Job 22:1-30
22 22:1-2 Rü yexguma ga nüma ga Erifá rü Yoxü̃ nangãxü̃ rü ñanagürü: —¿Cuma nagu curüxĩnügu rü Tupanaaxü̃́ namexü̃ ya wüxi ya yatü woo nüxü̃ cua̱xüchicü yixĩxgu?
2 Nüü̃ nadau 22:1
3 ¿Rü yimá Tupana ya Guxãétüwa Ngẽxmacü rü ta̱xacürü mexü̃ tá cuwa nayaxu ega mea cumaxü̱̃xgu rü nape̱xewa nataxuxgu i curü chixexü̃?
4 22:4-5 Rü ñu̱xma nax Tupana cuxü̃ poxcuxü̃ rü tama i ta̱xacürü mexü̃ nax naxca̱x cuxüxü̃gagu nixĩ i cuxna naca̱xaxü̃ rü cuxü̃ yanawe̱xãchixẽẽxü̃. Natürü ngẽma curü chixexü̃ i taxüchixü̃ i taxuguma yagúxü̃gagu nixĩ i cuxü̃ napoxcuxü̃.
5 Nüü̃ nadau 22:4
6 Rü cuma rü woo íxramarexü̃ i diẽru i cuxü̃tawa naxca̱x ítacagüxü̃ca̱x ya cumücügü, rü cuma rü tümachiru tüxna cuyauxmare ñu̱xmata cuxü̃́ tanaxütanügü i ngéma diẽru i tüxna cuxãxü̃. Rü ngẽmaãcü i cuma rü tüxü̃ quingexchiruxẽxẽ.
7 Rü guxema ita̱xawaexe rü tama tüxü̃ cuxaxẽxẽ. Rü guxema taiyaxe rü tama tüxü̃ cuchibüxẽxẽ.
8 Rü yema nax cumuarü diẽruxã́xü̃ca̱x rü nagu curüxĩnü nax ñoma i naanearü yora quixĩxü̃.
9 Rü yutegüxe rü tümamaxã cuxaü, rü taxcutagü chixri tümamaxã icucua̱x.
10 Rü ngẽmaca̱x i ñu̱xma rü ãũcümaxü̃wa cungexma, rü paxa tá cuxca̱x ínangu nax cumuü̃xü̃.
11 Rü ñu̱xma rü waanexü̃wa cungexma rü taxuxü̃ma i ta̱xacüxü̃ cudau. Rü natü i poraü̃chíüxü̃gu cungu.
12 Rü nüma ya Tupana rü dauxü̃waxüchi nangẽxma rü yimá ẽxtagü ya dauxü̃wa nüxü̃ idaucü rü nacutütüü̃wa nangẽxmagü.
13 22:13-14 ¿Ñuxãcü i cuma i nagu curüxĩnüxü̃ nax Tupana tama nüxü̃ nacuáxü̃ i ngẽma cuxüxü̃, rü ngẽma pamüxü̃ i caixanexü̃gagu taxucürüwa cuxü̃ nangugüarü maxü̃ã́xü̃? ¿Rü ñuxãcü nüxü̃ quixuxü̃ nax Tupana tama cuxü̃ dauxü̃? Erü nüma rü guxü̃wama naxũ i dauxü̃wa.
14 Nüü̃ nadau 22:13
15 ¿Ẽ̱xna nagu quixũxchaü̃ i ngẽma nacüma i chixexü̃ i nagu namaxẽxü̃ i ngẽma duü̃xü̃gü i chixexü̃gu ĩxü̃?
16 Rü ngẽma duü̃xü̃gü i chixexü̃gu maxẽxü̃ rü paxãma nayue ñoma wüxi i natü i poraü̃chíüxü̃gu nayixgurüxü̃.
17 Rü ngẽma duü̃xü̃gü i chixexü̃gu maxẽxü̃ rü Tupanaca̱x wáita naxüe rü ñanagürügü: “¡Taxṹ i toxü̃ cuchixewexü̃! ¿Ta̱xacürü mexü̃ tá toxca̱x cuxü, Pa Tupana ya Guxãétüwa Ngẽxmacü?” ñanagürügü.
18 Natürü nüma ya Cori ya Tupana nixĩ i nüxna naxãxü̃ i guxü̃ma i norü ngẽmaxü̃gü ya napatagü namaxã napagüne. Natürü i choma rü tama ngẽma duü̃xü̃gü i chixexü̃gu maxẽxü̃arü ĩnü choxü̃́ nangẽxma.
19 22:19-20 Rü nataãẽgü i ngẽma duü̃xü̃gü i mexü̃gu maxẽxü̃, rü nacugüe i ngẽxguma nüxü̃ nadaugügu nax yaxaexü̃ i norü ngẽmaxü̃gü i ngẽma duü̃xü̃gü i chixexü̃gu maxẽxü̃.
20 Nüü̃ nadau 22:19
21 ¡Rü dücax, rü wenaxarü Tupanamaxã rüngüxmü! Rü ngẽmaãcü tá wenaxarü mea cuxü̃ naxüpetü.
22 ¡Rü irüxĩnü i norü ucu̱xẽ rü cuãẽgu namaxã nanguxü̃ i norü ore!
23 22:23-25 Rü ngẽxguma chi yimá Guxãétüwa Ngẽxmacüna cugü cuxãxgu rü naxca̱x cutaegu̱xgu rü chi cuyaxũgachixẽẽgu i ngẽma chixexü̃ i cuchiü̃wa ngẽxmaxü̃ rü chi ñoma natügüarü nutagürüxü̃ ícunawogügu i curü úiru i mexẽchixü̃ rü curü diẽrugü, rü ñu̱xũchi nümatama ya Tupana rü ñoma curü úiru rü curü diẽrurüxü̃ tá nixĩ i cuxca̱x.
24 Nüü̃ nadau 22:23
25 Nüü̃ nadau 22:23
26 Rü ngẽxguma rü tá curü taãxẽ nixĩ ya Tupana rü taxuca̱xtama nüxü̃ cuxãne.
27 Rü ngẽxguma curü yumüxẽwa ta̱xacüca̱x nüxna cuca̱xgu, rü nüma rü tá cuxü̃ naxĩnü. Rü cuma rü tá cuyanguxẽxẽ i guxü̃ma i ngẽma namaxã icuxunetaxü̃.
28 Rü guxü̃ma i ngẽma cuxüxü̃wa rü mea tá ínanguxuchi. Rü Tupana rü tá cuxü̃ nibáixmaxü̃ i ngextá ícuxũxü̃wa.
29 Erü nüma ya Tupana rü nanaxãnexẽxẽ i ngẽma nügü icua̱xüü̃xü̃, natürü tüxü̃ ínapoxü̃ ya yíxema tama tügü írütaxe.
30 Rü nüma ya Tupana rü tá curü guxchaxü̃güwa cuxü̃ ínanguxuchixẽxẽ, ega ngẽxguma taxuxü̃ma i chixexü̃ cuxü̱xgu. Rü ñu̱xũchi tá cuxü̃́ nüxü̃ inarüngüma i curü chixexü̃gü —ñanagürü ga Erifá.
