Job 17:1-16
17 Rü nüma ga Yox rü ñanagürü ta: —Marü nataxuma i chorü pora rü marü ningaica nax chayuxü̃. Rü choxmaxü̃ i nagu tá chatáxü̃ rü marü ínamemare.
2 Rü ñaa duü̃xü̃gü i chauxü̃tawa ngẽxmagüxü̃ rü nua choxü̃ yacugüemarexü̃ nixĩgü. Rü tama choxü̃ nangechaü̃ãcüma ngúxü̃ choxü̃ ningexẽẽgü. Rü ngunecü rü chütacü rü nüxü̃ chadau nax ñuxãcü choxü̃ nachixewegüechaxü̃.
3 Natürü cumax, Pa Corix, cuxü̃́ natauxcha nax chauétüwa quidexaxü̃. ¿Texé chi chauétüwa chogüxe, ega tama cuma yixĩxgu?
4 Rü cuma nixĩ i ícuyatoxẽẽxü̃ i norü ĩnügü i ñaa chomücügü. ¡Rü taxṹ i nüxü̃́ cunatauxchaxẽxẽgüxü̃ nax choxü̃́ nayexeramaegüxü̃ca̱x!
5 Rü ngẽma duü̃xü̃gü i diẽruca̱x namücügüxü̃ íxuaxü̃güxü̃ rü tá nüxü̃ nadau nax nayuexü̃ i naxacügü.
6 Rü cuma nixĩ, Pa Corix, i nüxü̃́ cunatauxchaxẽẽxü̃ i guxü̃ma i duü̃xü̃gü nax chauchiga chixri yadexagüxü̃ rü chauchiwewa nacua̱i̱xgüxü̃.
7 Rü ñaa ngúxü̃ i chingexü̃maxã rü chixogüxetü. Rü chauxune rü naxchina̱xãmare nixĩ.
8 Rü ngẽxguma choxü̃ nadaugügu i ngẽma duü̃xü̃gü i mexü̃gu rüxĩnüexü̃ rü chomaxã naba̱i̱xãchie. Rü nanue i duü̃xü̃gü rü chixexü̃arü üruü̃ãcü choxü̃ nadaugü.
9 Natürü yíxema duẽxẽgü i aixcüma mexü̃ ixĩgüxe rü we̱xgu taxĩama. Rü yíxema ngearü chixexü̃ãxẽ rü tiporaetanü.
10 Natürü nua pexĩ i guxãma i pemax. Rü petanüwa taxũtáma nüxü̃ ichayangau i bai i wüxi i aixcüma naãẽxü̃ cuáxü̃.
11 Rü ngẽma ngunexü̃gü i nagu chamaxü̃xü̃ rü nigúetanü, rü guxü̃ma i ngẽma chaxüxchaü̃xü̃ rü nagu charüxĩnüxü̃ rü ngẽxma narüxogümare.
12 Rü pema nagu perüxĩnüe nax ngẽma chütaxü̃ rü ngunexü̃ yixĩxü̃. Rü woo naxẽanegu, rü nüxü̃ pixu nax marü yangóonexü̃.
13 Rü yuxicatama nixĩ i ngẽma íchananguxẽẽxü̃ nax ngẽma ẽanexü̃gu charüngü̃xü̃ca̱x.
14 Rü ngéma choxmaxü̃wa rü ngẽma õ̱xmigü tá nixĩ i chaunatü rü chaué rü chauenexẽgü.
15 ¿Rü ngextá tá nixĩ i nüxü̃ ichayangauxü̃ i wüxi i chorü ngu̱xẽxẽ? ¿Rü texé tá naxca̱x tadau i wüxi i mexü̃ i cha̱u̱xca̱x ixĩxü̃?
16 Rü ngẽma ngu̱xẽxẽ rü wüxigu tá chomaxã nayu, rü wüxigu tá chomaxã waixü̃müte̱xewa naxũ —ñanagürü ga Yox.
