Job 21:1-34
21 Rü nüma ga Yox, rü Chofáxü̃ nangãxü̃ rü ñanagürü:
2 —Rü ngẽxguma mea choxü̃́ iperüxĩnüegu i ngẽma chorü dexa i pemaxã nüxü̃ chixuxü̃, rü ngẽma tá nixĩ i guxü̃arü yexera choxü̃ taãẽxẽẽxü̃.
3 Rü ngẽxguma pemaxã chidexagu rü chanaxwa̱xe nax yáxna namaxã pexĩnüexü̃ i chorü ore. Rü ngẽxguma marü chigúegagu rü marü name i choxü̃ pecugüe ega penaxwa̱xegu.
4 Rü marü tama wüxi i duü̃xü̃xü̃ nixĩ i chaca̱a̱xü̃ natürü Tupanaxü̃ nixĩ i chaca̱a̱xü̃. Rü ngẽmaca̱x chanaxwa̱xe i paxa choxü̃ nangãxü̃.
5 Rü ngẽxguma chi mea choxü̃́ iperüxĩnüegu rü chi tá peba̱i̱xãchie rü perüchianegümarex.
6 Rü ngẽxguma chomatama nagu charüxĩnügu i ñaa tá pemaxã nüxü̃ chixuxü̃ rü poraãcü chabaixãchi rü muü̃maxã chidu̱xrux.
7 ¿Rü tü̱xcüü̃ i ngẽma duü̃xü̃gü i chixexü̃gu maxẽxü̃ rü namáarü maxü̃xã̱xgüxü̃ rü mea yanayaegüxü̃ rü naporaexü̃?
8 Rü nüxü̃ nadauxü̃ nax nape̱xewa mea nayaexü̃ i nanegü rü nataagü rü naxü̃tawa rü taxuxü̃ma nachixewegüxü̃.
9 Rü taxuxü̃ma i ta̱xacü nachixeãẽgüxü̃ i napatawa, rü Tupana rü tama nanapoxcue.
10 Rü norü wocagü rü guxü̃guma mea nixãxacügü, rü taguma chixri nibuexacügü.
11 Rü nanegü rü taãẽxãcü nanaxüanegü rü naxĩnüca̱xwa̱xegü ñoma carnéruxacügü ĩnüca̱xwa̱xegüxü̃rüxü̃.
12 Rü nanegü rü taãẽxãcü narüyuxtanüxü̃, rü iniyüxe árpagagu rü tutugagu rü wowerugagu.
13 Rü namuarü ngẽmaxü̃a̱xãcüma nayue rü meamare naxmaxü̃gu nayanaxücuchigü.
14 Rü nümagü rü Tupanaxü̃ ñanagürügü: “¡Taxṹ i toxü̃ cuchixewexü̃! Erü toma rü tama nüxü̃ tacuáxchaü̃ i curü mugü.
15 ¿Rü texé nixĩ ya yimá Tupana ya Guxãétüwa Ücü rü ngẽmaca̱x nanaxwa̱xexü̃ nax naga taxĩnüexü̃? ¿Rü ta̱xacüwa chi toxü̃́ name ega ngẽxguma nape̱xewa tayumüxẽgügu?” ñanagürügü.
16 Natürü ngẽma duü̃xü̃gü i chixexü̃gu maxẽxü̃ rü tama norü taãẽarü yora nixĩgü. Rü choma rü tama ngẽma duü̃xü̃gü nagu rüxĩnüexü̃gu charüxĩnü.
17 ¿Rü ñuxgu yixĩxü̃ i nüxü̃ idauxü̃ nax paxãma nayuexü̃ i ngẽma duü̃xü̃gü i chixexü̃gu maxẽxü̃? ¿Rü ñuxgu yixĩxü̃ nax ta̱xacürü guxchaxü̃ nüxü̃ üpetüxü̃? ¿Rü ñuxgu yixĩxü̃ nax Tupana namaxã nanuxü̃ rü ngúxü̃ naxca̱x ínanguxẽxẽxü̃?
18 ¿Rü ñuxgu yixĩxü̃ i nüxü̃ idauxü̃ nax ñoma maxẽ i paxü̃ i buanecü ingexü̃rüxü̃ yaxĩgüxü̃?
19 Rü nüxü̃ yaxugüegu rü nanegüama tá nixĩ ya Tupana naxca̱x nacaxü̃ i ngẽma chixexü̃ i nanatügü ügüxü̃. Natürü ngẽma duü̃xü̃ i chixexü̃gu maxü̃xü̃ rü nanaxwa̱xe nax nümatátama naxca̱x napoxcuxü̃ i ngẽma chixexü̃ i naxüxü̃ nax ngẽmaãcü nügü yanawe̱xãchixẽẽxü̃ca̱x.
20 Rü nümatátama nixĩ i naya̱u̱xãxü̃ ya Tupana ya Guxãétüwa Ngẽxmacüarü poxcu i nagu nguxü̃.
21 Rü wüxicana nax nayuxü̃ i nüma i chixexü̃gu maxü̃xü̃, rü nüxü̃́ nanataxuraü̃mare ega ta̱xacü nüxü̃ ngupetügu i naxma̱x rü naxacügü.
22 ¿Rü texé tá Tupanaxü̃ tangu̱xẽxẽ? Erü woo ngẽma dauxü̃cüã̱x i duü̃xü̃gü rü nüma ya Tupana tá nixĩ i nüxna naca̱xaxü̃.
23 21:23-24 Rü nangẽxma i duü̃xü̃gü i nangextü̱xügutama yuexü̃ woo guxü̃wama mea nüxü̃ nangupetügu, rü naporaegu rü nataãẽgügu rü tama yada̱xaweegu.
24 Nüü̃ nadau 21:23
25 Rü nangẽxma i togü i duü̃xü̃gü i guxü̃guma nueechaxü̃ rü taguma taãẽgüxü̃, rü ngẽmaãcü yuexü̃.
26 Natürü guxü̃ma i duü̃xü̃gü i ngẽxguma nayuegu rü naxmaxü̃wa nangẽxmagügu rü nawüxigumare erü guxü̃ma i duü̃xü̃gü rü õ̱xmigü namaxã naxãwemü.
27 Rü choma rü meama nüxü̃ chacua̱x i ngẽma pema chomaxã nagu perüxĩnüe. Rü nüxü̃ chacua̱x i ngẽma ĩnügü i chixexü̃gü i pexü̃́ ngẽxmagüxü̃.
28 Rü pema rü pegüna pecagü rü ñaperügügü: “¿Ngextá nangẽxma ya yima napatagü i ngẽma duü̃xü̃gü i muarü ngẽmaxü̃xã̱xgüxü̃ i chixexü̃gu maxẽxü̃?”
29 ¿Rü tama ẽ̱xna namaxã pidexagüxü̃ i ngẽma duü̃xü̃gü i marü to i nachixü̃anegügu naxĩanexü̃? ¿Rü tama ẽ̱xna nüxü̃ pexĩnüe i ngẽma nüxü̃ yaxugüexü̃?
30 Rü ngẽxguma nanuxgu ya Tupana rü guxchaxü̃ ínanguxẽxẽ. Natürü ngẽma duü̃xü̃ i chixexü̃gu maxü̃xü̃ rü taxuxü̃ma i ta̱xacürü chixexü̃ nüxü̃ naxüpetü. Rü ngẽma ngunexü̃ ya Tupana nagu nuxü̃ rü taxuxü̃ma nüxü̃ nangupetü i ngẽma chixexü̃gu maxü̃xü̃.
31 Rü ngẽma duü̃xü̃ i chixexü̃gu maxü̃xü̃ rü taguma texé ñuxgu nüxü̃ tixu naxca̱x i nacüma i chixexü̃ rü bai i ñuxgu texé naxca̱x napoxcuxü̃ i ngẽma norü chixexü̃ i naxüxü̃.
32 21:32-33 Rü ngẽxguma nayu̱xgu rü tauquewa nangegüã̱xgu nax nata̱xgüãxü̃ca̱x rü muxü̃ma i duü̃xü̃gü ínayaxümücügü. Rü nape̱xegu naxĩ i muxü̃ma i duü̃xü̃gü rü naweama nixĩxü̃tanü ta i to i duü̃xü̃gü i muxü̃ma. Rü ngẽma naxma̱xü̃ i nagu natáxü̃ rü duü̃xü̃gü rü meama nüxna nadaugü. Rü woo waixü̃müane rü ta taãẽãcü nanayaxu i naxü̃ne.
33 Nüü̃ nadau 21:32
34 ¡Rü taxuwama name i ngẽma ore i namaxã choxü̃ petaãẽxẽxẽgüchaü̃xü̃! ¡Rü guxü̃ma i ngẽma ore i chomaxã nüxü̃ pixuxü̃ rü doramare nixĩgü! —ñanagürü ga Yox.
