Job 24:1-25
24 Rü nüma ga Yox rü ñanagürü ta: —¿Tü̱xcüü̃ ya yimá Guxãétüwa Ücü ya Tupana rü tama tamaxã nüxü̃ yaxuxü̃ ega ta̱xacü naxüxchaü̃gu nax ngẽmaãcü i yixema i duü̃xü̃gü rü nüxü̃ icuáxü̃ca̱x?
2 Rü ngẽma duü̃xü̃gü i chixexü̃gu maxẽxü̃ rü nayapugachigü i ngẽma üyeanearü cua̱xruü̃gü. Rü tümaca̱x nangĩ̱xgü ya carnérugü nax yexeraãcü nüxü̃́ timuxü̃ca̱x.
3 Rü tümaxü̃naca̱x nangĩ̱xgü ya yíxema taxcutagü rü yutegüxe.
4 Rü yíxema duü̃xẽgü ya ingearü ngẽmaxü̃xã́xẽ rü ngẽxguma namagu taxĩgu rü tüxü̃ ínawoxü̃ i namawa, rü ngẽmaca̱x ya yixema duü̃xẽgü rü naxcha̱xwa iticu̱xgü.
5 Rü yíxema duü̃xẽgü ya ingearü diẽruã́xe rü chianexü̃wa taxĩ, rü ñoma búrugü i tama íyapuexü̃rüxü̃ tixĩgü. Rü ngẽxma chianexü̃gu naxca̱x tadaugü i tümawemügü nax ngẽmaãcü tanachibüexẽẽxü̃ca̱x i tümaxacügü.
6 Rü naanegü i yoraã́xü̃wa taxĩ nax tríguarü o tibuxgüxü̃ca̱x. Rü duü̃xü̃gü i chixecümaxü̃arü úbanecügüwa taxĩ nax úbaarü oca̱x tayadaugüxü̃ca̱x.
7 Rü ngẽxguma nachütagu rü tüxü̃ nayadeyuegu rü taxumaama tügü tidüxgü erü tingearü düxruü̃ã̱x.
8 Rü ngẽxguma máxpü̱xanexü̃wa ne naxũxgu ya pucü rü tiwaie. Rü pucücha̱xwa ãxmaxü̃gu tachocu nax ngéma tapaexü̃ca̱x.
9 Rü ngẽma duü̃xü̃gü i chixexü̃gu maxẽxü̃, rü yutegüxena tüxü̃ napuxü̃ ya tümaxacügü ya ngexwaca buexe. Rü yíxema ingearü diẽruã́xẽ rü nügüxü̃́ tüxü̃ nayaxu ya tümaxacüxe ñu̱xmata nüxü̃́ tanaxütanü i ngẽma nüxü̃́ tangetanügüxü̃.
10 Rü yíxema duü̃xẽgü ya ingearü diẽruã̱xgüxe rü ngexchiruãcü tanaxĩane. Rü taiyaeãcü trígupüü̃ tüxü̃ nanugüxẽxẽ.
11 Rü tayacamügü i oribuarü o nax tanayauxgüxü̃ca̱x i norü chíxü̃. Rü tanapu̱x i úbagü nax bínu taxügüxü̃ca̱x. Rü yoxni i tümagü rü ta̱xawamaxã tayuechaü̃.
12 Rü yíxema ĩanewa yuechaü̃xẽ rü taxauxe rü ngéma ticagüxü̃. Natürü nüma ya Tupana rü tama tüxü̃́ nüxü̃ naxĩnü i tümaarü yumüxẽ.
13 Rü nangẽxma i duü̃xü̃gü i tama ngóonexü̃maxã taãẽgüxü̃. Rü guxü̃wama i ngexta ínaxĩxü̃wa rü ngóonexü̃cha̱xwa nixĩgachi.
14 Rü ngẽma duü̃xü̃ i máetaxü̃ rü ngexwaca yangóonechaü̃gu rü inaxũãchi nax tüxü̃ yamáxü̃ca̱x ya yíxema duü̃xẽ ya ngearü diẽruã́xẽ. Rü chütacü rü wüxi i ngĩ́ta̱xaxü̃ nixĩ.
15 Rü ngẽma duü̃xü̃ i ãmaxü̃ i nai i ngexü̃maxã ipexü̃ rü ínananguxẽxẽ nax nawaanexü̃. Rü meama nügü nidüxchiwe, rü norü ĩnüwa rü ñaxü̃gu narüxĩnü: “Ñaãcü tá nixĩ i taxúema choxü̃ cuáxü̃”, ñaxü̃gu narüxĩnü.
16 Rü ngẽma ngĩ́ta̱xaxü̃ rü chütacü nixĩ i ĩpatagügu yaxǘcuchigüxü̃ nax nangĩ́xü̃ca̱x. Natürü ngunecü rü napatagu nügü narüwãxtaü̃, erü tama nanaxwa̱xe nax ngóonexü̃wa nangẽxmaxü̃.
17 Rü ngẽxguma yangóonegu rü ngẽma duü̃xü̃gü i ngĩ́ta̱xgüxü̃ca̱x rü nachüta erü guxü̃ma i ngẽma duü̃xü̃gü i ngĩta̱xgüxü̃ rü yexera nanaxwa̱xegü i ngẽma chütaxü̃arü waanexü̃ —ñanagürü ga Yox.
Chofá rü Yoxü̃ nangãxü̃
18 Rü nüma ga Chofá rü ñanagürü: —Ngẽma duü̃xü̃ i chixexü̃gu maxü̃xü̃ rü ñoma taxtüarü dexáarü chixĩxü̃rüxü̃ nichagü. Rü ngẽma norü naanegüwa rü marü taxuxü̃ma i nabü narüxü, rü ngẽmaca̱x taxúema ya duü̃xẽ norü úbanecügüwa tapuracüchaü̃.
19 Rü ngẽma gáuxü̃ rü inadexe i ngẽxguma taunecüwa nanguxgu rü nangu̱xetügu rü ngẽxma inayarüxo. Rü ngẽma duü̃xü̃ i chixexü̃gu maxü̃xü̃ rü ngẽxguma nayu̱xgu rü naxmaü̃gu nayarüxomare.
20 Rü woo ya naé rü nüxü̃ itarüngüma. Rü õxmigü rü tá nanangõ̱xgü, rü bai i texé tá ñuxgu nüxna tacua̱xãchi. Rü ngẽma duü̃xü̃ i chixexü̃gu maxü̃xü̃ rü ñoma nai ya tuxunerüxü̃ tá niwa̱x.
21 Rü ngẽma duü̃xü̃ i chixexü̃gu maxü̃xü̃ rü tümamaxã nachixecüma ya yíxema ngexegü ya ngexacügüxe rü yutegüxe, rü bai i ñuxgu nax tüxü̃ nangü̃xẽẽxü̃.
22 Natürü ya Tupana rü norü poramaxã nanadai i ngẽma yatügü i nügü írüporaexü̃. Rü ngẽxguma wüxicana nanuxgu ya Tupana rü taxúetama tiña nax tayuxü̃.
23 Rü ñu̱xma ya Tupana rü taxu ñanagürümare, natürü nüxü̃ nadau i guxü̃ma i ta̱xacü i naxüxü̃ i ngẽma duü̃xü̃ i chixexü̃gu maxü̃xü̃.
24 Rü ngẽma duü̃xü̃ i chixexü̃gu maxü̃xü̃, rü wüxi i paxaãchica̱xmare tá nixĩ i norü ngẽmaxü̃gü. Rü nüma rü paxatátama nüxna nayu. Rü ñoma maxẽ i rübéxü̃ rü paxa rüñẽ̱xẽxü̃rüxü̃ tá nixĩ. Rü ñoma triguya̱xa i paxü̃ rü ínapoõchixürüxü̃ tá nixĩ.
25 Rü ngẽxguma tama aixcüma ngẽmaãcü yixĩxgu ¿rü texé tá chomaxã nüxü̃ tixuxü̃ nax doramare yixĩxü̃ i ngẽma nüxü̃ chixuxü̃? ¿Rü texé tá itayanaxoxẽxẽ i ngẽma chorü ore? —ñanagürü ga Chofá.
