Job 19:1-29
19 19:1-2 Rü nüma ga Yox rü Biridáxü̃ nangãxü̃, rü ñanagürü: —¿Ñuxguratáta i nüxü̃ perüchauxü̃ nax choxü̃ penaxĩ̱xãchiãẽxẽẽxü̃ rü ngúxü̃ choxü̃ pingexẽxẽxü̃ namaxã i perü dexa?
2 Nüü̃ nadau 19:1
3 Rü guxü̃guma chomaxã peguxchigagü. ¿Ẽ̱xna tama pexãnee nax ngẽmaãcü chomaxã pixĩgüxü̃?
4 Rü woo chi aixcüma choma chanaxüxgu i ta̱xacürü chixexü̃, rü ngẽma chixexü̃ i chaxüxü̃ rü chi choxrütama guxchaxü̃ nixĩ.
5 Rü nagu perüxĩnüegu rü pema nixĩ i choxrü yexera perümemaegüxü̃. Rü ngẽmaca̱x choxü̃ naxca̱x pixugüecha i ngẽma guxchaxü̃ i choxü̃ ngupetüxü̃.
6 Rü chanaxwa̱xe i meama nüxü̃ pecua̱x rü Tupana nixĩ i cha̱u̱xca̱x ínanguxẽẽcü i ngẽma guxchaxü̃ i nawa changexmaxü̃. Rü nüma nixĩ i norü yütagu choxü̃ nanguxẽẽxü̃.
7 Rü poraãcü aita chaxü nax texé choxü̃ íyapoxü̃xü̃ca̱x, natürü taxúema choxü̃ ítayapoxü̃. Rü ngü̃xẽẽca̱x íchaca natürü taxúema chauétüwa tidexa.
8 Rü Tupana rü choxü̃ nipoxyemaxü̃ nax taxucürüwa chaxüpetüxü̃ca̱x. Rü nanaxẽanexẽxẽ i chorü nama i nagu chixũxü̃.
9 Rü nüma nixĩ i choxna napuxü̃ãxü̃ ga guxü̃ma ga yema mexü̃gü ga noxri choxü̃́ yexmaxü̃, rü ngẽmaca̱x i ñu̱xma rü duü̃xü̃pe̱xewa rü taxuwama chame.
10 Rü nüma ya Tupana rü guxü̃wama chaugu nayanachixexẽxẽ ñoma wüxi i nai i naxchúma̱xãmaxã nabéxü̃rüxü̃. Rü ngẽmaca̱x i ñu̱xma rü taxucürüwama íchananguxẽxẽ ga yema mexü̃ ga noxri nagu charüxĩnüxü̃.
11 Rü poraãcü chomaxã nanu rü ñoma wüxi i norü uanürüxü̃ chomaxã nixĩ.
12 Rü guxü̃ma i norü churaragü rü chauxü̃tawa nabuxmü, rü chopataxü̃ ínachomaeguãchi. Rü ngéma nügü namexẽẽgü nax cha̱u̱xca̱x íyaxü̃ãchixü̃ca̱x.
13 Rü nüma ya Tupana rü wüxi i ĩnü naãxẽwa nangu i chauenexẽgü rü chomücügü nax choxna yaxĩgachitanüxü̃ca̱x. Rü ngẽmaca̱x i nümagü rü ñoma tama choxü̃ nacua̱xgüxü̃rüxü̃ãcü chomaxã nixĩgü.
14 19:14-15 Rü chautanüxü̃ rü chomücügü rü nua choxü̃ nata̱xgümare. Rü yema duü̃xü̃gü ga noxri wüxigu chomaxã chopatawa yexmagüxü̃ rü choxü̃ inarüngümae. Rü ngẽma chauxü̃tagugüxü̃ rü ñoma wüxi i duü̃xü̃ i tama choxü̃ nacua̱xgüxü̃rüxü̃ chomaxã nixĩgü, rü ñu̱xma rü marü tama choxü̃ nacua̱xgü.
15 Nüü̃ nadau 19:14
16 Rü ngẽxguma naxca̱x chacagu i wüxi i chorü puracütanüxü̃, rü tama choxü̃ nangãxü̃. Rü woo naxca̱x chacaechagu rü tama choxü̃ nangãxü̃.
17 Rü ngẽxguma cho̱xma̱xna changaixcamagu, rü choxü̃ taxoo̱x. Rü woo chaunegü rü chowa nanaxoxégagü.
18 Rü ngẽma buxü̃gü rü choxü̃ naxoe. Rü ngẽxguma choxü̃ nadaugügu rü choxü̃ nacugüe rü cha̱u̱xcha̱xwa nidaugachitanü.
19 Rü ngẽma chomücüxüchigü rü chauxchi naxaie. Rü ngẽma nüxü̃ changechaü̃xü̃chigüxü̃ rü chomaxã narüxuanügü.
20 Rü ngẽma cha̱u̱xcha̱xmü rü marü chauxchina̱xãwa nayaxũ̱xgü. Natürü naétüwa chamaxãma.
21 ¡Pexü̃́ changechaü̃tümüxü̃, Pa Chomücügüx! Erü nüma ya Tupana rü naxme̱xmaxã choxü̃ nima̱x.
22 ¿Tü̱xcüü̃ i pema rü Tupanarüxü̃ chowe pingẽxü̃tanüxü̃? ¿Rü tama ẽ̱xna i marütama yixĩxü̃ nax chixexü̃ chomaxã pexüxü̃?
23 19:23-24 Rü chierüx texé naxümatügu i chorü dexa. Rü chierüx wüxi i fierunaxca̱x i ümatüruü̃maxã plómotachinügu rüe̱xna nutatachinügu naxümatügu i ñaa chorü ore nax guxü̃guma ngéma nangẽxmaechaxü̃ca̱x.
24 Nüü̃ nadau 19:23
25 Rü choma rü nüxü̃ chacua̱x rü yimá choxü̃ ípoxü̃cü rü namaxü̃. Rü nüma tá nixĩ i chauétüwa nachogüxü̃ i ñoma i naanewa.
26 Rü woo i ñaa chauxune rü tá nua chanata̱x, natürü choma rü chauxetümaxã tá Tupanaxü̃ chadau.
27 Rü chomatama chauxetümaxã tá nüxü̃xüchi chadau rü tama toxü̃marexü̃ tá chadau. Rü ngẽma nixĩ i poraãcü íchananguxẽẽxü̃.
28 Rü pema rü chauchiga pidexagü rü ñaperügügü: “¡Ngĩxã nüxü̃ tixugüe erü aixcüma nixĩ i chixexü̃ naxüxü̃!” ñaperügügü.
29 ¡Natürü pegüna pedaugü nax tama pexca̱x ínanguxü̃ i Tupanaarü tara i taxrewa ãmaguxü̃! Erü ngẽma taramaxã nixĩ ya Tupana napoxcuxü̃ i ngẽma chixexü̃gu maxü̃xü̃. ¡Rü nüxna pecua̱xãchi nax nangẽxmaxü̃ ya wüxi ya ãẽ̱xgacü ya tórü cagüruxü̃ ixĩcü! —ñanagürü ga Yox.
