxgüxü̃etü nax ngẽmaãcü nüxü̃́ changechaü̃tümüxü̃xü̃ca̱x.
20 Nüü̃ nadau 16:19
21 Rü chierüx tayíxemagu ya Tupanape̱xewa chauétüwa chogüxe ñoma wüxi ya ãẽ̱xgacüpe̱xewa tümamücüétüwa tachogüxü̃rüxü̃.
22 Rü yimá noxre ya taunecü ya choxü̃́ íyaxücü nax chamaxü̃xü̃ rü marü nigúetanü. Rü paxa tá ichaxũãchi nax to i nachicawa chaxũxü̃ rü ngéma tagutáma chataegu —ñanagürü ga Yox.
