Job 20:1-29
20 Rü nüma ga Chofá rü Yoxü̃ nangãxü̃ rü ñanagürü nüxü̃:
2 —Cuma rü choxü̃ cuchixeãxẽ namaxã i curü dexa rü marü tama yáxna namaxã chaxĩnü. Rü ngẽmaca̱x i ñu̱xma rü tá cuxü̃ changãxü̃.
3 Rü ngẽma curü dexamaxã rü chixexü̃ chomaxã quixugü, natürü choma rü nüxü̃ chacua̱x nax ñuxãcü tá cuxü̃ changãxü̃xü̃.
4 20:4-5 Rü cuma rü meama nüxü̃ cucua̱x rü yexguma noxritama Tupana nango̱xẽẽgu ga yatü ga ñoma ga naanewa, rü ngẽma duü̃xü̃gü i chixri maxẽxü̃arü taãxẽ rü tama natai rü wüxi i paxaãchiruü̃mare nixĩ, rü inayacua̱xmare.
5 Nüü̃ nadau 20:4
6 20:6-7 Rü woo chi ngẽma yatü rü nügü ínata̱xgu ñu̱xmata caixanexü̃wa nanguxgu i nachiga, natürü ngẽma yatü rü ñoma naü̃rüxü̃ tá inayarüxomare, rü namücügü rü taxũtáma nüxü̃ nacua̱xgü nax ngexta nangẽxmaxü̃.
7 Nüü̃ nadau 20:6
8 Rü ñoma wüxi i ta̱xacü i nagu ixãnegüxü̃ rüe̱xna chütacü ingõ̱xetügurüxü̃ tá inayarüxo, rü tagutáma wena texé ñuxgu nüxü̃ tadau.
9 Rü yema duü̃xü̃gü ga wüxigu napatawa namaxã yexmagüxü̃ rü guxü̃guma nüxü̃ daugüxü̃ rü tagutáma wena nüxü̃ nadaugü.
10 Rü ngẽma yatü nanegü tá nixĩ i tüxü̃́ nawoeguxẽẽxü̃ ga yema tümaarü yemaxü̃gü ga nanatü tüxü̃́ naxca̱x ngĩ́xü̃ ga guxema ingearü diẽruã̱xgüxe.
11 Rü ngẽma yatü rü woo nangextü̱xügutama rü naporagutama tá nixĩ i nayuxü̃.
12 20:12-13 Rü ngẽma chixexü̃ i naxüxü̃ rü ñoma maixcuraxü̃rüxü̃ naxca̱x ixĩxü̃, rü norü conütüxü̃gu namaxã nanguxü̃, rü nügüã̱xwa tama ínanaxũxü̃xẽxẽ.
13 Nüü̃ nadau 20:12
14 Natürü ngẽxguma naanüwa nanguxgu rü ñoma ãxtapeguchatarüxü̃ tá nixĩ i ngẽma chixexü̃ i naxüxü̃ i ngẽma yatü.
15 Rü ngẽma ngẽmaxü̃gü i ngẽma yatü naxca̱x ngĩ́xü̃ rü Cori ya Tupana rü tá nüxna nanayaxu.
16 Rü ngẽma chixexü̃ i naxüxü̃ rü ñoma wüxi i ãxtapeguchatarüxü̃ nixĩ, rü yixcamaxü̃ra rü tá nanayuxẽxẽ.
17 Rü ngẽmaca̱x taxũtáma nayaxaxü ya yima lechi rü yima berure i ñoma natügüarü dexárüxü̃ taguma taxü̃ne.
18 Rü guxü̃ma i norü ngẽmaxü̃gü i nüxü̃́ ngẽxmaxü̃ rü taxũtáma nüma namaxã nataãxẽ. Rü tá nanawoeguxẽxẽ erü womüxẽẽãcüma nixĩ i nüxü̃́ nangẽxmaxü̃.
19 Rü duü̃xẽgü ya ingearü diẽruã̱xgüxe tüxü̃ napuracüexẽxẽ, rü ñu̱xũchi ngéma tüxü̃ nawogümare. Rü ĩpatagü ya tama nüma ínaxüxü̃ne rü noxrüxü̃ nayaxĩgüxẽxẽ.
20 Rü woo namuxgu i ngẽma norü ngẽmaxü̃gü, natürü nagu narüxĩnüama nax ñuxãcü yexera nüxü̃́ ngẽxmaxü̃ i norü ngẽmaxü̃gü. Rü nataxuma i ta̱xacü i tama naya̱u̱xchaü̃xü̃.
21 Rü guxü̃ma i ta̱xacü i nüxü̃́ ngúchaü̃xü̃ rü nügüaxü̃́ nanangexmaxẽẽchaü̃. Rü ngẽmaca̱x taguma nataãxẽ namaxã i ngẽma nüxü̃́ ngẽxmaxü̃.
22 Rü ngẽxguma yexera namuarü ngẽmaxü̃ã̱xgu rü yexera tama nataãxẽ. Rü ngẽmagagu tá düxwa duü̃xü̃gü i chixexü̃arü üruxü̃me̱xẽgu nangu.
23 Rü ngẽxguma meama ínachibüyane rü Tupana rü tá namaxã nanu rü tá ngúxü̃ naxca̱x ínanguxẽxẽ ñoma pucü naxca̱x ínguxgurüxü̃.
24 Rü ngẽxguma naxne i fierunaxca̱xmaxã tama namaxã namexchinügügu, rü würaarü chuxchi i bróũchenaxca̱xmaxã tá namaxã namexchinügüama.
25 Rü yima würaarü chuxchi rü tá nayatoxpetüxüne, rü nape̱xe rü tá nacawa nayarügo. Rü ngẽxguma ngẽma ngupetügu rü poraãcü tá namuü̃.
26 Rü wüxi i waanexü̃ tá nagu nangu. Rü wüxi i üxüema i tama duü̃xü̃ inaixẽẽxü̃ tá nagu nanguema rü ngẽxma tá napatamaxã nixa wüxigu namaxã i guxü̃ma i norü ngẽmaxü̃gü.
27 Rü dauxü̃guxü̃ i naane rü tá nanango̱xẽxẽ i norü chixexü̃ rü ñoma i naanewa rü duü̃xü̃gü tá nüxü̃ nixugüe i ngẽma chixexü̃ i naxüxü̃.
28 Rü ngẽxguma Tupanaarü nu naétügu nguxgu, rü ngẽxma tá narüxo i guxü̃ma i nüxü̃́ ngẽxmaxü̃.
29 Rü ngẽma nixĩ i ngẽma poxcu ya Tupana namaxã ueguxü̃ i ngẽma duü̃xü̃ i chixexü̃gu maxü̃xü̃. Rü ngẽma nixĩ i poxcu ya Tupana naxca̱x mexẽẽxü̃ i ngẽma duü̃xü̃ i chixexü̃gu maxü̃xü̃ —ñanagürü ga Chofá.