Job 2:1-13
2 Rü yexguma nawa nanguxgu ga ngunexü̃ nax Tupanape̱xewa wena nangugüxü̃ ga yema norü orearü ngeruü̃gü ga daxũcüã̱x, rü nüma ga Chataná rü ta natanügu naxã.
2 Rü nüma ga Cori ya Tupana rü nüxna naca rü ñanagürü: —¿Ngextá ne cuxũ i cumax? —ñanagürü. Rü nüma ga Chataná rü nanangãxü̃ rü ñanagürü: —Nawa ne chaxũ nax nagu íchayaxüeguxü̃ i ngẽma naane —ñanagürü.
3 Rü yexguma ga nüma ga Cori ya Tupana rü ñanagürü nüxü̃: —¿Tama ẽ̱xna cunangugü ya yimá chorü duü̃ ya Yox? Rü tataxuma ya texé ya naxrüxü̃ ixĩxẽ, rü naxrüxü̃ chauga ĩnüxe, rü naxrüxü̃ mea maxü̃́xẽ, rü naxrüxü̃ chixexü̃wa ngechigaxe, rü naxrüxü̃ tügüna dauxe nax taxúemaxã chixexü̃ taxüxü̃ca̱x. Rü woo i cuma choxna naxca̱x cuca nax chixexü̃ nüxü̃ cungupetüxẽẽxü̃ca̱x nüma taxuxü̃ma i chixexü̃ naxüyane, natürü nüma rü nanaxa̱i̱xrügumaraxü̃mare i nacümawa rü taxuxü̃ma i chixexü̃ naxü —ñanagürü.
4 Natürü ga nüma ga Chataná rü Cori ya Tupanaxü̃ nangãxü̃ga rü ñanagürü: —Ngẽxguma taxúema ya texé tümaxü̃nexü̃chimaxã chixexü̃ üxgu ya wüxíe, rü taxuca̱xma tanaxĩ̱xãchiãxẽ. Rü tügü nax tamaxẽẽxü̃ca̱x rü ítamemare nax itanaxãxü̃ i guxü̃ma i ta̱xacü i tüxü̃́ ngẽxmaxü̃.
5 Natürü ngẽxguma chi naxü̃newaxüchi yada̱xawexẽẽ̱xgu rü tá nüxü̃ cudau nax chixexü̃ tá cupe̱xewatama cumaxã yaxugüxü̃ —ñanagürü.
6 Rü nüma ga Cori ya Tupana rü Chatanáxü̃ nangãxü̃ga rü ñanagürü: —Marü name. ¡Rü namaxã naxü i ngẽma cuma cunaxwa̱xexü̃, natürü taxũtáma nüxna cunayaxu i norü maxü̃! —ñanagürü.
7 Rü yexguma ga nüma ga Chataná rü Cori ya Tupanape̱xewa nixũgachi, rü Yoxca̱x ínananguxẽxẽ ga wüxi ga chaxü̃ne ga poraxü̃ ga guxü̃ma ga naxü̃newa rüyixü̃. Rü naeruwa inaxügü rü ñu̱xmata nacutüwa nangu.
8 Rü yexguma ga nüma ga Yox rü tanimacate̱xewa narüto. Rü nanayaxu ga wüxi ga waixü̃münaxca̱x ga buetarechipe nax yemamaxã nügü yawü̱xünexü̃ca̱x.
9 Natürü tüma ga naxma̱x rü ñatagürü nüxü̃: —¿Ẽ̱xna ñoma rü ta nagu curüxĩnüama nax mea Tupanape̱xewa cumaxü̃xü̃? ¡Rü Tupanape̱xewa chixexü̃ naxuegu rü noxtacüma nayu! —ñatagürü.
10 Natürü ga nüma ga Yox rü ngĩxü̃ nangãxü̃ga rü ñanagürü: —Pa Ngex, tama name i ngẽmaãcü chixexü̃ i oremaxã quidexa. Rü guxü̃guma taãẽãcü tanayaxu i ngẽma mexü̃gü ya Tupana tüxna ãxü̃. ¿Rü ñuxãcü chi i taxũchima nayaxuxü̃ i ngẽma guxchaxü̃gü i taxca̱x ínguxü̃? —ñanagürü. Rü yemaacü ga Yox rü woo yema nüxü̃ nax ngupetüxü̃ rü tama chixexü̃ naxü rü bai ga norü dexawa.
Yoxü̃ ínayadaugü ga tomaepü̱x ga namücügü
11 Rü nüma ga Yox rü nüxü̃́ nayexma ga tomaepü̱x ga namücügü, rü wüxi rü Erifá ga Temáü̃anecüã̱x ixĩxü̃, rü to rü Biridá ga Chúaanecüã̱x ixĩxü̃, rü yema to rü Chofá ga Naamáxanecüã̱x ixĩxü̃. Rü yexguma nüxü̃ naxĩnüechigagu ga naguxü̃raü̃xü̃ ga guxchaxü̃gü nüxü̃ nax ngupetüxü̃ ga Yox, rü wüxigu naxü̃tawa naxĩ nax nataãẽgüxẽẽãxü̃ca̱x rü yaxümücügüãxü̃ca̱x nawa ga yema ngúxü̃ nax yangexü̃.
12 Rü yexguma yáxü̃gutama naxĩxgu rü Yoxü̃ nadaugü, rü yema poraãcü nax yada̱xawexü̃ rü tama aixcüma nüxü̃ nacua̱xgü. Rü yemaca̱x inanaxügüe ga aita nax naxüexü̃ rü naxauxexü̃. Rü yema taxü̃ ga ngechaü̃ nax yangegüxü̃gagu rü nügü narügáutechirugü rü mairaxü̃te̱xe nügüerugu nagünagügü.
13 Rü yemawena rü Yoxmaxã mairaxü̃anewa narütogü. Rü 7 ga ngunexü̃ rü 7 ga chütaxü̃ yéma nayexmagü rü taxuxü̃ma ga dexa nanaxuxuchigü, yerü nüxü̃ nadaugü ga Yox ga taxü̃ ga ngúxü̃ nax yangexü̃.
