Job 18:1-21
18 18:1-2 Rü yexguma ga Biridá rü Yoxü̃ nangax rü ñanagürü: —¿Ñuxguratáta nüxü̃ curüchauxü̃ nax ngẽmaãcü quidexaxü̃? Rü ngẽxguma chi nagu curüxĩnügu nax nawe̱xguxü̃ i ngẽma curü ore i nüxü̃ quixuxü̃, rü ngĩxã yigümaxã tidexagü.
2 Nüü̃ nadau 18:1
3 ¿Tü̱xcüü̃ ñoma naeü̃güxü̃ idauxü̃acü toxü̃ quixĩxẽxẽ, rü ñu̱xũchi ñoma i duü̃xü̃gü i taxuxü̃ma icuáxü̃ãcü toxü̃ cudau?
4 ¿Ẽ̱xna nagu curüxĩnügu rü curü nugagu rü tá nangeãcu i ñoma i naane rüe̱xna yimá nutagü rü tá nachicawa nixĩgachi?
5 Rü ngẽma chixexü̃gu maxü̃xü̃ i duü̃xü̃ rü ñoma wüxi i omü i oxü̃rüxü̃ tá nixo i norü maxü̃. Rü ngẽmawena rü tagutáma wena namaxü̃ i ñoma i naanewa.
6 Rü norü maxü̃ rü tá nagu̱xmare, rü napatawa rü tá naxẽanemare erü nüma rü marü tama ngéma nangẽxma.
7 Rü ngẽma norü pora rü tá niturachigü. Rü ngẽma chixexü̃ i nagu naxĩnüxü̃, rü nümatátama nagu nangu.
8 Rü nape̱xegu tá nanaxǘgü i wüxi i yüta, rü ngẽma yütagu tá nangu.
9 Rü wüxi i bocuparaxü̃ tá nape̱xegu naxügü rü ngẽma naxme̱xtüü̃wa tá nawẽxãchi. Rü tagutáma ngéma ínanguxuchi.
10 Rü ngẽma chixexü̃gu maxü̃xü̃ i duü̃xü̃ rü norü namagu nanaxǘgü i wüxi i bocuparaxü̃ i tama ngóxü̃ nax ngẽxguma ngéma naxüpetügu rü ngẽmagu yayauxgüãxü̃ca̱x.
11 Rü guxü̃wama rü muü̃ãcü nixũ. Rü ngextá ínaxũxü̃wa rü nagu narüxĩnü nax nawe yangexü̃tanüxü̃ i duü̃xü̃gü.
12 Rü ngẽma norü pora rü taiyamaxã nigúchigü. Rü ngẽma guxchaxü̃gü rü marü nüxü̃ ningaica nax nagu nanguxü̃.
13 Rü ngẽma da̱xaweane rü nanangõ̱x i naxme̱xgü rü nacutügü rü naxü̃ne, rü ngẽmaãcü düxwa yuwa nanaga.
14 Rü nataxuma i taãxẽ i napatawa, erü ngẽma da̱xaweane rü yuwa nanatúchigügü.
15 Rü napata rü tá nixa, rü norü ngẽmaxü̃gü rü achúfre i ya̱u̱xraxü̃maxã tá namaxcutanü.
16 Rü ngẽma duü̃xü̃ rü ñoma wüxi i nai i pagüchuma̱xãxü̃ rü igüátüxü̃rüxü̃ nixĩ.
17 Rü nachiga rü tá inayarüxo i ñoma i naanewa, rü tagutáma ñuxgu texé nüxna tacua̱xãchi i naéga.
18 Rü ngóonexü̃wa rü tá ínanata̱xüchigü, rü waanexü̃gu tá nanata̱xcuchigü. Rü ñoma i naanewa rü tá ínanata̱xüchigü.
19 Rü norü ĩanewa rü taxuxü̃táma i nataagü ínayaxügü, rü taxuxü̃táma i napatacüã̱x namaxẽ.
20 Rü ngẽma duü̃xü̃gü i éstewa ngẽxmagüxü̃ rü ngẽma oéstewa ngẽxmagüxü̃ rü ngẽxguma nüxü̃ nacuáchigagügu i ngẽma ngupetüxü̃ namaxã i ngẽma chixexü̃ i duü̃xü̃ rü tá naba̱i̱xãchie rü namuü̃e.
21 Rü ngẽmaãcü ngẽxma nayagu̱x i norü maxü̃ i ngẽma duü̃xü̃ i chixexü̃gu maxü̃xü̃ i tama Tupanaxü̃ cuáxchaü̃xü̃ —ñanagürü ga Biridá.
