Job 27:1-23
27 27:1-2 Rü nüma ga Yox rü wenaxarü nidexa rü ñanagürü: —Tupana ya Guxãétüwa Ngẽxmacüégagu pemaxã nüxü̃ chixu, rü texé ya yíxema tama chauétüwa idexaxe rü nu choxna taxã.
2 Nüü̃ nadau 27:1
3 27:3-4 Rü ñu̱xma nax Tupana maxü̃ choxna ãxü̃ rü tagutáma ta̱xacürü chixexü̃maxã tá chidexa. Rü chorü conü rü taxũtáma doraxü̃ nixu.
4 Nüü̃ nadau 27:3
5 Rü ñu̱xma nax chamaxü̃xü̃ rü tá pemaxã nüxü̃ chixuama nax taxuxü̃ma i chixexü̃ chaxüxü̃. Rü taxũtáma pexü̃́ chanayaxu nax aixcüma yixĩxü̃ i ngẽma perü ore i namaxã choxü̃ ípexuãxü̃xü̃.
6 Rü ñu̱xma nax chamaxü̃xü̃ rü tagutáma nüxü̃ charüchau nax nüxü̃ chixuxü̃ nax taxuxü̃ma i chixexü̃ chaxüxü̃, erü chowa rü nataxuma i ta̱xacü i naxca̱x chaxãnexü̃.
7 Rü guxü̃ma i ngẽma nügü ixuxü̃ nax chorü uanü yixĩxü̃, rü chanaxwa̱xe nax nüxü̃ nangupetüxü̃ i ngẽma guxchaxü̃gü i duü̃xü̃ i chixexü̃gu maxẽxü̃xü̃ ngupetüxü̃.
8 ¿Ta̱xacürü mexü̃ tá ínanangu̱xẽxẽ i ngẽma duü̃xü̃ i chixexü̃gu maxü̃xü̃ i ngẽxguma Tupana nüxna nayauxgu i norü maxü̃?
9 Rü ngẽma duü̃xü̃ rü ngẽxguma guxchaxü̃gü naxca̱x ínguxgu, rü Tupana rü taũtáma nüxü̃ naxĩnü i norü yumüxẽ.
10 Rü ngẽma duü̃xü̃ i chixexü̃gu maxü̃xü̃, rü tama Tupana ya Guxãétüwa Ngẽxmacügu narüxĩnü, rü bai i ñuxgu namaxã yadexaxü̃ nax norü ngü̃xẽẽca̱x ínaca̱xaxü̃.
11 Rü choma rü tá pexü̃ chanawe̱x ya Tupana ya Guxãétüwa Ngẽxmacüarü pora rü ñu̱xũchi ngẽma nagu naxĩnüxü̃.
12 Rü ngẽxguma pema rü marü nüxü̃ peda̱u̱xgu i norü pora rü ñu̱xũchi ngẽma ta̱xacü i naxüxü̃, ¿rü tü̱xcüü̃ nixĩ i pidexagüechaxü̃? —ñanagürü ga Yox.
Chofá wena nidexa
13 Rü nüma ga Chofá rü Yoxü̃ nangãxü̃ga rü ñanagürü: —Rü ñaa tá nixĩ i ngẽma poxcu ya Tupana ya Guxãétüwa Ngẽxmacü tá nüxna ãxü̃ i ngẽma chixexü̃gu maxẽxü̃ rü máetawa̱xegüxü̃.
14 Rü woo namuxũchigu i nanegü i ngẽma duü̃xü̃gü i chixexü̃gu maxẽxü̃, rü nümaxü̃ rü tá daigu nayue, rü ngẽma togü rü tá taiyamaxã nayue.
15 Rü ngẽma nanegü i maxẽãmaxü̃ rü tá da̱xaweanemaxã nayue. Rü yíxema tüxna nayuexe ya naxma̱xgü rü taxũtáma naxca̱x taxauxe.
16 27:16-17 Rü ngẽma duü̃xü̃ i chixexü̃gu maxü̃xü̃, rü woo ñoma waixü̃mü inutaque̱xexü̃rüxü̃ nanutaque̱xeãgu i norü diẽru, rü ñu̱xũchi namuxũchigu i naxchirugü, natürü wüxi i duü̃xü̃ i mea maxü̃xü̃ tá nixĩ i namaxã ãxchiruxü̃ i ngẽma naxchirugü. Rü wüxi i duü̃xü̃ i tama chixexü̃ üxü̃ tá nixĩ i namaxã diẽruã́xü̃ i ngẽma norü diẽru.
17 Nüü̃ nadau 27:16
18 Rü napata i ngẽma duü̃xü̃ i chixexü̃ i nacümagu maxü̃xü̃ rü ñoma wüxi i werichiaü̃ i tama taixü̃rüxü̃ tá nixĩ. Rü ñoma duü̃xü̃ i naanena dauxü̃arü düxenürüü̃mare tá nixĩ ya napata.
19 Rü nawa tá nangu nax wüxi i chütaxü̃ tá diẽruã́xü̃ napexü̃, rü ngẽxguma moxü̃ãcü naba̱i̱xãchigu, rü ngẽxma nayacua̱x nax namuarü diẽruã́xü̃ rü marü nataxuma i norü diẽru.
20 Rü ngunecü rü tá namuü̃, rü chütacü rü wüxi ya buanecü ya tacü tá naxca̱x ínangu rü yimá tá nayaga.
21 Rü yimá buanecü ya tacü ya éstewa ne ũcü rü tá napata ningẽ.
22 Rü yimá buanecü rü tá nagu nanguema rü taxũtáma namaxã nixauxãchi. Rü woo naxcha̱xwa yañagu rü yimá buanecü rü tá nawe ningechigüama.
23 Rü ñoma duü̃xü̃gü tagaãcü péxme̱xgüxü̃rüxü̃ rü yimá buanecü rü tá tagaãcü nawe ningechigüama rü tá napatana nayaga —ñanagürü ga Chofá.
