Job 23:1-17
23 23:1-2 Rü yexguma ga nüma ga Yox rü nanangãxü̃ rü ñanagürü: —Chanaxĩ̱xãchiãẽãcüma tá chanangãxü̃ i ñu̱xma erü nüma ya Tupana rü naxme̱xmaxã choxü̃ nima̱x.
2 Nüü̃ nadau 23:1
3 23:3-4 Rü chierüx nüxü̃ chacua̱xgu nax ngexta Tupanaxü̃ ichayangauxü̃ nax naxü̃tawa changuxü̃ca̱x, rü namaxã ngéma chayarüdexaxü̃ca̱x, rü namaxã nüxü̃ chixuxü̃ca̱x i ngẽma choxü̃ ngupetüxü̃. Erü choxü̃́ nangẽxma i muxü̃ma i ta̱xacü i namaxã nüxü̃ chixuxü̃ nax ngẽmamaxã chaugü íchapoxü̃xü̃ca̱x.
4 Nüü̃ nadau 23:3
5 Rü ngẽxguma chi chomaxã nüxü̃ yaxuxgu nax ta̱xacüca̱x yixĩxü̃ nax ñaa choxü̃ ngupetüxü̃, rü choma rü chi nüxü̃ chacua̱x nax ta̱xacümaxã tá chanangãxü̃xü̃.
6 Rü ngẽxguma namaxã nüxü̃ chixuxgu i ngẽma choxü̃ ngupetüxü̃, rü nüma ya Tupana rü taxũtáma chomaxã nanu rü tá choxü̃́ inarüxĩnü.
7 Rü tá choxü̃́ nayaxõ nax aixcüma yixĩxü̃ i ngẽma namaxã nüxü̃ chixuxü̃. Rü ngẽmaãcü tá guxü̃gutáma choxü̃ ínanguxuchixẽxẽ nawa i ngẽma guxchaxü̃gü i ñu̱xma choxü̃́ ngẽxmaxü̃.
8 Natürü ngẽxguma chi éstegu Tupanaca̱x chada̱u̱xgu rü nataxuma i ngéma. Rü ngẽxguma chi oéstegu naxca̱x chada̱u̱xgu, rü ngéma rü ta tama nüxü̃ ichayangau.
9 Rü ngẽxguma chi nórtegu naxca̱x chada̱u̱xgu rü tama nüxü̃ chadau. Rü ngẽxguma chi súrgu naxca̱x chada̱u̱xgu rü ngéma rü ta tama cha̱u̱xca̱x nango̱x.
10 Natürü nüma rü nüxü̃ nacua̱x nax ñuxãcü yixĩxü̃ i chorü maxü̃. Rü ngẽxguma choxü̃ naxü̱xgu rü ñoma úiru i ngearü ãũãchiã́xü̃rüxü̃ tá chixĩ.
11 Rü choma rü guxü̃guma mea naga chaxĩnü rü taguma nüxna chixũgachi i ngẽma norü ucu̱xẽ i chomaxã nüxü̃ yaxuxü̃.
12 Rü guxü̃guma mea chayanguxẽxẽ i norü mugü rü norü ucu̱xẽgü, rü taguma choxrütama ngúchaü̃ chaxü.
13 Rü nüma ya Tupana rü ngẽxguma ta̱xacü naxüxchaü̱̃xgu rü nanaxü. Rü taxúema texé tanaxüchicüxü i ngẽma norü ĩnü.
14 Rü ngẽma nüma nanaxwa̱xexü̃ nax chomaxã naxüaxü̃ rü tá nanaxü. Rü guxü̃ma i ngẽma nagu naxĩnüxü̃ rü tá chomaxã nanaxü.
15 Rü ngẽmaca̱x nüxü̃ chamuü̃. Rü ngẽxguma nagu charüxĩnügu i ngẽma chomaxã naxüxü̃ rü muü̃ cha̱u̱xca̱x ínangu.
16 Rü Tupana ya Guxãétüwa Ngẽxmacü rü choxü̃ nanaxĩ̱xãchiãẽxẽxẽ, rü ngẽmaca̱x poraãcü chamuü̃.
17 Natürü taxũtáma charüngea̱x nape̱xewa i guxü̃ma i ngẽma chorü guxchaxü̃gü i ñoma waanexü̃rüxü̃ chauétüwa ngẽxmaxü̃ —ñanagürü ga Yox.
